VOV4.Jarai -  Mơguah lơ 5/10, ƀơi Hà Nội, Ding jum sĭ mơdrô gum hrom hăng Anom kơsem min bruă anăn gơnam sĭ mơdrô hăng bơkơtưn pơphun “Jơnum klah čun tô nao rai pơtrut pơđĭ kyar bơwih ƀong”. Bruă jơnum kiăng pok pơhai dong jơlan gah pơsir djru bruă ba hyu, sĭ blơi gơnam tam kơjăp, ba glăi bôh tơhnal kiăng lu hloh hơdôm jơlan pơsir phun, hmâo akô̆ tlôn hmâo tơhnal sui thun pơ̆ anăp anai. Yua bơdjơ̆ nao mơng klin Covid-19, hơdôm bruă sĭ mơdrô gơnam, sĭ mơdrô, pơtrut sĭ mơdrô... hơdư̆ hĭ. Prăk pơhrui glăi mơng gơnong bruă tuai čuă ngui, anih anom sĭ gơnam ƀong huă leng kơ hrŏ trun lu, mơnuih ƀôn sang hruă kơjăp bruă blơi yua. 9 blan thun anai abih bang rơnoh sĭ hyu raih daih  gơnam tam hăng prăk pơhrui glăi hrŏ trun 7,1% pơhmu hăng thun hlâo. Amăng mông Jơnum, ƀing juăt bruă ăt pơblang mơn hơdôm tơlơi tơnap, bơdjơ̆ nao prong mơ̆ bruă bơwih ƀong Việt Nam glăk bŏng glăi, hrom hăng anun hơdôm hơdră bruă djru gum mơng Kơnuk kơna hăng hơdôm tơlơi gir run mơng anom bơwih ƀong amăng bruă ngă juăt hăng tơlơi pơplih bruă sĭ mơdrô kiăng pơtrut pơđĭ kyar bơwih ƀong./.

Siu H’ Prăk: Pô pơblang