VOV4.Jarai - Ayong Y Pôt Niê, tơkeng thun 1988 lĕ, Khua Sang bruă bơwih ƀong mơnuih ƀôn sang Êđê Cafe, ƀơi ƀôn Kla, să Drai Săp, tơring glông Krông Ana, tơring čar Daklak. Sang bruă bơwih ƀong mơnuih ƀôn sang Êđê Cafe hmâo čơkă mă anăn “Top 10 anăn sĭ mơdrô, anăn păn hmư̆ hing thun 2019”. Lom tơlơi klin ruă Covid-19 ngă tơnap samơ̆ Êđê Cafe ăt ƀu hmâo pơplih lu mơn amăng tơlơi hơđong phrâo. Ră anai, lu bơnah gum hrom mơng dêh čar tač rơngiao kĭ pơkôl hră gum hrom, ba anăn Êđê Cafa nao pơ̆ dêh čar tač rơngiao. Ayong Y Pôt Niê lăi pơthâo hơdôm bruă mă mơng anom bơwih ƀong tui tơlơi bơră ruai ƀơi yŭ anai.

-Ơ ayong! Amăng tơlơi klin Covid-19 ngă tơnap, Sang bruă Êđê cafe hmâo ngă juăt hiưm hơpă?

Anh Y Pôt Niê: “Amăng thun 2019, phrâo pơdŏng samơ̆ kơmlai mơng ƀing gơmơi năng ai ñu 900 klăk prăk, truh thun 2020 năng ai ñu 1 klai prăk. Truh thun anai pơhrui hmâo mơng ƀing gơmơi hrŏ trun lu biă, ƀu truh 500 klăk prăk. Blung hlâo, ƀing ta ƀuh Covid-19 bơdjơ̆ nao abih bang djop mơta mơng tơlơi hơdip mơda, ƀu djơ̆ kơnong kơ hơdôm anih anom pla pơkra ôh. Klin ruă bơdjơ̆ nao lu sang bruă bơwih ƀong sĭ mơdrô, ƀu djơ̆ kơnong kơ ƀing gơmơi. Ƀu djơ̆ yua kơ anun mơ̆ kơdun glăi. Ƀing gơmơi jai gir run hloh dong. Bơ̆ hăng sang bruă ƀing gơmơi yua kơ hơdôm bôh rơdêh pơgiăng hăng sang dăng kông pơdơi mơn. Ƀing gơmơi đing nao sĭ tui jơlan facebook hăng tui Tiki hăng Shopee, livestream ƀơi facebook, Zalo. Hơdôm mơnuih blơi ƀơi djop anih anom ăt iâu telephone mơn kơ ƀing gơmơi pioh blơi dong kơ phê mơng Êđê’s cafe. Ƀing gơmơi hmâo bơkơtuai nao rai hăng dăng kông hăng dưi mơ-ĭt hmâo 5kg rim wot mơ-ĭt. Ƀu dưi mơ-ĭt kah hăng hlâo kơ hmâo klin ôh. Ƀing gơmơi juăt sĭ tui anun. Rim hrơi sĭ hmâo năng ai ñu mơng 30-50 kg hăng lu hloh”.

Ayong Y Pôt Niê ƀơi măi hna mah kơ phê

 -Hai! Klin ruă Covid-19 bơdjơ̆ nao bruă bơwih ƀong hrom, samơ̆ amăng hơdôm hrơi anun, Êđê Cafe hmâo sĭ sa dua mơta kơ phê kah hăng kơ phê sầu riêng, kơ phê hơbơi bua. Tơlơi hơget hmâo ba truh kơ ih hơdôm tơlơi pơmin tui anun?

Ayong Y Pôt Niê: “Bôh nik ñu, kâo hmâo tơlơi pơmin mix kơ phê hăng djop djuai anai sui laih. Năng ai ñu kâo lĕ djuai ania Êđê hlăk ai khin hơtai pơdŏng sang bruă sa ding kơna. Kâo mơ-ak biă hăng kiăng ƀing hlăk ai ư-ang hăng hrăm tui, pơđĭ kyar hloh dong yua kơ kâo ƀuh djuai ania pô dô̆ tui tơlơi kơƀah tơnap kah hăng bôh thâo amăng tơlơi hơdip mơda, hrăm hră... Dua lĕ, kâo ƀuh, lu mơnuih tha rơma mơñum kơ phê djong along kơ phê, kơ phê tui anun jơman samơ̆ bơdjơ̆ nao tơlơi suaih pral kah hăng tơtăng ară drah. Anun kâo kiăng pơkra rai kơ phê djơ̆ hăng tơlơi suaih pral mơng mơnuih tha rơma, kâo pĕ bôh sầu riêng, kâo lông lăng phang krô hăng klai hăng kơ phê ƀuh ñu jơman biă. Kâo mă kơ phê Robusta klai hăng ƀơƀiă sầu riêng, sik, ia tơsâu rơmô, tui sa hơdră pơkă pha ra. Truh ră anai jing laih anăn pha ra dưi hmâo arăng ruah blơi klă biă. Kâo mơ-ak niă yua kơ tơlơi anai”.

Thun 2022 Êđê Cafe gir run dong sĭ kơ phê kơ dêh čar tač rơngiao

-Pran pơtrut hơpă djru ih đăo gơnang yak rơgao djop tơlơi tơnap pioh hrưn đĭ truh kih?

Ayong Y Pôt Niê: “Ƀing ta ƀu thâo hlâo ôh hrơi pơgi hiưm ñu. Samơ̆ Êđê Cafe ƀing gơmơi gir run na nao kiăng juăt hăng djop tơlơi truh. Gir run hrăm tui, hyu hơduah ĕp, hmâo hơdôm tơlơi pơčeh phrâo, pơčeh rai hơdôm gơnam phrâo ba hyu sĭ kiăng pơhư̆č mơnuih blơi yua đăo gơnang kơ phê mơng sang bruă pô. Êđê Cafe phrâo pơdŏng đôč samơ̆ gir run amăng djop bruă, amăng tơlơi gir run hmâo tơlơi truh kih, tơlơi truh kih ba glăi tơlơi klă hiam, anun lĕ bôh tơhnal klă mơng sang bruă ƀing gơmơi. Lom kâo phrâo pơdŏng neh wa amăng ƀôn nao mă bruă pơ̆ Bình Dương hăng hơdôm bôh ƀôn prong pơprong lu biă. Samơ̆ lom klin ruă ngă gluh đĭ gơñu pơwot glăi plơi pla, kâo ngă gal brơi kơ djop mơnuih gum hrom mă bruă. Ră anai hmâo 10 čô mơnuih  Ƀôn Kla mă bruă hrom sit nik hăng Êđê Cafe. Rơngiao kơ anun, dô̆ hmâo hơdôm mơnuih mă bruă tui bơyan, pĕ kơ phê ƀudah bơwih brơi phun kơ phê ăt hmâo mơn mơng 20-30 čô mơnuih. Kâo tla prăk blan 200.000 prăk sa čô mơnuih sa hrơi. Ƀing gơmơi čơkă na nao neh wa mă bruă hrom kiăng hmâo prăk pơhrui glăi dong”.

-Pơ̆ anăp anai, ih hmâo hơdôm tơlơi pơmin hơget, kơčăo bruă, bôh than ñu hiưm hơpă kiăng pơđĭ kyar Êđê cafe?

Ayong Y Pôt Niê: “Dong mơng ră anai, kâo hmâo laih hơdôm kơčăo bruă rơđah rơđông amăng thun 2022. Bôh than prong mơng kâo lĕ sĭ kơ dêh čar tač rơngiao. Kâo hmâo ngă hră gum hrom hơdôm jơlan hơdră Amazon, Alibaba. Anun lĕ sa amăng hơdôm bruă sĭ gơnam lu hloh kơ dêh čar tač rơngiao. Kâo hmâo kĭ pơkôl gum hrom pioh sĭ gơnam kơ dêh čar tač rơngiao amăng jơlan hơdră Amazon hăng Alibaba amăng sa thun ƀiă hloh lĕ 10 tơn tơpung kơ phê. Lom gum hrom hơdôm jơlan hơdră anai kâo hmâo dong tơlơi hrăm tui, tơlơi găn rơgao lĕ tơlơi yôm phăn hloh. Kâo ngă djop mơta bruă hăng tơlơi gir run, ƀu pơdơi. Amăng thun phrâo, kâo čang rơmang abih bang djop mơnuih gum hrom mă bruă hăng kâo ƀơi sang bruă hăng abih bang neh wa ƀơi ƀôn lan suaih pral. Amăng tơlơi klin ruă thâo pơgang drơi pô hăng plơi pla. Drơi pô kâo amra pơdŏng hơdôm kơčăo bruă rơđah rơđông hloh dong kiăng hmâo tơhnal pơkă sĭ kơ dêh čar tač rơngiao. Ƀing gơmơi mă bruă amăng tơlơi mơ-ak. Čang rơmang amăng thun phrâo amra pơđĭ kyar pơhư prong sang măi, măi mok, lu mơnuih blơi yua amăng lŏn ia, dêh čar tač rơngiao blơi kơ phê, kiăng djru neh wa plơi pla pô hmâo dong prăk pơhrui glăi”.

-Hai, bơni kơ ih hŏ!  

Zawut: Čih – Siu H’ Prăk: Pơblang