VOV4.Jarai - Tơdơi kơ 10 thun gir run, truh ră anai, sang anŏ amai Y Glar hăng ayong A Dâu (djuai ania Sơđăng) dŏ ƀơi să Sa Bình, tơring glông Sa Tầy, tơring čar Kontum ƀu djơ̆ kơnong dưi pơklaih mơng ƀun rin đôč ôh mơ̆ ăt hrưn đĭ jing sang anŏ pơdrong asah. Mơng hmua pla phun kơsu, plum hăng rông rơmô, mă akan… rĭm thun sang anŏ gơñu dưi pơhrui glăi hơdôm rơtuh klăk prăk.

Tơkeng thun 1993 amăng sang anŏ ƀun rin, lu adơi ayong, yua anun lơ̆m hrăm abih sang hră gưl dua, amai Y Glar dŏ pơ sang djru amĭ ama ngă đang hmua. Truh thun 2011, Y Glar dô̆ ayong A Dâu laih anun amĭ ama brơi dua rơkơi bơnai ñu rơbêh 1 ektar lŏn ngă hmua. Tơlơi hơdip tơnap tap biă mă. Thun 2014, dua rơkơi bơnai ñu hơmâo gong gai ƀon lan črâo brơi hăng djru čan prăk mơng sang bruă prăk djru mơnuih mơnam hăng rơnoh prăk 30 klăk prăk kiăng kơ pơđĭ kyar bơwih ƀong huă. Mơng mrô prăk anai, sang anŏ ñu pla 1 ektar phun kơsu, laih dong plơi 2 drơi rơmô ania, laih anun 2 ektar kiăng kơ pla plum.

Lŏn mơnai pla pơpjing gêh gal, yua kơ thâo mă yua boh thâo phrâo, 1 ektar phun kơsu sang anŏ ñu bluh đĭ hiam hăng phrui glăi hơmâo hmăi. 2 drơi rơmô ania tuh 3 drơi ană, laih anun sang anŏ ñu sĭ blơi dong 1,5 ektar hmua pla phun plum, pla phun boh bơr. Mơng lŏn pla kơsu, plum hăng rông rơmô, mă akan … rĭm thun sang anŏ ñu pơhrui glăi 100 klăk prăk. Ƀu djơ̆ kơnong tui anun ôh, lơ̆m rơhuông bruă, amăng hrơi pơdơi, sang anŏ ñu hyu mă bruă apah kiăng kơ hơmâo dong prăk pơhrui kơ sang anŏ. Phrâo anai, sang anŏ ñu man pơdong sang phrâo.

Ayong A Dâu brơi thâo: Pơ anăp anai, dua rơkơi bơnai ñu pơmĭn lăng amra blơi lŏn ngă hmua dong laih anun čan prăk kơnuk kơna, hrŏm hăng prăk sang anŏ pơkrem, plih hĭ 1 ektar hmua pla plum hơdai nao pla kơphê. Ră anai, dua rơkơi bơnai ñu glăk nao hrăm hmư̆ arăng pơtô pơblang kơ bruă pla pơjing phun kơphê. Ayong A Dâu brơi thâo: Kiăng kơ pơđĭ kyar bơwih ƀong huă hơđong kjăp blung hlâo kiăng kơ gir run hrưn đĭ, ngă hiưm pă khŏm pơklaih mơng ƀun rin, mă yua boh thâo phrâo, hmư̆ tui arăng pơtô laih dong lăng glăi hơdôm tơlơi găn rơgao. Hrŏm hăng anun, kiăng kơ sem lăng tong ten hơdôm phun pla lăp djơ̆ amăng kual, laih dong nua sĭ mơdrô ră anai hiưm pă ñu.

Ƀu djơ̆ kơnong bơwih ƀong huă rơgơi đôč ôh, amai Y Glar hăng ayong A Dâu ăt abih pran jua djru brơi hơdôm sang anŏ tơnap tap pơkŏn amăng plơi pla. Rĭm thun, iâu 3-4 čô mơnuih mă bruă brơi sang anŏ ñu; hăng pơtô brơi tơlơi găn rơgao amăng bơwih ƀong huă brơi kơ abih bang mơnuih.

Lăi nao sang anŏ amai Y Glar hăng ayong A Dâu, ơi Nguyễn Minh Thuận, Khua git gai Ping gah să Sa Bình, tơring glông Sa Thầy, Kontum brơi thâo: Anai lĕ sang anŏ ba gru amăng pơklaih mơng ƀun rin amăng să. Ƀu djơ̆ kơnong tui anun ôh, sang anŏ ñu ăt abih pran jua djru bruă hrŏm amăng plơi pla anun lĕ bruă pơyơr lŏn, gum pơgôp hrơi mă bruă djru man pơkra jơlan glông man pơdong plơi pla phrâo; pơjing sang anŏ hơdip ba gru, yâo mơ-ak. Thun 2020, anai lĕ sa amăng hơdôm sang anŏ ba gru hơmâo Ping gah, gong gai ƀon lan pơpŭ bơni lơ̆m ngă tui tơlơi jak iâu “Abih bang mơnuih gum pơgôp pơjing tơlơi hơdip hiam klă”.

Hră pơhing Kontum: Čih

Siu Đoan: Pơblang