VOV4.Jarai-Amăng Črăn hơdră hlâo, gơmơi hơmâo lăi pơthâo plăk rup kăn kươk mơnuih ƀôn sang dưm čip. Hrơi anai, ƀing ta ĕp lăng rơnoh yôm găl tơlơi phiăn mơ̆ng rup plăk kăn kươk mơnuih ƀôn sang dưm čip hăng tơlơi dưi mơ̆ng anom bruă pơpă ngă brơi rup plăk kăn kươk mơnuih ƀôn sang dưm čip.

Kơ rơnoh yôm găl tơlơi phiăn, Rup plăk kăn kươk mơnuih ƀôn sang dưm čip lĕ pok rup plăk ƀudah hră pơar djă amăng drơi jăn rĭm čô mơnuih ƀôn sang dêh čar Việt Nam dưi hơmâo rơnoh yôm pơsit brơi kơ drơi jăn mơnuih ƀôn sang pô arăng ngă brơi rup plăk kăn kươk anun, djă ba rup anun dưi pơdah thâo amăng djop bruă rô nao rai, jĕ giăm, pơthâo kơ drơi jăn pô sit pơsir bruă amăng lŏn ia Việt Nam.

Rup plăk kăn kươk mơnuih ƀôn sang dưi mă yua kah hăng Passport ƀudah hộ chiếu tơdah Việt Nam hăng hơdôm dêh čar kĭ hră pơkôl ƀudah hơmâo tơlơi tŭ ư hăng jar kmar brơi mơnuih ƀôn sang hơdôm dêh čar hơmâo kĭ hră pơkôl anun nao rai kơnong pơdah thâo hră ƀudah rup plăk kăn kươk mơnuih ƀôn sang pơhrua kơ hră Passport amăng lŏn ia tơdruă.

Anom bruă, sang bruă, khul anom bruă, mơnuih tơpuôl hơmâo tơlơi dưi rơkâo mơnuih ƀôn sang pơdah thâo hră rup plăk kăn kươk mơnuih ƀôn sang pioh ĕp lăng hơdôm tơlơi pơhing kơ pô anun. Rơngiao kơ anun, anom bruă, khul anom bruă, mơnuih tơpuôl hơmâo tơlơi dưi ăt dưi ĕp lăng mrô pơkă anăn čih amăng rup plăk kăn kươk mơnuih ƀôn sang pioh ĕp lăng tơlơi pơhing  mơ̆ng pô anun, lơ̆m mrô djă pioh amăng dêh čar, wai lăng akŏ mơnuih ƀôn sang hăng plơi pla anih dŏ, tui bruă mă djơ̆ tơlơi phiăn pơtrun.

Lơ̆m mơnuih ƀôn sang pơdah thâo rup plăk kăn kươk mơnuih ƀôn sang tui hăng tơlơi rơkâo mơ̆ng anom bruă, khul mơnuih, mơnuih tơpuôl hơmâo tơlơi dưi amăng bruă kơnuk kơna lĕ, anom bruă, khul bruă, mơnuih tơpuôl hơmâo tơlơi dưi ƀu dưi rơkâo ĕp lăng hră pơar pơkŏn dơ̆ng tah, kiăng pơsit hơdôm tơlơi pơhing čih pơthâo amăng rup plăk kăn kươk. Kơnuk kơna wai pơgang tơlơi dưi, anŏ tŭ yua lăp djơ̆ mơ̆ng pô rup plăk kăn kươk kiăng mă yua rup plăk kăn kươk djơ̆ hơdră, gêh găl amăng bruă mă.

Mơta tơlơi 21 Tơlơi phiăn Kăn kươk mơnuih ƀôn sang pơkă thun bơblih rup plăk kăn kươk mơnuih ƀôn sang tui anai: Rup plăk kăn kươk mơnuih ƀôn sang khom bơblih lơ̆m pô ñu djop 25 thun, djop 40 thun hăng djop 60 thun. Tơdah rup plăk kăn kươk mơnuih ƀôn sang, brơi bơblih, ngă glăi phrâo amăng 2 thun hlâo kơ djop thun pơkă ăt dŏ dưi mă yua mơ̆n truh kơ thun bơblih tŏ tui dơ̆ng.

Hơdră ngă hră, bơblih rup plăk kăn kươk mơnuih ƀôn sang dưm čip điện tử lĕ amuñ amĕ mơ̆n, hmar yua hơmâo laih tơlơi pơhing dŏ răk pioh mơ̆ng hlâo tơlơi pơhing mơnuih ƀôn sang. Hrơi brơi glăi rup plăk kăn kươk mơnuih ƀôn sang dưm čip lĕ tơdơi kơ 7 hrơi ƀudah 15 hrơi yap mơ̆ng hrơi mă djop hră pơar pioh pơsir brơi, tui hluai hơdră, ngă phrâo, bơblih ngă glăi rup plăk kăn kươk kơ pô ñu ngă rơngiă hĭ.

Thượng tá Huỳnh Thị Thu Trang, Kơ-iăng khua anom PC06, kông an ƀôn prong Hồ Chí Minh brơi thâo: rup plăk kăn kươk mơnuih ƀôn sang phrâo anai djă ba lu tơlơi gêh găl kơ mơnuih ƀôn sang, boh nik ñu tơdơi kơ lơ 1/7/2021, lơ̆m Ding jum kông an kah pơpha mrô tơlơi pơhing mơnuih ƀôn sang kơ djop sang bruă, gơnong bruă kơnuk kơna wai lăng, huăi kiăng hră pơsit ngă tui ba nao hră mơnuih ƀôn sang dŏ yua pơkŏn ôh.

“Ră anai, ƀing gơmơi hơmâo 22 mơta hơdră ngă hră pơar kơ mơnuih ƀôn sang. Rup plăk kăn kươk mơnuih ƀôn sang dưm čip amra pơƀut rơbêh 30 mơta hră pơar drơi jăn mơnuih ƀôn sang kah hăng: hră pơjrao duăm ruă hơmâo pơhlôm nua, hră pơhlôm nua mơnuih mơnam, mrô duh jia mơ̆ng rĭm čô, hră mơgăt rơdêh…

Tơdơi anai, mơnuih ƀôn sang, kơnong pơdah thâo rup plăk kăn kươk đôč sit nao ngă bruă hăng sang bruă kơnuk kơna. Amăng rup plăk kăn kươk anun, hơmâo yua telephôn pơčrang gru anăn QR code, ñu amra pơdah ƀuh abih tơlơi pơhing hră pơar pơsit pô ñu mơ̆ng hơđăp”.

Mơta tơlơi 27 Tơlơi phiăn Rup kăn kươk mơnuih ƀôn sang thun 2014 pơkă tơlơi dưi bơblih, ngă brơi hră, ngă glăi hră rup kăn kươk mơnuih ƀôn sang lĕ anom bruă wai lăng rup plăk kăn kươk mơnuih ƀôn sang yua Ding jum kông an. Mơnuih ƀôn sang dưi ruah mă sa amăng hơdôm anih tui anai pioh nao ngă hră pơar rơkâo ngă rup plăk kăn kươk mơnuih ƀôn sang sit djop thun dưi ngă rup kăn kươk tui tơlơi phiăn pơtrun.

-Anom bruă wai lăng rup kăn kươk mơnuih ƀôn sang mơ̆ng Ding jum kông an;

-Anom bruă wai lăng kăn kươk mơnuih ƀôn sang mơ̆ng Kông an tơring čar, ƀôn prong gah gơnong dlông;

-Anom bruă wai lăng kăn kươk mơnuih ƀôn sang mơ̆ng Kông an tơring glông, kuân, plơi prong, plơi prong ƀiă gah tơring čar wai lăng hăng tơring glông bơkơnar;

-Anom bruă wai lăng kăn kươk mơnuih ƀôn sang hơmâo tơlơidưi ngă brơi hră ngă rup kăn kươk kơ mơnuih ƀôn sang ƀơi să, phường, tơring kual, sang bruă kơnuk kơna, anom bruă ƀudah ƀơi anih dŏ mơ̆ng mơnuih ƀôn sang tơdah hơmâo tơlơi či kiăng ječ biă mă.

Thâo hluh tong ten hăng djop kơ rơnoh găl tơlơi phiăn mơ̆ng rup plăk kăn kươk mơnuih ƀôn sang, ăt kah hăng tơlơi dưi ngă brơi hră kăn kươk mơnuih ƀôn sang hăng bruă khom ngă lĕ mơ̆ng djop mơnuih ƀôn sang Việt Nam, tui hăng tơlơi phiăn kơnuk kơna pơtrun.

Nay Jek: Pơblang