VOV4.Jarai - Dŏ kơnong hơdôm hrơi đôč yơh, rơbêh 69 klăk čô mơnuih ƀon sang amăng dêh čar ta pơdah tơlơi dưi amăng kơđi čar, pơdah tơlơi dưi mơng sa čô mơnuih: nao plĕ hră ruah khua khua rơgơi hloh ngă bruă amăng Ƀirô khua pơ ala mơnuih ƀon sang dêh čar hăng Jơnum min pơ ala mơnuih ƀon sang djŏp gưl. Yua glăk hơmâo klin Covid-19, truh ră anai hơdôm boh tơring čar, ƀon prong lêng prăp lui laih hơdră pơphun plĕ hră amăng hrơi mông pơhlôm, pơgang klin. Tơlơi gơñăm nao lĕ abih bang mơnuih ƀon sang dưi nao pơhmư̆ “Hrơi jơnum prong mơng lŏn ia” hăng plĕ hră ruah khua.

89 anih plĕ hră ƀơi kuâ̆n Cầu Giấy, ƀon prong Hà Nội truh mông anai hơmâo prăp lui klă laih, pơhlôm pơgang klin kheng. Ƀơi hơdôm anih ruah khua, lêng pok jơlan nao rai rơhaih, pơtô brơi ƀing kư tri nao plĕ hră, pơhlôm dŏ ataih lơ̆m mă hră plĕ, čih anăn hăng plĕ hră; truă khăn gôm ƀô̆, rao tơngan hăng ia čơƀu pơdjai kman hlâo hăng tơdơi kơ plĕ hră...Yă Trần Thị Phương Hoa, Khua git gai Ping gah kuâ̆n, Khua git gai bruă ruah khua kâ̆n Câù Giấy brơi thâo: rơngiao kơ bruă pơhlôm pơgang klin Covid-19 amăng hrơi plĕ hră, kuâ̆n ăt prăp lui mơn hơdră pơgang tơdah hơmâo tơlơi truh yua klin ngă:

“Bruă prăp rơmet pơgang klin amăng hrơi plĕ hră ăt ngă kơtang hloh mơn. Ră anai, hơdôm anih plĕ hră hơmâo anih dŏ pơčlah. Grup ruah khua hơmâo pơtŏp rơguăt bruă, rơngiao kơ pơtŏp apăn bruă lĕ sang ia jrao kuâ̆n ăt pơtŏp brơi mơn kơ grup wai lăng ruah khua thâo hơdră pơhlôm pơgang klin, đah mơng pơtô brơi ƀing kư tri lơ̆m nao plĕ hră pơhlôm rơnuk rơnua pơgang klin”.

Abih bang hơdôm boh kuâ̆n mơng ƀon prong Hà Nội lêng hơmâo hơdră pơgang klin ƀơi anih plĕ hră hăng hơmâo hơdră pơgang phara hăng anih dŏ pơčlah, anih guang dar. Jơnum min ruah khua ƀon prong Hà Nội rơkâo kơ Jơnum min wai lăng ruah khua dêh čar kơ hơdră phara hơjăn ƀơi hơdôm anih glăk dŏ pơčlah pơgang klin.

Bơ ƀơi ƀon prong Hồ Chí Minh, Jơnum min ruah khua ƀon prong kiăng dăp lui anih dŏ pơhlôm dŏ ataih, ƀu dưi pơƀut lu mơnuih ôh; dăp mơnuih nao pơhmư̆ ƀu dưi rơgao 50% anih brơi dŏ amăng anih pơphun jơnum. Lăp đing nao, ƀơi Bắc Giang, anih glăk hơđuh đĭ klin Covid-19 kơtang hloh, him lăng amra ƀu pơphun jơnum pok pơhai bruă ruah khua pơƀut lu mơnuih ôh amăng hrơi plĕ hră; kah hĭ mrô mơnuih nao plĕ, plĕ hră mơng ha grup mơng ha grup hnun, plĕ kiăo tui mông, ƀu dưi pơƀut lu mơnuih ôh...Ơi Ngô Sách Thực, Kơ-iăng khua Jơnum min djŏp djuai ania mơnuih mơnam Việt Nam lăi: amăng mông anai hơdôm anih pơphun ruah khua amăng hrơi mông glăk hơmâo klin Covid-19 lĕ bruă pơsit tơlơi dưi, kơđŏm hră mơnuih ƀon sang dưi nao plĕ hră ƀơi anih dŏ pơčlah, anih pơjrao pơƀut ha anih...khŏm kiăng pơhlôm klă kiăng mơnuih nao plĕ hră amăng hơdôm kual anai ăt dưi nao plĕ hră:

“Ƀing gơmơi ƀuh lơ̆m hơmâo klin ƀudah lơ̆m hơmâo tơlơi truh ječ lĕ khŏm prăp lui hlâo hơdră pơsir, kiăng ƀơi anih dŏ pơčlah lĕ hơmâo kơthung plĕ hră thâo ba hyu. Ăt hrŏm ha grup plĕ hră, sa anih plĕ hră čih anăn ƀing nao plĕ hră lĕ bruă mă kơthung plĕ hră ba hyu ngă hiư̆m pă pơhlôm pơgang klin, ăt pơhlôm tơlơi dưi plĕ hră mơng ƀing glăk dŏ pơčlah mơn”.

Ƀơi kual Dap Kơdư bruă prăp lui bruă ruah khua hmư̆ hing ƀơi djŏp anih yơh. H’Sinh Bkrông, sa čô kư tri, sinh viên hrăm thun tal 2, Sang hră Đại học Tây Nguyên, tơring čar Dak Lak, brơi thâo, anai lĕ tal blung a ñu gum hrŏm hrơi ruah khua amăng dêh čar, yua hnun H’Sinh dŏ čang biă mă hrơi ñu djă ƀơi tơngan hla pơ-ar, ruah mă pô ñu kiăng. H’Sinh lăi:

“Anai lĕ tal blung a kâo pre lui nao plĕ hră, yua hnun kâo mưn hur har amăng pran jua. Pơ anăp anai, lơ̆m plĕ hră kâo amra ruah mă pô hlơi kâo lăng rơgơi, dưi pơđĭ kyar tơlơi bơwih ƀong huă, mơnuih mơnam ƀơi tơring čar”.

Hlăk ai tơring čar Dak Lak hơmâo pơphun lu bruă čơkă hrơi jơnum prong ƀơi hơdôm boh tơring glông, plơi prong hơmâo hơdôm rơbâo čô hlăk ai tơdăm dra amăng tơring čar nao pơhmư̆. Tui anun, pơphun hyu djru ƀơi hơdôm anih plĕ hră kah hăng djru wai lăng hơđong kơjăp ƀơi anih plĕ hră, pơhlôm hơdjă agaih ƀơi anih plĕ hră, djru pơhlôm pơgang klin Covid-19; pơphun Hrơi pơbưp hlăk ai nao plĕ hră; Jơnum “Kư tri hlăk ai hăng bruă ruah khua pơ ala mơnuih ƀon sang dêh čar tal 15 hăng khua pơ ala mơnuih ƀon sang djŏp gưl rơwang thun 2021-2026”.

Kiăng pơhlôm rơnuk rơnua kơ ƀing nao plĕ hră jơnum “Hrơi jơnum prong mơng lŏn ia”, Jơnum min ruah khua Dêh čar hơmâo pơtrun lu hră pơtô pơblang bruă ruah khua. Phrâo anai hloh, Khul wai lăng bruă ruah khua Dêh čar pơtă pơtăn na nao bruă ruah khua khŏm kiăo tui kual, mrô mơnuih nao plĕ hră ƀơi rim kual  hăng git gai pơgang klin Covid-19. Hăng kư tri lĕ mơnuih ƀă klin Covid-19, Khua Jơnum min Tơlơi phiăn mơng Ƀirô khua pơ ala mơnuih ƀon sang dêh čar Hoàng Thanh Tùng brơi thâo:

“Phiah phiăn dêh čar pơtrun abih bang mơnuih dưi nao plĕ hră khŏm čih anăn đah mơng dưi nao plĕ hră. Yua hnun kư tri lĕ mơnuih ƀă kman Covid-19 dŏ pơčlah ƀơi sang ƀudah pơčlah pơƀut ha anih lĕ kơnuk kơna khŏm pơhlôm brơi pô anun hơmâo anăn amăng hră mơnuih dưi nao plĕ hră mơn. Anai lĕ tơlơi gơgrong bruă mơng Jơnum min mơnuih ƀon sang să anih hơmâo pô anun dŏ ƀudah anih dŏ pơčlah, pơhlôm brơi pô anun dưi nao plĕ hră”.

Ră anai ƀơi hơdôm anom bruă, plơi pla amăng dêh čar ta glăk prăp lui hơdră ngă bruă, pơtô pơblang kơ rim boh sang, rim čô mơnuih kơ bruă pơhlôm pơgang klin lơ̆m nao plĕ hră hăng hơdră ruah khua amăng hrơi mông hơmâo klin. Tơlơi gơñăm nao prong hloh lĕ abih bang mơnuih hơmâo anăn nao plĕ hră mah dŏ pơ anih pơčlah hơjăn, ƀudah dŏ pơjrao kman Covid-19, ơi ia jrao, ling tơhan glăk ngă bruă...lêng dưi nao plĕ hră soh. Abih bang bruă khŏm djơ̆ tơlơi phiăn, pơhlôm rơnuk rơnua amăng hrơi mông glăk hơmâo klin tui anai.

Siu H’Mai: Pơblang