VOV4.Jarai-Tui hăng tơlơi jŭ yap mơ̆ng anom bruă ngă hmua, tơring čar Dak Lak hơmâo 62 ring bruă bơnư̆ pơkong ia răm kơtang kiăng ming pơkra glăi. Ƀơi anăp kơ tơlơi anai, bơyan hơjan hlim, ia ling dăo, djop anom bruă, tơring glông ƀơi Dak Lak hlăk ngă tui 4 mơta bruă sa anih kiăng prăp lui pơgang hơđong kơ  ring bruă laih anun pơgang rơnuk rơnua kual pơ tơkai ia gah yŭ bơnư̆ pơkong.

Mơ̆ng akŏ blan 9 truh ră anai, ring bruă bơnư̆ pơkong ia Êa Drăng, tơring kual Êa Drăng, tơring glông Êa Hleo, Dak Lak, khom pok pơhai ia na nao kiăng huăi ia blai bơnư̆. Ơi Nguyễn Văn Hiếu, Khua anom bruă kông ty sa ding kơna wai lăng bơnư̆ pơkong ia tơring čar Dak Lak ƀơi tơring glông Êa Hleo, brơi thâo, lăng tui bruă ngă mơ̆ng hlâo juăt ƀuh tơlơi răm bơnư̆ amăng bơyan hlim, ia ling dăo pơ kual gah tơkai thun 2013, yua kơ hnoh ia rô anet đơi, anun bơyan hơjan, anom bruă anai khom pơpha mơnuih mă bruă hrơi mlam pơblih nao rai kiăng pok ia, pơgang tơlơi rơnuk rơnua hơđong kơ mơnuih ƀôn sang tơring kual Êa Drăng.

Hnoh ia rô anet, dơnao bơnư̆ Êa Drăng khom pok pơhai na nao sit hơjan hlim

"Ring bruă bơnư̆ pơkong ia anai, hnoh ia rô hyu pơ anih yap boh prong ñu abih bang truh rơbêh 58 km karê, ia rô kơnong 1,217 klăk khô̆i, kơnang kơ anŏ pơkă lăng ayuh hyiăng hlim hơjan anom bruă pok pơhai ia, pơkă hnong brơi djơ̆. Ră anai, tơdah pok pơhai mơ̆ng 30-40 m3 sa tơnit lĕ amra lơ̆i kơtang, lip đang añăm pơtam mơnuih ƀôn sang, yua kơ anun lăng nao anŏ găl, anom bruă khom pok pơhai ia na nao kiăng ia rô hrŏ hĭ po tơkai adih, čơkă ia mơ̆ng hlao rô rai amăng bơnư̆ dơ̆ng, pơkă na nao hnun kah plai ƀiă ia rô kơtang ngă lip pơ kual gah tơkai".

Tui hăng tơlơi lăng sŭ ayuh hyiăng adai hơjan hlim, pơpha bruă mă mơ̆ng ƀing adơi ayong mă bruă krăo lăng ƀơi bơnư̆, hăng prăp lui 4 mơta bruă sa hnong, djop plơi pla, djop să, anom bruă wai lăng bơnư̆ pơkong ia tơring čar Dak Lak hlăk ngă tui hơdră pơgang hơđong, rơnuk rơnua kơ dơnao ia amăng bơyan hơjan hlim.

Dơnao bơnư̆ Pu Huê  ƀu hơmâo jơlan pok pơhai ia, ia ling ƀơi jơlan nao rai amăng să Êa Ktur, Čư̆ Êwi sit hơjan hlim

Ơi Trịnh Văn Quang, khua wai lăng ring bruă bơnư̆ pơkong ia dơnao Pu Huê, brơi thâo, bơnư̆ ia gơñu wai lăng hlong ngă jơlan rô nao rai ƀơi bơnư̆, jơlan nao rai amăng să Êa Ktur, Čư̆ Êwi, Êa Hu tơring glông Čư̆ Kuin, samơ̆ ƀu man pơkra ôh anŏ pơgang ia blai pioh pok pơhai ia. Tơlơi anai yơh ngă kơ bơnư̆ dơnao Pu Huê hŭi biă mă ƀu hơđong bơyan hlim ia ling dăo prong:

"Hnong ia pioh ƀôp hăng pok pơhai ia  tơdah blai hang pơ anai pơkra aka ƀu djơ̆ hnong pơkă ôh, kơ anŏ hơđong rơnuk rơnua ñu, anun yơh ƀu dưi pok pơhai abih ia sit rô blai hang, khom rô truh pơ jơlan nao rai mơtam anun yơh amra ƀu hơđong ôh hŭi biă mă kơ mơnuih găn rơgao nao rai ƀơi jơlan anun.

Sit truh bơyan hơjan hlim, gơmơi ngă tui tong ten djơ̆ hơdră pơsit laih, tơdah hơmâo tơlơi lăi pơthâo hlâo hơjan hlim lĕ mơ-it nao dua klâo čô mơnuih dŏ krăo ƀơi dua bơnah jơlan găn nao pơ bơnư̆ pơkong ia pioh pơčrâo brơi jơlan ƀudah pơkă hnong pok pơhai ia mơ̆ng bơnư̆, tơdah hơmâo tơlơi truh hơgĕt thơ ăt khom pơgang tơlơi rơnuk rơnua kơ mơnuih mơnam yơh blung hlâo.

Bơnư̆ pơkong ia ling nao mơ̆ răm hĭ, dơnao Phù Mỹ, tơring glông Êa Kar

 ƀu thâo pơkong ia dơ̆ng tah

Ăt čang rơmang pơ anăp anai, anom bruă kơnuk kơna kơsem min lăng pioh hơmâo hơdră man pơkra glăi tuh pơ alin pơgang tơlơi rơnuk rơnua hơđong kơ ring bruă bơnư̆ pơkong ia ăt kah hăng pơgang rơnuk rơnua jơlan glông kơ mơnuih ƀôn sang să rô nao rai".

Tui hăng hră lăi pơthâo mơ̆ng Gơnong bruă ngă hmua hăng pơđĭ kyar plơi pla tơring čar Dak Lak, đơ đam tơring čar hơmâo 785 ring bruă bơnư̆ pơkong ia, bruih djop kơ 262 rơbâo ha phun pla djop mơta, dưm dưm hăng 82% đơ đam phun pla kiăng ia bruih. Kiăng pơgang hơđong rơnuk rơnua amăng bơyan hơjan hlim, tơring čar brơi jŭ yap glăi, pơkra ming 18 boh ring bruă phun yôm, hŭi hơmâo tơlơi truh sat.

Khă tui anun, ră anai lu tơring glông dŏ hơmâo 62 boh ring bruă bơnư̆ pơkong ia răm tui, kiăng ming pơkra glăi tañ hăng rơnoh prăk truh kơ 360 klai prăk.

Rơ̆k čăo ƀiă gôm dơnao Êa Msen tơring glông Čư̆ Kuin, hŭi biă ƀu hơđong sit pok pơhai ia

Tui hăng ơi Nguyễn Thành Long, Khua anom bruă wai lăng bơnư̆ pơkong ia tơring čar Dak Lak, yua rơnoh prăk mơ̆ng tơring čar dŏ kơƀah, bruă pơkra ming glăi bơnư̆ pơkong ia anai lêng kơ rơkâo prăk mơ̆ng gơnong dlông adih djru, anun yơh bruă pơgang hơđong ring bruă bơnư̆ pơkong ia amăng bơyan hơjan ăt sa bruă ngă kiăng pok pơhai 4 mơta bruă sa anih, pơphun mơtam mơ̆ng kual plơi pla:

"Hăng hơdôm boh anom bruă wai lăng hăng mă yua bơnư̆ pơkong ia khom prăp lui rơnoh prăk pioh pơkra ming glăi, biă mă ñu hơdôm ring bruă răm laih hŭi ƀu hơđong kơ mơnuih mơnam khom ming pơkra glăi mơtam. Dua lĕ, amăng bơyan hơjan khom brơi mơnuih mă bruă hrơi mlam, tơdah pok pơhai ia lĕ khom lăi pơthâo hlâo kơ mơnuih ƀôn sang thâo.

Rơngiao kơ anun, khom pel ĕp na nao tơlơi pơhing rơnuk rơnua kơ ring bruă, lăi pơthâo hmao kru kơ khua mua gong gai kơnuk kơna ăt kah hăng Gơnong bruă đang hmua hăng pơđĭ kyar plơi pla hơmâo hơdră pơsir mơtam tơlơi truh tơdah hơmâo”.

Nay Jek: Pơblang