VOV4.Jarai-Thun blan rơgao tơlơi pơhing lăi 17 ha lŏn glai, amăng kual wai lăng mrô 726, gah să giăm guai dêh čar Ia Dal tơring glông Ia H'Drai, tơring čar Kon Tum arăng jah drôm ngă hmua laih anun phrâo anai sem glăi. Tơlơi mơ̆ lăp či lăi nao, lơ̆m pơsir tơlơi anai lu tơlơi pơhing phrâo dŏ kơtuă kah hăng đơ đam arăng phă pơrai ƀu djơ̆ lăi glai klô hrom hăng anŏ ƀu rơđah rơđong kơ anom bruă wai lăng lŏn glai anai lăi pơthâo. Amăng đơ đam 17 ha anai, mơnuih ƀôn sang pla hơbơi ƀlang hăng boh ñông.

Phun kyâo amăng glai arăng phă pơrai pioh ngă hmua pla pơjing

Amăng anun, hơmâo đang boh ñông pla hơdôm thun laih, hơmâo mơ̆n đơ đam phrâo jah drôm, phrâo pla. Tơlơi hơmâo 17 ha glai să Ia Dal, tơring glông Ia H'’rai, Kon Tum arăng phă pơrai hĭ pioh mă lŏn ngă hmua dưi hơmâo Khua git gai ping gah tơring čar Kon Tum ơi Dương Văn Trang git gai brơi ĕp rơđah mơ̆ng akŏ blan 6.

Samơ̆ giăm 1 blan hăng anai rơgao tơlơi pơhing mơ̆ng djop anom bruă pơdjơ̆ nao lăi pơthâo sư̆ rơbư̆. Khă hnun, tơlơi tơpă ăt akŏn dưi pơdŏp lơi, pơ anai lu phun kyâo amăng glai jah drôm hĭ, čuh jơnah laih anun tơlơi anai hơmâo sui laih samơ̆ ƀu hơmâo pơgăn truh kih hmao kru ôh.

Nay Jek: Pơblang