VOV4.Jarai-Khua ding jum pơtom hiăp dêh čar Singapore, ơi Vivian Balakishnan phrâo bưp khua ding jum pơtom hiăp dêh čar Mi, ơi Antonio Blinken. Ƀơi mông bưp, abih dua gơñu pơdah rai pran jua bơngơ̆t biă mă kơ tơlơi rung răng ƀơi dêh čar Myanmar.

Khua ding jum pơtom hiăp dêh čar Singapore brơi thâo, tơlơi ƀun rin ư̆ rơpa jai kơtang, rung răng kơđi čar tơdơi kơ hơmâo tơlơi ngă lơgreo blan 2 thun anai ƀơi Myanmar sa tơlơi lăp bơngơ̆t biă mă, Mi hăng Singapore lêng kơ bơngơ̆t hrom soh. Samơ̆, ơi Balakishnan lăi lĕ, hơdôm tơlơi gir run mơ̆ng jar kmar aka ƀu djop ôh, kiăng hơdră hiam klă hloh ăt dêh čar Myanmar mơ̆n phun.

Khua ding jum pơtom hiăp dêh čar Singapore brơi thâo dơ̆ng, ASEAN ră anai hlăk gir run djru Myanmar, hơdôm dêh čar ASEAN tơguan khua djru bruă nao bưp lăng hơdôm bơnah kiăng ĕp hơdră ngă gêh găl kơ mông jơnum bơkơtuai hĭ. Samơ̆, ơi Balakishnan bơngơ̆t lĕ hŭi ƀu hơmâo hơdră či ngă tañ ôh laih anun kŏn amuñ lơi pơsir kơđi tơlơi ƀơi Myanmar.

Nay Jek: Pơblang