VOV4.Jarai - Pơhmao mă lơ̆m arăng dŏ bơrơjah nao rai rim hrơi lơ̆m ngă tui tơlơi pơtrun pơplih lŏn ƀơi tơring glông Čư̆ Prong, tơring čar Gia Lai hơdai nao pla kơsu (rơwang thun 2008-2010), sa dua anom bơwih ƀong koh drôm, gô̆ mă lŏn pioh pla kơsu ƀơi lŏn glai. Mah bruă anai hơmâo ngă amăng lu thun laih, samơ̆ aka ƀu thâo pô hlơi ôh pô pơphun, tơring čar Gia Lai aka ƀu thâo pơsir brơi ôh.

Ơi Nguyễn Anh Vũ, Khua wai lăng glai pơgang lŏn adai Ia Puch (tơring glông Čư̆ Prong) brơi thâo, 359,8 ektar glai rưng hơmâo sa, dua anom bơwih ƀong koh drôm, gô̆ mă lŏn mơng 9 kual glai (889, mơng 919 truh 924, kual glai 229 hăng 919A), glai rưng yua anom bruă wai lăng. Amăng anun 200 ektar lŏm glai hơmâo đang kơsu mơtah ƀlip, hiam biă, glăk amăng thun thâo kuah kơtăk laih. Tŏng ten ñu, đơ đam lŏn pla kơsu ƀơi anai phun ñu prong mơng 20 truh 30cm. Sui mơng anai 2 thun, amăng mông dŏ wai lăng kual lŏn anai, ƀing khua wai lăng glai hơmâo ƀuh hơdôm pluh čô mơnuih mơng tơring pơkŏn hơmâo arăng apah nao kuah kơtăk kơsu. Tui hăng ơi Vũ, tơlơi anai djru pô pla kơsu pơdŏp anăn ñu:

“Yap thun kơsu anai, gơmơi pơsit đang kơsu anai hơmâo pla mơng thun 2008-2021. Gơmơi hơmâo ƀuh mơnuih ƀon sang nao kuah kơsu, samơ̆ ƀu thâo mơng anom bruă pơpă ôh. Tơña lăng lĕ gơñu lăi rai mơng tơring pơkŏn, hơmâo arăng apah nao kuah kơsu.

200 ektar đang kơsu prong laih hơmâo pla dŏp mă sui mơng anai 10 thun laih ƀơi Čư̆ Prong.

Hrơi mông dŏ bơrơjah hrơi mlăm amăng bruă ngă tui Tơlơi pơtrun pơplih glai rưng ƀu hơmâo kyâo jing pla phun kơsu ƀơi tơring glông Čư̆ Prong, Gia Lai, rơbêh 1200 ektar đang glai yua Anom wai lăng glai pơgang ayuh hyiăng Ia Puč arăng koh drôm, gô̆ mă či pla hơbơi pơtơi boh troh hăng pla kơsu. Khă hnun, truh ră anai, kơnong hơmâo 870 ektar yua ană plơi gô̆ mă hơmâo arăng pơsir. Kơnong hăng 359,8 ektar đang glai dŏ glăi, ƀing Hơduah ĕp kơđi lăi, pô wai lăng glai hơmâo thâo laih, samơ̆ ƀu lăi pơthâo ôh (Tơlơi lăi glăi mơng ƀing hơduah ĕp kơđi mrô 11/KL-TTr blan 9/2019). Kơđai glăi, amăng mông jŭ yap mrô glai 2014, pô wai lăng glai jŭ yap ba đang kơsu pla ča čot anai amăng mrô glai rưng  pla mơng anom bruă. Ƀing hơduah ĕp kơđi tơring čar Gia Lai ăt črâo rơđah mơn, pô ngă soh, gô̆ mă lŏn glai lĕ anom bơwih ƀong.

Thun 2019, Kông ang hơduah ĕp kơđi Gia Lai pơsit pô ngă soh lĕ sa, dua anom bơwih ƀong. Samơ̆ truh ră anai Gia Lai ăt aka ƀu thâo sit pô hlơi ôh.

Mơng thun 2019, tơdơi kơ hơmâo jao bruă, Tơhan pôlih hơduah ĕp kơđi (Kông ang tơring čar Gia Lai) tơgŭ kơđi, ngă kơđi 2 čô, anun lĕ Nguyễn Thị Hương hăng Phan Quốc Huy (gơñu lĕ khua wai lăng glai rưng Ia Puč amăng rơwang thun 2008 truh 2012) či hơduah tơña tơlơi soh “Kơƀah tơlơi gơgrong bruă ngă hơmâo tơlơi truh sat”. Mah đơ đam đang kơsu hơmâo pla soh glăi anai dŏ giăm kual lŏn glai pioh pla đang kơsu mơ̆ tơring čar Gia Lai jao kơ hơdôm anom bruă: Kông ti pơčruh ngăn Tuh pơplai Quốc Cường Gia Lai, Kông ti Sĭ mơdrô gơnam kơ tač rơngiao Quang Đức, Kông ti TNHH sa ding kơna kơsu Čư̆ Prong, Kông ti TNHH sa ding kơna Kơsu Trung Nguyên, samơ̆ truh ră anai, pô ngă soh ăt aka ƀu thâo mơn. Ơi Phạm Vũ Tú, Kơ-iăng khua Jơnum min mơnuih ƀon sang tơring glông Čư̆ Prong brơi thâo:

“Gơmơi amra ngă hrŏm hăng hơdôm anom bruă amăng tơring čar ngă rơđah, hyu ĕp ƀuh hơdôm anom bruă, mơnuih ngă soh. Gơmơi čang rơmang anom apăn bruă mơng tơring čar tañ pơsir đut tơhnal mơtăm bruă anai, kiăng bruă wai lăng mơng kơnuk kơna tŭ yua hloh amăng bruă wai lăng glai rưng dŏ glăi hăng đơ đam lŏn arăng ngă soh”.

Hơdôm rơbâo ektar lŏn glai arăng mă yua ča čot, samơ̆ yua kaih ƀuh, yua hnun hơdôm rơtuh ektar đang kơsu hơmâo arăng pla ča, jing tơlơi pơhmu nao hmư̆ hing kơ hơdôm tơlơi ngă soh prong amăng bruă wai lăng, pơgang glai ƀơi tơring glông Čư̆ Prong. Bruă hơduah ĕp kơđi, pơsir tơlơi soh ƀơi tơring glông ăt kaih đơi, ƀu thâo yua hơget kaih đơi tui anun, ba truh tơlơi sat, bơbeč kơ bruă wai pơgang glai rưng ƀơi Gia Lai.

Nguyễn Thảo: Čih - Siu H’Mai: Pơblang