VOV4.Jarai - Mơng hrơi anai, lơ 15/3 truh lơ 13/4 amra pơphun tal blung a wai lăng bruă ruah khua pơ ala mơnuih ƀon sang dêh čar tal 15 hăng khua Jơnum min pơ ala brơi phun kơ mơnuih ƀon sang djŏp gưl rơwang thun 2021-2026. Jơnum min djŏp djuai ania mơnuih mơnam Việt Nam amra pơphun 5 grup hyu hơduah tơña, wai lăng bruă ruah khua. Rim grup hơmâo nao lăng ƀơi 3 anih gưl tơring čar hăng1 anih gưl tơring glông ƀơi rim boh tơring čar. Pơhiăp tom hăng ƀing hyu mă tơlơi pơhing phrâo mơng GPJPVN, ơi Ngô Sách Thực, Kơ-iăng khua jơnum min djŏp djuai ania mơnuih mơnam Việt Nam brơi thâo: Hơmâo 8 tơlơi kiăng wai lăng hăng lu hơdră wai lăng, djru ruah mă mơnuih rơgơi hloh mut amăng Ƀirô khua pơ ala mơnuih ƀon sang dêh čar hăng Khua Jơnum min pơ ala brơi phun mơnuih ƀon sang. Ƀơi anai lĕ tơlơi ră ruai mơng Laị Hoa, pô hyu mă tơlơi pơhing phrâo hăng ơi Ngô Sách Thực:

- Ơ ơi Ngô Sách Thực, tơlơi gơñăm nao mơng bruă hyu hơduah tơña, wai lăng bruă ruah khua pơ ala mơnuih ƀon sang dêh čar hăng khua mua Jơnum min pơ ala brơi phun kơ mơnuih ƀon sang lĕ tơlơi hơget?

- Ơi Ngô Sách Thực: Jơnum min wai lăng djŏp djuai ania mơnuih mơnam Việt Nam gơgrong pơsir hơdôm bruă tơnap, aka ƀu rơđah, wơ̆t amăng bruă pơphun ngă mơtăm kiăng lơ̆m pơphun ngă lĕ djơ̆ tơlơi pơkôl hăng truh kih. Sit hnun yơh, amăng mông prăp lui ngă tui tơlơi pơkôl pơkă mơng Tơlơi phiăn ruah khua pơ ala mơnuih ƀon sang dêh čar ăt kah hăng Khua mua Jơnum min pơ ala brơi phun kơ mơnuih ƀon sang lĕ tơlơi prăp rơmet lui jing sui biă mă, đah mơng truh lơ 23/5 lĕ hrơi mơnuih ƀon sang nao plĕ hră. Hơdôm tơlơi anun ngă amăng ƀrư̆, ngă tui rim črăn, hăng 16 mơta tơlơi phun, tơlơi gum ngă mơng mơnuih ƀon sang, hơdôm anom bruă lĕ kiăng ngă djơ̆. Tơlơi kiăng ba glăi mơng bruă wai lăng anai lĕ kiăng bruă prăp rơmet, pôr pơhing khŏm lăi nao djŏp kơ mơnuih ƀon sang thâo, biă ñu lĕ bơdjơ̆ nao bruă čih anñ pô tơbiă anăn kiăng mơnuih ƀon sang thâo pô gơñu ruah, đăo gơnang kơ pô anun.

- Tui anun, tơlơi hơget thơ kiăng pơƀut krăp lăng hloh, ơ ơi?

-Ơi Ngô Sách Thực: Tui hăng tơlơi phiăn, amăng Jơlan hơdră ngă hrŏm hơmâo ba tơbiă 8 mơta tơlơi, amăng anun pơƀut amăng hơdôm tơlơi, bruă ngă bơdjơ̆ nao wai lăng djuai ania mơnuih mơnam djŏp gưl, mơng gơnong dlông truh pơ plơi pla gum ngă bruă ruah khua, ngă hiư̆m pă kiăng djơ̆ mơnuih kiăng ruah, pô anun hơmâo arăng đăo gơnang. Kơ mơnuih tơbiă anăn ruah ngă khua ƀơi gơnong dlông lĕ hơmâo Khul wai lăng bruă ruah khua dêh čar, tơring tơrang djŏp gưl lĕ hơmâo Jơnum min ruah khua djŏp gưl. Kual plĕ hră hơmâo grup plĕ hră. Rim grup plĕ hră lêng hơmâo khua mua mơng jơnum min djŏp djuai ania mơnuih mơnam hăng hơdôm khul grup gum ngă. Tơlơi gum ngă anun djru bruă ruah khua, pôr pơhing djŏp hloh kơ mơnuih ƀon sang. Anun lĕ bruă yôm biă mă laih dong hơdôm tơlơi pơkôl pơkă bruă kiăng gơgrong mơng hơdôm grup ruah khua lĕ mă bruă tui tơlơi phiăn. Tal dua lĕ grup pơƀut kơ bruă pơkă tơlơi dưi tơbiă anăn ruah hăng hơdôm mông hơduah tơña mơnuih tơbiă anăn ba ruah, kiăng hiư̆m pă mơng pơhlôm djơ̆ tơlơi phiăn. Abih bang tơlơi anai hơmâo 3 tal ngă bruă. Tal sa lĕ tŭ ư dưm dăp mơnuih ngă bruă, mrô mơnuih ngă khua; tal 2 lĕ hră čih anăn mơnuih ngă khua hăng tal 3 lĕ čih hră mơnuih dưi tơbiă anăn ba ruah. Amăng hơdôm tơlơi anai lĕ hơdôm tal hơmâo ngă khŏp, kơjăp pioh ruah, lăng pơten pô dưi tơbiă anăn ruah ngă khua pơ ala mơnuih ƀon sang dêh čar hăng khua anom bruă pơ ala mơnuih ƀon sang djŏp gưl.

- Ơ ơi, hơdră ngă bruă ăt kah hăng bruă wai lăng hiư̆m pă kiăng Jơnum min mơnuih djŏp djuai ania mơnuih mơnam pok pơhai wai lăng tŭ yua hloh tui hăng tơlơi phiăn dêh čar ta?

- Ơi Ngô Sách Thực: Hơdră ngă bruă khŏm hơmâo lu mơta. Tal sa, ƀing gơmơi lăng hơdră rim čô mơnuih mơng Jơnum min djŏp djuai ania mơnuih mơnam Việt Nam lêng hơmâo tơlơi pơgôp hiăp. Tal 2 dong lĕ, mơng tơlơi lăi glăi mơng mơnuih ƀon sang lĕ hmao tlôn lăi glăi pơ anom apăn bruă. Kâo lăi pơhmutu, mơng mông Jơnum hơduah tơña bruă ruah khua tal 1 hơmâo pơphun rơđah rơđông, samơ̆ ăt hơmâo mơn tơlơi aka ƀu djơ̆ gah mrô mơnuih ngă khua, yua hnun ƀing ta rơkâo đĭ pơ Anom bruă khua pơ ala mơnuih ƀon sang hăng hăng anom bruă dưi pơsir bruă đah mơng pơplih ming tañ, lăp djơ̆ hăng tơlơi pơkôl pơkă. Tơlơi gơgrong mơng rim gưl wai lăng djŏp djuai ania amra pơphun wai lăng kiăng hơmâo mă tơlơi pơgôp hiăp, rơkâo đĭ mơtăm. Tơlơi yôm phara mơng bruă anai lĕ ƀu dưi amăng tal tơlơi dong tah, amăng ƀrư̆ pơsir abih djŏp tơlơi aka ƀu dưi ngă, aka ƀu rơđah, amăng ƀrư̆ mơng 16 tal ngă bruă ta khŏm pơsir, kiăng truh hrơi ruah khua lĕ lơ 23 blan 5 khŏm lăi pơthâo hlâo djŏp tal pơsir bruă kiăng ngă pơgiong hĭ. Tui anun, krăp lăng djru ƀing ta prăp lui djŏp, klă ƀiă hăng dưm kơnar hloh./.

- Hai bơni kơ ih hŏ!

Lại Hoa: Čih: Siu H’Mai: Pơblang