VOV4.Jarai - Pơ ala brơi Khua dêh čar, Kơ-iăng khua dêh čar ơi Lê Văn Thành phrâo kĭ hră pơtrun mrô 26 lơ 21/9/2021 kơ bruă pơtrut bơwih ƀong huă, pơgiăng hyu gơnam, blơi mut hăng ba sĭ pơ tač rơngiao gơnam đang hmua amăng hrơi blan glăk hơmâo klin Covid-19. Tui hăng anun, Khua dêh čar rơkâo Ding jum ngă hmua hăng pơđĭ kyar ƀon lan hăng djop tơring čar pok pơhai ha amăng plĕ hơdôm hơdră bruă kiăng pơhlôm bruă sĭ mơdrô gơnam đang hmua amra tŏ tui na nao; djơ̆ hăng tơlơi kiăng amăng lŏn ia hăng bruă pơkra pơjing, sĭ mơdrô pơ tač rơngiao mah hơmâo tơlơi hơget tŭ mơn. Ding jum sĭ mơdrô pơtô brơi djop tơring čar pơgang klin kjăp hloh pioh kơ pok glăi sang čơ kiăng kơ hmao tlôn ba hyu sĭ gơnam tam brơi mơnuih ƀon sang; gum hrŏm hăng  djop ding jum pơtruh pok glăi bruă sĭ mơdrô gơnam đang hmua phun pơ dêh čar Khač. Ding jum wai lăng jơlan glông pơhlôm rơdêh nao rai amăng đơ đam dêh čar, ngă gêh gal hloh brơi kơ bruă pơdŭ pơgiăng hyu gơnam đang hmua, gơnam pioh yua amăng ngă hmua hăng bruă blơi mut, sĭ pơ tač rơngiao gơnam đang hmua. Djop tơring čar pok pơhai hmao tlôn tui tơlơi pơsit mơng Kơnuk kơna kiăng kơ djru brơi anom bơwih ƀong sĭ mơdrô, anom bơwih ƀong hrŏm, sang anŏ amăng hrơi blan hơmâo klin Covid-19, pơhlôm bruă pơgang klin ƀơi hơdôm anom bruă lăp djơ̆ hăng tơlơi sit nik ƀơi ƀon lan.

Siu Đoan: Pơblang