VOV4.Jarai - Pơhiăp hăng ƀing hyu mă tơlơi pơhing phrâo, Khua ding jum prăk kăk ơi Hồ Đức Phớc brơi thâo glăk sem lăng tŏng ten, pơphô bruă kơ anom bruă dưi pơsit brơi prăk djru kơ anom bơwih ƀong, kiăng pơđĭ kyar bơwih ƀong. Amăng anun sem lăng prăk djru 10 rơbâo truh 20 rơbâo klai prăk čan mă kơmlai ƀiă đôč kơ anom bơwih ƀong. Tui hăng Khua ding jum Hồ Đức Phớc, amăng mông anai, kiăng hơmâo prăk djru khŏm pơđĭ tui laih mrô prăk pioh mă yua hloh kơ prăk pơhrui. Khă hnun  hai, lơ̆m tơlơi bơwih ƀong hơđong hăng đĭ kyar glăi, amra pơhrŏ trun dong mơn kơ prăk pioh yua. Hlâo kơ anun, Khua Jơnum min Prăk kăk - Prăk mơng Ƀirô khua git gai pơ ala mơnuih ƀon sang dêh čar ơi Nguyễn Phú Cường brơi thâo, Kơnuk kơna glăk čih pơkra hơdră ngă bruă kơ abih bang kơ hơkrŭ glăi tơlơi bơwih ƀong huă, hơmâo prăk djru pơđĭ kyar, djru ba tơlơi bơwih bong, kiăng pơ anăp anai pơdah thâo kơ Khua mua git gai pơ ala mơnuih ƀon sang. tui hăng ơi Nguyễn Phú Cường, hơdôm prăk djru pơtrut tơlơi bơwih ƀong mơ̆ Kơnuk kơna glăk ngă khŏm prong kah mơng dưi pơđĭ kyar glăi tơlơi bơwih ƀong; ngă bruă djơ̆ hăng tơlơi kiăng mông anai laih anun khŏm gêh gal kơ mơnuih ƀon sang hăng anom bơwih ƀong.

Siu H’Mai: Pơblang