VOV4.Jarai-Thun hrăm phrâo 2021-2022 giăm laih, samơ̆ klin kheng ăt ƀă hyu tơnap tap biă mă ƀơi lu tơring čar, ƀôn prong hơmâo pơkra hơdră pơtô hrăm pơdah amăng plang internet. Hăng čơđai sang hră gưl dua, gưl klâo juăt thâo laih hơdră hrăm hră tui plăng internet. Samơ̆ ƀing čơđai anih 1, čơđai sang hră gưl sa, lu amĭ ama čơđai ăt bơngơ̆t mơ̆n kơ sa hơdră ngă phrâo, blung a kơ ană bă gơñu pô.

Kiăng thâo hluh rơđah hloh anŏ bơbeč sat mơ̆ng klin kheng ngă kơ čơđai sang hră anih sa laih anun hluai tui tơlơi pơtô mơ̆ng Ding jum Pơtô hăng pơjuăt, pô čih tơlơi pơhing Gong phun jua pơhiăp Việt Nam hơmâo bưp ră ruai hăng ơi Thái Văn Tài, khua anom bruă wai lăng gah bruă pơtô hrăm gưl sa, Ding jum Pơtô hăng Pơjuăt.

-Ơ ơi, klin kheng Covid 19 hlăk ƀă hyu tơnap tap biă mă pơ djop tơring čar, ƀôn prong. Hơdôm boh tơring čar, ƀôn prong pơsit hrơi blan nao pơ sang hră thun phrâo lơ 1/9,  hơdôm tơring čar, ƀôn prong dŏ glăi khom pơhrơ̆i glăi hĭ hrơi nao pơ sang hră yua aka ƀu gêh găl ôh, klin kheng Covid 19 kơtang đơi. Rơkâo kơ ih brơi thâo akŏ bruă thun hrăm phrâo kơ čơđai sang hră gưl sa, boh nik ñu čơđai sang hră anih 1 bơbeč djơ̆ tơlơi anai hiư̆m lĕ?

-Ơi Thái Văn Tài:  Amăng hơdră čih dăp tơlơi pơtô hrăm thun blan hrăm hră mơ̆ng Ding jum Pơtô hăng Pơjuăt hơmâo pơmin nao laih kơ hrơi blan thun hrăm anai hăng gưl sa laih anun anih 1 hiư̆m pă. Kơnong hơjăn gưl sa djop tơring čar pơmin mă dăp hơdră phara tui hluai tơlơi gêh găl. Tơlơi dưi mơ̆ng Jơnum min mơnuih ƀôn sang tơring čar dưi mơ̆n brơi nao pơ sang hră hrơi blung a laih anun pơđut hrơi thun hrăm, amăng hrơi blan pleh ploh tañ hăng kaih hloh pơkă hăng hrơi pơkă abih bang lĕ 15 hrơi.

Ơi Thái Văn Tài, Khua anom pơtô hrăm gah gưl sa, Ding jum Pơtô hăng Pơjuăt

Tui anun, hăng hrơi blan djơh anun, djop tơring čar pơsit mă hrơi brơi čơđai sang hră nao pơ sang hră tui hrơi blan rơđah rơđong, ƀơi anŏ hrơi pơkă nao sang hră tui hluai kơ rĭm sang hră phara soh. Hơdôm anih hlăk hơmâo klin, ƀing ta khom gleng nao kơ bruă pơgang tơlơi suaih pral hăng rơnuk rơnua kơ čơđai sang hră blung hlâo. Yua kơ anun, hăng ƀing čơđai anih sa lĕ rơngiao kơ kiăng hmao hăng hơdră pơtô hrăm phrâo, biă mă ñu čơđai anih sa jing ƀing ta khom gleng nao tong ten hloh dơ̆ng mơ̆ng hơdră pơtô, lăng ba, kiăng hơđong pran jua, yua gơñu aka ƀu thâo ngă tui ôh hơdră hrăm phrâo mơ̆ng hơdră pơtô gưl muai, đĭ nao pơ gưl sa hơmâo tơlơi bơblih phara biă mă.

-Kah hăng ih lăi anun, ƀing čơđai sang hră anih 1 lĕ yôm phara biă mă. Gơñu bơblih anih hrăm hơdră hrăm mơ̆ng gưl muai đĭ nao pơ gưl sa samơ̆ hơdôm tơring čar bơbeč yua klin Covid 19 anun yơh aka ƀu dưi nao sang hră hăng ƀing nai pơtô  ƀing gơñu pơ sang hră. Tui anun, Ding jum hơmâo hơdră hơgĕt đing nao kơ čơđai sang hră anih sa thun hrăm anai?

-Ơi Thái Văn Tài:  Kơ tơlơi pơtô hrăm, ƀing ta hơmâo ngă hră pơtô brơi pơkra hơdră ƀơi djop sang hră, akŏ bruă thun hrăm hră. Hăng ƀing nai pơtô lĕ, khom čih dăp hơdră tơlơi pơtô, đing nao kơ anih 1 brơi prăp lui totng ten hơdôm tơlơi hrăm ngă atur phun kah hăng tơlơi hrăm Tiếng Việt, tơlơi hrăm Toán. Bơ hơdôm tơlơi hrăm pơkŏn lĕ ƀing ta pơgôp hrom, dăp hơdră ngă hiư̆m pă pơhrŏ ƀiă mông hrăm, kiăng pioh lu mông kơ tơlơi hrăm phun ngă atur kiăng thâo kjăp pơ anăp adih.

Sa tơlơi pơtrun dơ̆ng khom ngă, ƀing ta mơneč mă hrơi mông yôm juăt mông mah pioh pơtô kơ čơđai sang hră hrăm anih sa. Tơdah klin kheng ăt dŏ sui đôč, čơđai sang hră ăt dŏ na nao pơ sang, hrăm pơ sang đôč ƀing ta khom ngă tui hơdră anăp nao tui anai “ƀu nao pơ sang hră tŭ mơ̆n samơ̆ ƀu pơdơi hrăm hră ôh”. Laih anun hăng čơđai sang hră anih 1, anih 2 khom ngă tui  hơdră pơtô ñu amuñ ƀiă, brơi mă yua boh thâo ia rơgơi tơlơi pơhing plang internet amuñ kơ amĭ ama čơđai sang hră čơđai sang hră phrâo hrăm laih anun dưi ngă tui na nao hlong juăt hĭ hơdră hrăm tui anun.

Djru ba jăng jai đôč mơ̆n kiăng kơ čơđai hor hrăm hră anăm lui raih hĭ ôh tơlơi hrăm hră hăng hơdôm mơta tơlơi hrăm ngă atur phun.

-Ƀơi anăp klin kheng ngă tơnap hrup anai, him lăng čơđai sang hră khom hrăm mơ̆ng ataih yơh, hrăm amăng tivi tui plang internet đôč ƀu dưi pơtum pơ sang hră ôh. Samơ̆, hrăm mơ̆ng ataih hăng čơđai sang hră gưl sa tơlơi anun tơnap biă mă. Ding jum Pơtô hăng Pơjuăt hơmâo tơlơi pơtă pơtăn hơgĕt kơ djop tơring čar, boh nik ñu hơdôm anih tơnap tap dŏ kơƀah gơnam yua boh thâo tơlơi pơhing internet anai?

-Ơi Thái Văn Tài:  Ding jum Pơtô hăng Pơjuăt hơmâo čih pơkra hơjai tơlơi pơtô hrăm 51 sa mơta phun dưm dưm hăng 51 akŏ tơlơi hrăm pơdah amăng tivi laih anun pok amăng plang internet facebook, brơi čơđai sang hră dŏ pơ sang mă yua 51 akŏ tơlơi hrăm anai, dưi mă yua brơi djop hơdrôm hră hrăm pơkŏn. Laih anun ƀing nai pơtô, sang hră kiăng pơtô brơi kơ ƀing amĭ ama čơđai sang hră amăng hrơi blan dŏ pơ sang khom pơtrut ană bă hrăm Tiếng Việt tui hơdră boh thâo ia rơgơi anai.

Sit mơ̆n amra ƀơk hră čih pơtă, ƀudah pơčrông nao rai hăng hơdôm anih amăng plơi pla kiăng pơtrut čơđai sang hră hrăm na nao pơ sang ƀu pơdơi ôh. Laih anun ƀing ta thâo laih mơ̆n, tơdah pok pơhai klă amuñ anai lĕ tơlơi gêh găl djru kơ čơđai hrăm mă hơjăn thâo pơmin, kơsem hơduah tơlơi thâo gơñu pô hăng ngă hrom ƀing amĭ ama čơđai sang hră lir hơbit klă hloh hăng ƀing ta.

Klah čun glăi ƀing ta mơneč mă mông yôm phăn tă lăi mông mah đing nao kơ čơđai sang hră anih 1, anih 2. Tơdah hơmâo tơlơi phara biă mă, tuhmu kual pơpă thơ ngă ƀu djơ̆ hăng hrơi blan pơkă, hrăm ƀu giong ôh hơdră pơtrun kơ abih bang tơlơi hrăm hră amăng sa thun, khom lăi pơthâo hăng Ding jum Pơtô hăng Pơjuăt hâo, brơi pơhrơ̆i dơ̆ng hrơi blan pơtô hrăm khom ngă giong tơhnan pơkă.

Ƀing ta gleng nao boh tŭ yua, gleng nao kơ hnơr thun, ƀu dưi ngă tŭ kơ hơmâo sa hnong laih anun anăm ngă tui hăng măi mok ƀu thâo ƀư̆ pơkra đĭ trun tơdun čơtăng kiăng găl kơñ bơbeč truh boh tŭ yua hăng tơlơi pơmin pran jua hrăm hră mơ̆ng ƀing čơđai sang hră.

-Hai, bơni kơ ih ơi Thái Văn Tài, Khua anom bruă Pơtô hrăm gah gưl sa, Ding jum Pơtô hăng Pơjuăt hơmâo pioh mông bơ ră ruai anai.

 Nay Jek: Pơblang