VOV4.Jarai - Mơmŏt lơ 28/7, Ƀing khua git gai Khul pơlir hơbit mơnuih mă bruă Việt Nam amra jao pri Nguyễn Văn Linh tal III thun 2022 brơi kơ 10 čô mơnuih apăn bruă amăng anom bruă mơnuih mă bruă mut phung thâo rơgơi. Pri Nguyễn Văn Linh lĕ pri yôm phăn mơng Khul pơlir hơbit mơnuih mă bruă Việt Nam jao brơi kơ ƀing apăn bruă amăng anom bruă mơnuih mă bruă mut phung djop gưl hơmâo gum pơgôp amăng bruă mă, hơmâo tơlơi pơčeh phrâo, hơdră bruă pơplih amăng anih anom, pơgôp pơjing khul grup hơđong kjăp, pơjing anom mă bruă, anom bơwih ƀong sĭ mơdrô pơđĭ kyar hơđong kjăp, pơjing rơnuk kông nhơn Việt Nam amăng thun blan tuh tia pơkra pơjing phrâo hăng mut hrŏm jar kmar. Thun anai pri anai hơmâo jao brơi 10 čô mơnuih apăn bruă ba gru amăng đơ đam dêh čar. Mông ngă lơphet jao pri pơphun ƀơi Hà Nội amăng mơmŏt lơ 28/7, djơ̆ hrơi pioh hơdor glăi 93 thun hrơi akŏ pơjing Khul mơnuih mă bruă mut phung Việt Nam.

Siu Đoan: Pơblang