VOV4.Jarai - Čơđai sang hră amăng dêh čar ta mut thun hrăm phrâo 2021-2022 laih. Mah hơdôm tơring čar lêng pơsit amra dưi pơsir tơlơi tơnap yua klin Covid-19 ngă či pơphun pơtô hrăm lăp djơ̆, samơ̆ ăt dŏ lu tơlơi tơnap, tơlơi bơngơ̆t hăng anih pơtô hrăm wơ̆t hăng ƀing čơđai.

Ƀon prong Hồ Chí Minh, anih glăk hơmâo klin Covid-19 kơtang hlih, mah gong gai hăng anom apăn bruă čar pơsit amra pơphun pơtô hrăm lăng nao rai amăng tivi truh abih rơwang hrăm tal 1, samơ̆ bruă ba hyu hơdrôm hră kơ ƀing čơđai glăk tơnap mơn. Amăng anun, hơdrôm hră hrăm anih 1, anih 2 hăng anih 6 kiăo tui hơdră pơtô phrâo, hơdôm anom bruă glăk hơmâo 60% mrô hơdrôm hră đôč. Yua hnun, hrŏm hăng ĕp hơdră dưi ba hyu hră hrăm kơ ƀing čơđai, hơdôm boh kuâ̆n, tơring glông hăng sang hră khŏm brơi hơdrôm hră hrăm điện tử mơng anih 1 truh anih 12 ƀơi plang internet kơ ƀing čơđai kiăng mă yua dơdăng. Ơi Dương Anh Đức, Kơ-iăng khua Jơnum min mơnuih ƀon sang ƀon prong Hồ Chí Minh brơi thâo:

“Ƀon prong git gai hơdôm boh sang hră thâo djŏp tơlơi gah sang anŏ čơđai, thâo rơđah tơlơi tơnap tap đah mơng jŭ yap anăn ƀing čơđai tơnap tap amăng bruă hrăm amăng plang internet. Mơng anun hơmâo hơdră rơđah rơđông thâo djru ba kah hăng: jak iâu ƀing juăt djru mơnuih tơnap tap djru ba prăk kăk, măi mok kơ ƀing čơđai, mơ-it hră hrăm kiăng ƀing čơđai hrăm mă pô. Hơdôm čô čơđai anai lĕ amra hơmâo pel ĕp hăng lăng ba pơtô ba hơjăn lơ̆m dưi pơtô hrăm ƀơi anăp”.

Anai jing thun tal 3 anom bruă pơtô hrăm pok pơhai pơtô hăng hrăm lăng nao rai amăng tivi amăng mông glăk hơmâo klin Covid-19, samơ̆ hơdôm tơring lêng lăi, ƀu dưi pơphun pơtô na nao amăng internet ôh, yua dah amra bơbeč djơ̆ anŏ rơgơi mơng ƀing čơđai, tơlơi suaih pral hăng pran jua ƀing čơđai, biă ñu lĕ anih muai hăng gưl sa. Bruă čơđai hrăm amăng internet ăt ngă glêh tơnap kơ sang anŏ mơn yua dah sang anŏ khŏm blơi măi mok pioh hrăm mơng ataih amăng hrơi mông tơlơi bơwih ƀong tơnap yua hơmâo klin. Biă ñu, hơdră bruă anai tơnap biă, đah ƀu dưi ngă ôh ƀơi hơdôm kual čư̆ siăng, anih tơlơi bơwih ƀong huă mơnuih mơnam dŏ bưp lu tơnap tap. Yua hnun, lu tơring rơkâo anom apăn bruă kơsem lăng, djru tlâ̆o brơi vaccine kơ ƀing nai hăng ƀing čơđai hlâo. Ơi Vũ Đại Thắng, Khua git gai Ping gah tơring čar Quảng Bình lăi tui anai:

“Klin Covid-19 ăt dŏ kơtang na nao đôč, ƀing ta glăk pơphun tlâ̆o vaccine kơ abih bang mơnuih. Ƀing gơmơi lăp đing nao hloh lĕ brơi bruă hrăm mơng čơđai amuñ, gêh gal jing ƀing ta khŏm jŭ yap kơ bruă hơmâo jơlan hơdră vaccine pioh kơ ƀing čơđai sang hră, biă ñu lĕ čơđai hrăm gưl 3”.

Klin Covid-19 hăng tơlơi lar hyu hŭi rơhyưt amăng thun 2020 hăng 8 blan thun 2021 ăt bơbeč mơn kơ bruă pơtô hrăm phrâo ƀơi lu tơring čar, biă ñu lĕ tơlơi tơnap amăng bruă brơi prăk kăk tuh pơ plai gơnam pioh pơtô hrăm. Ƀơi mông jơnum abih bang klah čun thun hrăm phrâo rơgao hăng pok pơhai bruă mă amăng thun hrăm phrâo mơng Anom bruă pơtô hrăm phrâo anai, sa, dua tơring čar, ƀon prong rơkâo kơ hơdôm anom bruă wai lăng, sem lăng tŏng ten, kơdun glăi dong hơdră pơtô hrăm phrâo hăng anih 10. Ơi Nguyễn Đức Trung, Khua Jơnum min mơnuih ƀon sang tơring čar Nghệ An rơkâo:

“Rơkâo Ding jum pơtô hăng pơjuăt sem lăng, lăi pơthâo glăi hăng pơtŏng glăi bruă kơdun glăi dong bruă pơtô hrăm tui hơdrôm hră anih 10 thun 2022-2023 jing hơdai ngă amăng thun hrăm 2025-2026 yua dua mơta tơlơi. Tal sa lĕ mông anai klin Covid-19 yua hnun tơring čar aka ƀu dưi pơhlôm hơmâo mơnuih prăp lui, biă ñu lĕ čih pơkra hơdrôm hră pơtô, giong anun dong pơtô ƀing nai, tơlơi anai jing tơnap biă. Tal dua, kiăng pơhlôm ngă dưm kơnar amăng thun anai ƀing ta pơphun ngă jơlan hơdră pơtô hrăm hơdrôm hră anih 6, đah mơng truh 3 thun dong ƀing ta ngă tui hơdră hrăm phrâo ƀơi anih 10 dưi hloh, dưm kơnar hloh”.

Yă Nguyễn Thị Quyên Thanh, Kơ-iăng khua Jơnum min mơnuih ƀon sang tơring čar Vĩnh Long lăi:

“Čơđai sang hră anih 9 thun anai nao hrăm amăng hrơi glăk hơmâo klin kơtang. Lơ̆m ƀing ta ba tơbiă không pơtô hrăm hơdôm tơlơi yôm phun ngă atur, jing jơlan hơdră pơtô hrăm ră anai, tui anun thun tơdơi lơ̆m ƀing čơđai kiăo tui hơdră pơtô hrăm phrâo lĕ ƀing čơđai dưi hrăm, dưi kiăo tui tơlơi hrăm phrâo mơn hă ƀŭ. Ƀing gơmơi rơkâo Ding jum pơmin glăi, sem lăng tŏng ten, yua dah tơlơi dưi ƀing čơđai mơng ƀing čơđai sang hră kơ anŏ klă, tơlơi rơgơi lơ̆m ngă tui jơlan hơdră pơtô hrăm phrâo, mơng anun hơmâo tơlơi pơmin tŏng ten, laih anun rơkâo kơ Khua git gai pơ ala mơnuih ƀon sang dêh čar pơplih ƀudah pơkra ming tơlơi pơtrun mrô 51”.

Mah thâo laih amăng hrơi mông lŏn ia ta glăk tơnap yua klin Covid-19 ngă, lu bruă aka ƀu dưi pơsir mơtăm ôh, samơ̆ kiăng biă hơdôm anom bruă, gong gai hăng anom bruă pơtô hrăm tơring čar, ƀon prong ĕp hơdră pơsir brơi tơlơi tơnap kiăng ƀing čơđai dưi nao hrăm hră tañ amăng anih hơdip rơnuk rơnua klin kheng laih anun “hơdip hrŏm” hăng klin sui thun./.

Minh Hường VOV1: Čih - Siu H’Mai: Pơblang