VOV4.Jarai - Sang djă pioh hơdor glăi mơng Đại tướng Võ Nguyên Giáp ƀơi plơi An Xá, să Lộc Thủy, tơring glông Lệ Thuỷ mơng lu thun hăng anai lĕ anih anom juăt biă hăng neh wa, ling tơhan đơ đam dêh čar ta. Ƀơi anai čơkă na nao pran jua pơđao mơng mơnuih ƀôn sang djop anih anom amăng Lŏn ia nao čuă, hơdor tơngia, hơdor glăi kơ Đại tướng mơng djuai ania.

Găn bah amăng war kyâu sô, tui jơlan mut sang Đại tướng Võ Nguyên Giáp lĕ glông phun če tàu mơtah hlê̆, dưi trơ̆i rơguăt biă, tơpă tơthar. Sang sô hơđăp dŏng ƀơi hang ia krông Kiến Giang gah plơi An Xá, să Lộc Thủy, tơring glông Lệ Thủy, pơkĕ hăng hơdôm tơlơi hơdor glăi lom dô̆ čơđai mơng Đại tướng. Hlâo adih, amăng rơnuk blah ngă, sang hmâo ha tal arăng čuh abih bang. Thun 1977, tui hăng tơlơi čang rơmang mơng sang anô̆ Đại tướng, sang dưi pơdŏng glăi ƀơi atur sang hơđăp tui djơ̆ sang hơđăp hlâo adih. Sang rap bơbung mă ƀiă, gah yŭ rap nao dong hlang ngă bah amăng pơgang hơjan pơ-iă. Amăng lăm sang pơdă mă ƀiă gơnam hăng rơwang tŏng krah lĕ anih dưm pra yang pơpŭ kơ ơi yă hrom hăng rŭp Đại tướng Võ Nguyên Giáp. Rơwang gah djeo hmâo sa bôh hĭp prong dưm gơnam dô̆ glăi mơng sang anô̆. Gah dring sang lĕ dua per kơƀang grê pioh tŭ jum tuai. Jung dar sang dô̆ yôl lu rŭp djă pioh. Ơi Võ Đại Hàm, pô iâu kơ Đại tướng ơi tui gal ană tơčô amăng kơnung djuai thun anai giăm hmâo 80 thun laih, pô wai lăng Sang djă pioh, bơwih brơi kơ pra yang Đại tướng brơi thâo:

 “Sang dô̆ dŏng ƀơi lŏn sang mơng ƀing ơi yă đưm, ăt pơkra hăng hnal kyâu kah hăng anai. Lom Prang blah mă glăi Quảng Bình, juăt đĭ ca nô mơng Đồng Hới đuăi tui ia krông Kiến Giang nao blah huĕt hăng čuh laih sang anai. Tơdơi kơ tlaih rơngai, tơring glông pơdŏng glăi sang anai, djop mơnuih leng kơ čang rơmang Đại tướng lom glăi pơ̆ plơi pla hmâo anih dô̆”.

Sang djă hơdor pioh Đại tướng Võ Nguyên Giáp ƀơi hang ia krông Kiến Giang

Bruă wai lăng Sang djă pioh hơdor glăi yua kơ sang anô̆ ơi Võ Đại Hàm hăng yă Trần Thị Vân, ană tơčô kơnung djuai Võ gơgrong. Neh wa hăng ling tơhan đơ đam dêh čar ta lom nao čuă dưi čơkă jum tâ̆o klă biă hăng hmư̆ ruai glăi lu tơlơi lăi nao kơ čơđai mơng Đại tướng. Khă lu wot nao pơ̆ sang anai, samơ̆ rim wot yak mut bah amăng, ling tơhan hơđăp Phan Thế Vinh ƀu tlaih ôh pơhư̆č amăng pran jua, ol kơdol. Yua kơ hơdôm tal Đại tướng glăi čuă plơi, ñu lĕ sa amăng hơdôm mơnuih hmâo ư-ang dưi bưp, ră ruai hrom hăng Đại tướng. Ling tơhan hơđăp Phan Thế Vinh, ƀơi Lộc Thủy, tơring glông Lệ Thủy ră ruai:

 “Kah hăng hmâo hlơi pơtrut pran kâo lĕ rim thun truh hrơi rơngiă mơng wa Giáp ƀudah truh hrơi hơdor glăi hrơi tơkeng mơng wa Giáp ƀudah hơdôm hrơi ngă lơphet kâo leng kơ kiăng tum pơƀut glăi pơ̆ anai hăng hơdor kơ wa. Kah hăng wa Giáp ăt glăk dô̆ hơdip mơn hăng pơwot glăi amăng sang anai”.

Sang djă hơdor pioh Đại tướng Võ Nguyên Giáp

Lom dô̆ cơđai Đại tướng pơkĕ juăt biă hăng ia krông plơi pla, ia krông Kiến Giang mơtah hlong. Yă Ngô Thị Bảy, ƀơi plơi An Xá, să Lộc Thủy, tơring glông Lệ Thủy lăi pơthâo, hơdôm tal Đại tướng glăi čuă plơi pla, neh wa plơi pla tơbiă čơkă lu biă. Mlăm, plơi pla, neh wa plơi pla pơphun adôh hò khoan đam ƀơi lan gah anăp Sang djă pioh hơdor glăi. Yă Bảy hrom hăng grŭp adôh suang amăng să Lộc Thủy pơdah hơdôm er adôh hò khoan đưm. Yă Bảy hơdor glăi, lom anun, Đại tướng dô̆ ber ƀơi dring sang, wơwil jum dar lĕ sang anô̆ hăng lu neh wa, pah tơngan tui hơdôm er adôh hò khoan, lăng mơ-ak biă pran jua sang anô̆, pran jua plơi pla pơđao biă:

“Tal blung a bưp Đại tướng, lom anun mơ-ak rah, tơtư̆ rah lom wa nao mă tơngan. Kâo lom anun ăt dô̆ hlăk ai mơn, lăi: “Hai kâo bơni kơ wa”, djă tơngan wa mơ̆ kâo ol kơdol pran jua truh pơhiăp “Tơngan wa muan đơi mơ̆, tơngan kâo lĕ khăng khot” laih anun ƀuh wa tlao. Bô̆ mơta ñu kah hăng ƀu djơ̆ sa čô khua tơhan ôh mơ̆, kah hăng sa pô ama, sa čô ơi mơng plơi pla pô, lăng juăt biă, jê̆ giăm hăng kiăng khăp mơnuih ƀôn sang”.

Kơ-iăng Khua mir sir dêh čar ta Võ Thị Ánh Xuân tuĭ ñang, hơdor tơngiă, hơdor glăi kơ Đại tướng Võ Nguyên Giáp ƀơi Sang djă pioh hơdor glăi

Sang pơdŏng ƀơi hang krông Kiến Giang nao hrom hăng hơdôm tơlơi djă pioh hơdor glăi mơng rơnuk čơđai truh kơ Đại tướng tha rơma ƀu ai bua. Ră anai, Sang djă pioh hơdor glăi mơng Đại tướng Võ Nguyên Giáp jing laih anih anom juăt biă hăng lu mơnuih ƀôn sang mơng djop anih anom amăng Lŏn ia. Hră čih djă hơdor pioh dưm ƀơi krah kơƀang amăng sang anai dô̆ hơnong đôč hơdôm glông bôh hră bă kơ tơlơi bơni, tơlơi pơpŭ yôm mơng neh wa, ling tơhan đơ đam dêh čar ta hăng gơyut gơyâu jar kơmar lom nao čuă Sang djă hơdor pioh Đaị tướng Võ Nguyên Giáp./.

Siu H’ Prăk: Pơblang