VOV4.Jarai - Mơguah tom brơi lơ 9/8, ƀơi sang bruă Khua mir sir, Khua git gai Ping gah, Khua mir sir dêh čar Lao ơi Thongloun Sisoulith hăng Bơni ñu nao čơkă Khua mir sir dêh čar ta ơi Nguyễn Xuân Phúc hăng Bơnai ñu hăng tơlơi ngă lơphet pơpŭ pioh kơ khua mua pơprong amăng hrơi Grup khua mua Việt Nam nao čuă sit nik dêh čar Lao. Pơđut mông tŭ jum, dua čô khua hơmâo mông bưp, ƀong huă hlâo kơ hrơi jơnum.

Tơdơi kơ mông jơnum, dua čô khua ƀuh ƀơi anăp tơlơi kĭ pơkôl ngă hrŏm amăng bruă tơlơi phiăn, pơgang ma tuý, hyu ĕp, djru mơnuih bưp tơlơi truh; kĭ pơkôl ngă hrŏm hơdôm tơring čar; kĭ pơkôl ngă hrŏm kơplah wah anom bơwih ƀong amăng bruă apui yua, hơdăng pơtâo. Amăng tal nao čuă anai, Khua mir sir ơi Nguyễn Xuân Phúc ăt bưp Khua dêh čar Lao; Khua git gai pơ ala mơnuih ƀon sang dêh čar Lao; hơmâo mông bưp hăng khua mua hơđăp mơng Ping gah, Kơnuk kơna Lao.

Siu H’Mai: Pơblang