VOV4.Jarai - Sang mơnă Sơn La (gah phường Tô Hiêụ, plơi prong Sơn La, tơring čar Sơn La) jing Anih gru đưm dêh čar yôm phara, rim thun čơkă giăm 300.000 wơ̆t čô tuai mơng hơdôm tơring čar, ƀon prong amăng dêh čar hăng jar kmar nao čuă, kơsem min, hơduah ĕp gru grua. Sang mơnă Sơn La hơmâo ayăt Prang man pơkra mơng thun 1908. Anai jing anih krư̆ 1.007 wơ̆t čô mơnuih cộng sản, jing sang hră hơkrŭ lŏn ia, anih pơjing “pơjeh djuai mriah” mơng bruă hơkrŭ lŏn ia Việt Nam.

Anih gru đưm sang mơnă Sơn La

Anai jing sa amăng hơdôm anih nao čuă lăng yôm biă mă laih anun anai lĕ “anih mriah” kiăng pơtô pơblang gru grua tơgŭ hơkrŭ lŏn ia ta kiăng rơnuk anai thâo hluh, pơpŭ tui, kơdrưh kơ-ang kơ bruă hơkrŭ mơng djuai ania ta. Găn rơgao lu wơ̆t pơkra ming, hyu sem hră pơ-ar, gơnam bơdjơ̆ nao gru đưm, Sang mơnă Sơn La lêng gir pơtrut tui anŏ yôm amăng bruă pơtô pơblang kiăng rơnuk hlăk ai thâo hluh gru grua hing ang mơng đưm hăng ƀing tuai nao čuă lăng.

Siu H’Mai: Pơblang