VOV4.Jarai- Mơguah (12/12) tal hơdor glăi 90 thun hrơi blah wang lưu hyuết mơng ƀing tơhan arăng mă krư̆ ƀơi sang mơnă Kontum, tal blah wang anai ƀu djơ̆ hmư̆ hing ƀơi Kontum, Việt Nam đôč ôh ăt truh đơ đam kual Đông Dương, Ping gah tơring čar, Khul pơ ala mơnuih ƀon sang, Jơnum min mơnuih ƀon sang tơring čar, Jơnum min djop djuai ania mơnuih mơnam Việt Nam tơring čar pơphun ngă lơphet pioh hơdor glăi 90 thun hrơi blah wang Lưu huyết kiăng hơdor glăi gru grua ngă hơkrŭ hing ang mơng dêh čar ta; hodor tơngia ƀing mơnuih djai pơsăn drơi amăng rơnuk blah ayăt Prang ƀơi sang mơnă Kontum.

Mông ngă lơphett hơdor glăi 90 thun rơnuk blah wang Lưu huyết ƀơi sang mơnă Kontum

Sang mơnă Kontum yua ayăt Prang man pơdong mơng thun 1915-1917, lĕ anih krư̆ ƀing tơhan man pơdong blung hlâo ƀơi kual Dap kơdư. Đa sang mơnă anai krư̆ rơbêh 500 čô mơnuih apăn bruă. Rơnuk blah wang Lưu hyuết hăng Tuyệt thực ƀơi sang mơnă Kontum amăng blan 12/1931 khŏm ngă ayăt Prang pơplih hĭ hơdră mă krŭ mơnuih, laih anun tŭ ư hăng hơdră krư̆ mơnă hơmâo ba tơbiă, lui hĭ man pơkra jơlan mrô 14, sit biă ñu truh thun 1934 ayăt Prang khŏm lui hĭ sang mơnă Kontum.

Siu Đoan: Pơblang