VOV4.Jarai - Hơdôm thun giăm anai, lu mơnuih apăn bruă, tơhan wai lăng glai rưng ƀơi hơdôm tơring čar kual Dap kơdư rơkâo pơdơi bruă. Yua anun lu anih anom glăk kơƀah mơnuih wai lăng glai rưng. Mrô mơnuih rơkâo pơdơi bruă jai hrơi lu tui ngă kơ bruă wai pơgang glai kyâo tơnap tap laih ră anai jai glêh tơnap tui. Lơ̆m anun, bruă pơtô hrăm brơi mơnuih mă bruă phrâo ƀơi kual Dap kơdư ră anai ƀu hơmâo mơnuih kiăo tui hră dong tah, yua anun kơƀah mơnuih wai lăng, pơđĭ kyar glai rưng mơng anai pơ anăp jai hrơi lu tui, amra ngă tơnap tap brơi bruă wai pơgang - pơđĭ kyar glai rưng.

Dong tong krah glai kyâo arăng phă, čuh pơrai, ƀơi Tiểu khu 704, să Čư̆ Bông, ơi Nguyễn Phi Tiến, Kơ-iăng khua kông ti wai lăng glai Ea Kar, tơring čar Daklak brơi thâo, anai lĕ sa amăng hơdôm anih glai kyâo mơng kông ti arăng phă amăng thun anai. Hlâo anun, lơ̆m djop 27 čô mơnuih mă bruă, bruă wai pơgang glai kyâo ăt bưp tơnap tap mơn, ră anai hơmâo 9 čô mơnuih pơdơi bruă laih, 9 čô pơkŏn dong glăk ngă hră pơ-ar rơkâo pơdơi bruă, bruă anai jai ngă tơnap tap tui. Amăng tơlơi gir run ĕp mơnuih pơhrua mă bruă dong, kông ti hơmâo pơtrun gưl hrăm dưi mut mă bruă lĕ ƀing hrăm trung cấp gah wai lăng glai rưng, samơ̆ ăt ƀu hơmâo mơnuih mut nao mă bruă lơi, yua kơ bruă mă glêh tơnap samơ̆ prăk apah dŏ aset:

“Ră anai glăk bưp tơnap tap, kông ti nao mă bruă na nao mơ̆ hơdră djru brơi adơi ayong ăt dŏ aset mơn. Pơhmutu prăk apah brơi mơnuih mă bruă hrăm gưl trung cấp ră anai giăm 3 klăk 200 rơbâo prăk đôč, mơ̆ lơ̆m nao mă bruă pơ kual mrô 704, prăk ƀong huă abih 1 klăk laih, aka ƀu yap wŏt prăk tuh ia săng nao rai. Mrô prăk apah aset đơi, ƀu pơhlôm brơi tơlơi hơdip mơda”.

Sa amăng hơdôm kual lŏn glai yua kơ Kông ti wai lăng glai Ea Kar arăng phă

Ăt glăk kơƀah mơnuih wai lăng glai rưng mơn lĕ kông ti wai lăng glai Krông Bông, tơring glông Krông Bông. Ơi Bùi Quốc Tuấn, Khua kông ti brơi thâo, amăng 1 thun anai, 20% mrô mơnuih wai lăng glai rưng mơng kông ti pơdơi bruă laih. Lơ̆m anai lĕ kual hơmâo lu mơnuih đuăi hyu dŏ hơdơ̆ hor, mrô mơnuih phă glai kyâo yua kông ti wai lăng ƀuh lu biă mă. Kiăng kơ pơgăn hĭ, ơi Tuấn brơi thâo Kơnuk kơna kiăng kơ hơmâo hơdră djru, đĭ ƀiă prăk apah kơ tơhan wai lăng glai rưng, hrŏm hăng kah brơi lŏn pơdong sang, lŏn ngă đang hmua kơ mơnuih ƀon sang kiăng kơ plai ƀiă ƀuh mơnuih phă glai kyâo.

“Djru brơi lŏn pơdong sang, lŏn ngă hmua kơ mơnuih ƀon sang lĕ tơlơi kiăng sit nik ră anai, samơ̆ anom bơwih ƀong sĭ mơdrô aka ƀu dưi ngă ôh. Ăt rơkâo gưl gong gai, djop gơnong bruă đing nao. Dua dong, ƀing mơnuih wai lăng glai ƀu hơmâo kơdrưh kiăng gơnang nao ôh, yua anun kiăng kơ lăng glăi tong ten dong mơng anom bruă, gơnong bruă, kiăng djru amăng bruă wai pơgang glai klă ƀiă dong”.

Ƀu djơ̆ kơnong ƀơi hơdôm kông ti wai lăng glai đôč ôh, mơ̆ ƀơi hơdôm anom bruă wai lăng glai rưng, anih wai pơgang đang glai dêh čar hăng khul grup wai lăng glai, ƀơi Daklak lăi phara, hăng kual Dap kơdư hnun mơn, lu mơnuih apăn bruă ăt rơkâo pơdơi bruă. Ơi Nguyễn Quốc Hưng, Khua anom bruă wai lăng glai rưng tơring čar Daklak brơi thâo, kơnong amăng anom bruă wai lăng glai rưng thun anai hơmâo truh pơ 13 čô mơnuih rơkâo pơdơi bruă. Lu hloh pơhmu hăng hlâo anun. Tơlơi ngă hning dong lĕ đa hơmâo mơnuih ngă mă ƀu pơgiong bruă kiăng kơ tañ pơdơi bruă, tơhan wai lăng glai rưng hlâo anun kơƀah laih ră anai jai bưp tơnap tap tui:

“Phrâo kĭ brơi pơdơi bruă kơ lu mơnuih, biă mă ñu bruă mă glêh tơnap đơi, mơ̆ mă bruă ƀu kjăp arăng amra lăi mơtăm. Thun anai sa čô mơnuih apăn bruă ƀơi anom bruă Krông Ana ngă mă ƀu pơgiong bruă kiăng kơ tañ pơdơi bruă, bruă wai lăng glai glêh biă mă. Jơnum lăng glăi bruă mă rơnuč thun pơphun lăng glăi hăng lu tơlơi hning rơngŏt mơn, yua kơ lu mơnuih pơdơi bruă laih.”

Ƀing tơhan wai lăng glai pơdơi bruă, ƀing kiăo tui hrăm ăt hrŏ trun kơtang

Bruă wai lăng glai rưng ƀu pơhưč lu mơnuih dong tah, bruă pơtô hrăm brơi mơnuih mă bruă ƀơi kual Dap kơdư ăt bưp tơnap yua ƀu hơmâo hlơi ôh kiăo tui hrăm. Nai prin tha Nguyễn Thanh Trúc, Khua sang hră gưl prong Tây Nguyên brơi thâo, pơtô brơi mơnuih wai lăng glai rưng hlâo adih lĕ sa amăng hơdôm tơlơi pơtô hrăm hơmâo lu mơnuih kiăo tui hrăm hăng giăm 300 čô čơđai hrăm, hăng ƀing nai tha prin, kơ-iăng nai tha prin, nai prin tha thâo rơgơi pơtô brơi mơng gưl prong truh pơ tơdơi kơ gưl prong. Samơ̆, ră anai bruă pơtô brơi mơnuih wai lăng glai rưng amăng sang hră kơnong dŏ giăm 100 čô čơđai kiăo tui hrăm, hrŏ trun giăm 70% pơhmu hăng 10 thun hlâo anun. Amăng anun, tơlơi hrăm gah “wai lăng glai rưng hăng ayuh hyiăng” jing pơdơi hĭ yơh yua kơ ƀu hơmâo čơđai hrăm. Tui hăng nai prin tha Nguyễn Thanh Trúc, gah tơlơi hrăm wai lăng glai rưng ƀu pơhưč lu mơnuih kiăo tui hrăm yua kơ bruă mă glêh tơnap, prăk apah aset đôč, hơdră djru aka ƀu hơmâo, kiăng kơsem min pơplih pơkra glăi dong.

“Blung hlâo lĕ tơlơi lăng nao mơng mơnuih mơnam, anai lĕ bruă mă yôm phun kiăng wai pơgang ayuh hyiăng rơhuông adai, wai pơgang glai rưng ƀơi kual Dap kơdư. Lơ̆m ƀuh rơđah tơlơi yôm amăng bruă anai, ƀing ta kiăng đing nao lu dong, hơmâo lu hơdră djru kiăng pơhưč, bong glăi laih dong ngă gêh gal kiăng mơnuih mă bruă hơđong pran jua mă bruă sui thun djru wai pơgang glai kyâo”.

Ƀing mơnuih wai lăng glai rưng pơdơi bruă, ƀing čơđai mut hrăm ăt pơhrŏ trun kơtang, tơlơi anai ngă kơ kyâo glai amăng kual Dap kơdư jai tơnap wai pơgang. Pơgi kơdih anai glai rưng amra hiưm pă ñu, tơlơi anai tui hluai tơlơi đing nao mơng gơnong glông hăng ƀon lan kơ tơlơi yôm mơng kyâo glai ƀơi ƀon lan; hrŏm hăng anun lĕ hơdră djru brơi lăp djơ̆.

Siu Đoan: Pơblang