VOV4.Jarai - Ƀơi anăp tơlơi hŭi rơhyưt mơng klin Covid-19, Anom bruă git gai tơhan pơgang guai hơdôm boh tơring čar, ƀon prong amăng dêh čar hrŏm hăng ƀing apăn bruă bơdjơ̆ nao glăk wai lăng klă bruă arăng mut nao rai amăng lŏn ia ta, pơgăn klin mut rai, ƀă hyu ƀơi jơlan guai. Amăng anun, pok pơhai klă bruă dŏ gak ƀơi hơdôm amăng jang, anih dŏ krap lăng, jơlan amur kơtuai guai lŏn ia.

Ră anai, Anom git gai tơhan pơgang guai glăk hơmâo rơbêh 1.600 grup pơgăn mơnuih nao rai hăng rơbêh 7.500 čô khua, ling tơhan, ngă hrŏm hăng 3.000 čô mơnuih mơng anom bruă pơkŏn gum djru; laih dong pơphun lu tal hyu pôr pơhing kơ bruă pơhlôm, pơgang klin Covid-19 ƀơi djŏp jơlan guai hăng rơbêh 6.000 hrơi pơtô brơi kơ giăm 1 klăk čô mơnuih; brơi năng ai 1 klăk pok hră plĕ ƀơi jơlan, hră tơlit hrŏm hăng 2.700 sŏp hră djă ƀơi tơngan hơmâo tơlơi tơña kơ klin Covid-19, ăt kah hăng pơgăn arăng mut nao rai amăng lŏn ia ta ča čot. Mơtah pơkŏn dong, hơdôm bruă pôr pơhing ăt pơtô pơblang, pôr pơhing giăm 6.00 tơlơi čih kơ klin Covid-19, hơdră pơgang klin kơ abih bang mơnuih ƀon sang.

Tui hăng Thiếu tướng Lê Đức Thái - Khua git gai tơhan pơgang guai, mơng akŏ thun truh ră anai, Tơhan pơgang guai hơmâo ƀuh, bơtơhmal giăm 14.000 čô mơnuih mut rai pơ dêh čar ta ča čot, gum djru ƀu ƀiă ôh amăng bruă pơgăn, plai ƀiă ngă klin Covid-19 lar hyu tui jơlan guai:

“Truh ră anai hơmâo 1 thun ha mơkrah laih, ƀing tơhan pơgang guai hrŏm hăng mơnuih apăn bruă pơkŏn, gong gai plơi pla ƀơi guai lŏn ia hơmâo wai lăng, pơgang ba guai lŏn ia hăng pơgăn arăng mut nao rai ča čot, pơgang klin. Lăng nao abih bang adơi ayong hơmâo mă bruă abih pran jua laih kiăng ngă djŏp bruă anai amăng hrơi mông hơmâo lu tơlơi tơnap, wơ̆t hăng anih dŏ, ƀong huă, wơ̆t hăng ayuh hyiăng ƀu lăp, kơ bruă pơhlôm brơi tơlơi hơdip mơta hăng pran jua”.

Amăng tơlơi gir pơgang klin Covid-19 lar hyu gah guai lŏn ia, hrơi blan rơgao, Tơhan pơgang guai hơmâo hyu tir, wai lăng kơtang hloh ƀơi hơdôm bah amăng jang, jơlan amur, bơnư̆ kŏng ia ƀơi guai, kual ia rơsĭ, pơƀut wai lăng hơdôm anih juăt hơmâo tơlơi rung răng. Laih dong, ngă hrŏm hăng ƀing apăn bruă pơkŏn dong kiăng thâo kơjăp bruă, hmư̆ tơhnai; hmao tlôn lăi pơthâo glăi kơ ping gah, gong gai đah mơng hơmâo hơdră pơgang lăp djơ̆ tui hluai kơ klin kơtang hă tơdu, djơ̆ hăng tơlơi hơmâo sit nik.

Rơngiao kơ anun dong, pơtrut ngă hrŏm jar kmar, pơtom hiăp nao rai; lăi pơthâo tơlơi pơhing hăng ling tơhan pơgang guai dêh čar ieo gah kiăng hơmâo hơdră pơgang hrŏm, pơgăn, bơtơhmal tui tơlơi pơtrun; pơđĭ tui bruă pơtô pơblang, pôr pơhing, iâu pơthưr mơnuih ƀon sang ƀơi guai lŏn ia, kual ia rơsĭ ƀu dưi djru ba, pơdŏp brơi, ba arăng mut nao rai ča čot amăng dêh čar; hyu hơduah ĕp, phak ƀing ngă soh, ba mơnuih mut nao rai ča čot amăng dêh čar. Đại tá Trần Tiến Hiền, Kơ-iăng khua Anom git gai tơhan pơgang guai tơring čar Quảng Nam brơi thâo:

“Ƀơi anăp tơlơi hơmâo ƀơi guai Việt Nam - Lao, biă ñu gah dêh čar Lao glăk rung răng, hơmâo lu tơlơi ngă tơnap, Anom bruă git gai tơhan hơmâo črâo bruă kơ hơdôm anom bruă, biă ñu lĕ pơđĭ tui mrô tơhan ia rơsĭ nao pơ guai gah kơdư gum pơgang klin. Djă bong hnong hơdôm anih pơgăn, jơlan amur, hyu tir pơplih nao rai kiăng pơgăn arăng mut nao rai ča čot pơ dêh čar Việt Nam. Hyu pơtô, pôr pơthâo, iâu pơthưr mơnuih ƀon sang thâo hluh, tañ ƀuh mơnuih mơng pơkŏn, mơnuih mut rai ča čot či lăi pơhmư̆ kơ ƀing apăn bruă mă pơkŏng hăng ba nao pơ anih pơčlah, bơtơhmal tui tơlơi phiăn.

Amăng hrơi mă bruă pơ tơring čar An Giang phrâo rơgao, Kơ-iăng khua mir sir yă Võ Thị Ánh Xuân pơsit: hơdôm boh tơring čar, ƀon prong gah dơnung, biă ñu An Giang hơmâo guai hăng hơdôm boh tơring čar dêh čar tač rơngiao hơmâo klin kơtang, yua hnun bruă wai lăng jơlan guai, pơhlôm pơgang klin yôm biă mă, bơdjơ̆ nao kơ bruă pơhlôm pơgang klin amăng dêh čar ta. Kơiăng khua mir sir Võ Thị Ánh Xuân lăi:

“Amăng hrơi blan pơ anăp, kiăng abih bang ƀing ta, ha bơnah ngă tui klă tơlơi pơtrun mơng Ping gah, Kơnuk kơna, giăm anai hloh lĕ Tơlơi pơčrâo trun mơng Khua dêh čar lĕ ngă dua mơta bruă amăng mông pơgang klin. Hăng bruă pơgang klin lĕ ngă tui tơlơi pơtrun 5k pơƀut Vaccine. Yua klin gah dêh čar tač rơngiao ăt dŏ kơtang đôč, hăng tơlơi git gai mơng Anom bruă tơhan pơgang guai, Anom bruă git gai tơhan Quân khu 9, ăt hruă kơjăp ƀơi jơlan guai, ƀu kơnong kŏm mut rai amăng dêh čar ta đôč ôh mơ̆, ăt pơgang ba guai lŏn ia amăng hrơi mông anai; pơgăn bruă arăng sĭ mơdrô gơnam ča čot laih anun pơgăn ƀing ngă soh bruă pơkŏn dong”.

Ră anai, kiăng pơgang ba guai lŏn ia ta rơnuk rơnua, gum pơgăn hĭ klin Covid-19 lar hyu, hơdôm anom bruă Tơhan pơgang guai hơmâo pơphô bruă, ngă hrŏm hăng ping gah, gong gai djŏp gưl hơmâo pơphun bruă “Abih bang mơnuih gum pơhlôm, pơgang klin Covid-19 hăng mut nao rai ča čot amăng dêh čar”. Rơngiao kơ anun, pơphô bruă kơ ping gah, gong gai pơkra “Hip mơ-it hră črâo anăn ƀing mut nao rai ča čot” ƀơi Jơnum min mơnuih ƀon sang hơdôm boh să, phương či pơtrut đĭ tơlơi gơgrong bruă, pran kơtang mơng abih bang mơnuih ƀon sang.

Ƀu kơnong pơphun bruă mă đôč ôh, Tơhan pơgang guai hơdôm boh tơring čar, ƀon prong ăt git gai hơdôm puih kơđông tơhan ngă hrŏm hăng kông ang ƀơi anih nao pơ rim boh sang pơtô pơblang, čih hră ƀuăn ƀu sĭ mơdrô gơnam ča čot hăng ba hyu mơnuih mut nao rai ča čot. Hăng pran jua “Pơgang klin kah hăng pơkơdong ayăt mơn” laih anun hơmâo pơđĭ tui mơnuih ngă bruă, rơdêh, măi mok, Tơhan pơgang guai khut khăt hrŏm hăng mơnuih apăn bruă pơkŏn, biă ñu lĕ neh met wa djŏp djuai ania, pơjing rai “hla pơgăn pơsơi” pơgang klin Covid-19 ƀơi djŏp kual hơmâo guai amăng dêh čar./.

Văn Hải: Čih - Siu H’Mai: Pơblang