VOV4.Jarai-Lơ 8/7, Khua tơhan pơgang guai dêh čar tơring Dak Nông Jơnum pơƀut bruă mă pơgang guai dêh čar 6 blan akŏ thun 2021. Tui hăng khua git gai ling tơhan pơgang guai dêh čar tơring čar Dak Nông, mơkrah thun anai, tơlơi rơnuk rơnua ƀơi guai dêh čar ăt hơđong mơ̆n; bruă pơgăng sĭ mơdrô dŏp, mut tơbiă ča čot hăng pơgang klin Covid 19 ngă tui tŭ yua.

 Hrom hăng bruă pơgang tơlơi rơnuk rơnua, ngă pô guai dêh čar, ling tơhan pơgang guai dêh čar tơring čar Dak Nông dŏ djru mơnuih ƀôn sang ƀơi guai dêh čar 1.250 hrơi bruă, djru mơnuih ƀôn sang pơkra giăm 6 km jơlan plơi pla, pơkra ming glăi 6 boh sang kơ sang anŏ tơnap tap hloh.

Khua tơhan pơgang guai dêh čar tơring čar Dak Nông brơi thâo, pơ anăp anai, tơhan pơgang guai dêh čar ăt kơtưn bruă pơtô pơblang, jak iâu mơnuih ƀôn sang amăng kual giăm guai dêh čar ƀu dưi gum tơngan pơdŏp brơi ƀing mut tơbiă ča čot ƀơi guai dêh čar ôh.

Laih dơ̆ng, djop sang bruă, puih kơđông tơhan pơgang guai dêh čar ăt kơđiăng, jĕ giăm mơnuih ƀôn sang, kiăng mơnuih ƀôn sang djru lăi pơthâo tơlơi pơhing ƀing mut tơbiă ča čot ƀơi guai dêh čar Việt Nam.

Nay Jek: Pơblang