VOV4.Jarai - Amăng hơdôm hrơi đơ đam dêh čar pioh hơdor glăi 76 thun hrơi ngă hơkrŭ blan 8 hăng hrơi akŏ pơjing lơ 2/9, klin Covid-19 ăt glăk ngă tơnap tap. Hok mơ-ak amăng hrơi ngă yang yôm phăn amăng dêh čar, samơ̆ djop djuai ania kual Dap kơdư ăt pơdah pran kơđiăng amăng pơgang klin. Kiăng kơ lăi nao tơlơi anai, ơi Y Trớp (djuai anai M’nông), dŏ amăng ƀon Jâng Plây, să Trường Xuân, tơring glông Dak Song, tơring čar Dak Nông brơi thâo:

“Hrơi ngă yang pơpŭ hrơi pơklaih rơngai lŏn ia, hrơi ngă yang prong hloh amăng dêh čar ta, Neh met wa hok mơ-ak lơ̆m dêh čar ta jai hrơi pơđĭ kyar, tơlơi hơdip kơ mơnuih ƀon sang jai hrơi hrưn đĭ pơplih phrâo. Samơ̆ yua klin Covid-19 hơđuh đĭ ngă tơlơi bơwih ƀong huă-mơnuih mơnam bơbeč nao kơtang biă mă. Sit biă ñu tơlơi hơdip kơ neh met wa amăng hơdôm tơring čar hơmâo klin. Kiăng kơ pơhlôm suaih pral brơi kơ ta pô, sang anŏ hăng ană plơi pla, neh met wa amăng ƀon ăt ngă tui khut khăt tơlơi pơtrun 5K mơng Ding jum ia jrao, kơđiăng dong amăng pơgang klin. Lơ̆m ƀuh hlơi mơng kual pơkŏn rai, ƀudah glăi mơng kual hơmâo klin amra lăi pơthâo anom bruă bơdjơ̆ nao. Ngă tui pran khăp kơ lŏn ia, neh met wa pơtrut pơsur tơdruă djru brơi añăm tam, hơbơi, boh troh mơ-it kơ hơdôm tơring čar Bình Dương, Đồng Nai, ƀôn prong Hồ Chí Minh hăng tơlơi čang rơmang gum hrŏm găn rơgao tơnap tap hăng tañ pơgang hĭ klin, abih bang mơnuih tañ pơwŏt glăi hơdip tui hơđăp".

Kiăng pơgang klin Covid-19, tơring čar Kontum hơmâo akŏ pơjing 2.800 grup djru bruă amăng plơi pla. Ƀơi să tơnap tap hloh Đăk Pxi, tơring glông Đăk Hà, yă Y Dim, Kơ-iăng Khua apăn bruă Ping gah să brơi thâo:

“Amăng hrơi blan laih rơgao, Ping gah hăng gong gai să hơmâo jơnum hăng lăi pơthâo brơi abih bang neh met wa thâo hluh rơđah kơ tơlơi hŭi rơhyưt, tơnap tap mơng klin Covid-19. Tui anun, črâo ba neh met wa thâo kiăng kơ ngă tui klă hơdôm hơdră pơgang klin brơi  kjăp hloh. Mơnuih apăn bruă jơnum hăng mơnuih ƀon sang, plơi pla pơpha grup mă bruă hyu pơtô pơblang brơi neh met wa thâo amăng pơgang klin Covid-19. Ƀing gơmơi pơtă pơtăn mơnuih ƀon sang tơdah hơmâo bruă hơget thơ kiăng tơbiă hyu gah rơngiao khŏm truă khăn gôm ƀô̆, rao tơngan hăng ia ƀô tơlŏ, biă mă ñu tơdơi kơ bưp mơnuih pơkŏn kiăng kơ huăi ƀă klin. Ƀing gơmơi juăt lăi pơthâo brơi neh met wa anăm tum pơƀut lu mơnuih, anăm pơphun mơñum ƀong ôh …”

Să Dă Sar, tơring glông Lạc Dương, tơring čar Lâm Đồng lĕ kual rơnuk rơnua, aka ƀu hơmâo hlơi ôh ƀă klin Covid-19, samơ̆ ăt ƀuh pran gơgrong kjăp amăng pơgang klin. Ơi Liêng Jrang Ha Rô Ky, Khua Jơnum min mơnuih ƀon sang să Dă Sar brơi thâo, mah tơlơi hơdip dŏ tơnap tap, samơ̆ neh met wa hơmâo pơgôp lu gơnam tam, biă mă ñu lĕ añăm tam, hơbơi pơtơi, boh troh yua ƀing gơñu pla kiăng mơ-it nao hơdôm kual pơčlah pơƀut.

“Ngă tui tơlơi git gai mơng tơring čar Lâm Đồng kah hăng tơring glông Lạc Dương amăng bruă pơgang klin, ƀing apăn bruă, mơnuih ƀon sang djop djuai ania amăng să Dă Sar lêng kơ ha pran sa jua ngă tui hơdôm hơdră pơgang klin kah hăng bruă pơčlah mơnuih mơnam. Amăng hơdôm hrơi tơjuh giăm anai, ƀing gơmơi hơmâo akŏ pơjing hơdôm anih pioh pơgang klin, guang dar kual huăi hơmâo klin pơgăn ƀing mơnuih rai mơng pơkŏn mut nao kiăng kơ gơgrong kjăp hloh amăng pơgang klin. Laih dong gum hrŏm dŏ gak ƀơi hơdôm anih wai pơgang, neh met wa amăng ƀon lan tui hluai hơmâo amra pơgôp braih, añăm tam, hơbơi pơtơi, boh troh kiăng kơ gum tơngan hrŏm djru brơi hơdôm kual hơmâo klin glăk pơčlah mơnuih mơnam tui tơlơi črâo trun mrô 16 mơng Khua dêh čar.

Đăo gơnang nao tơlơi git gai mơng Ping gah hăng Kơnuk kơna amăng pơgang klin Covid-19 hăng pran gơgrong “Pơgang klin kar hăng blah ayăt”, yă Rmah Chứt (djuai ania Banar) dŏ ƀơi plơi Thong B, să Ia Hrú, tơring glông Čư̆ Pưh, tơring čar Gialai brơi thâo:

“Lơ̆m klin hơđuh đĭ, neh met wa hơmâo ngă tui klă amăng pơgang klin, neh met wa ngă tui tơlơi pơtrun 5k. Gong gai să, plơi pla ăt juăt pơtă pơtăn neh met wa hơđiăng pơgang klin. Neh met wa čang rơmang klin amra tañ pơgang hĭ, kiăng kơ pơwŏt glăi bơwih ƀong huă tui hơđăp. Kâo čang rơmang djop djuai ania amra ha pran sa jua kiăng pơgăn hĭ klin. Pơpŭ kơ abih bang mơnuih glăk amăng kual hơmâo klin hiam drơi jăn pran jua na nao”./.

Siu Đoan: Pơblang