Tơdơi kơ Jơnum pơčrông sai tal 3, Jơnum min ruah khua mơ̆ng tơring Dak Lăk phrâo ngă hrŏm hăng Khul khua jơnum min djŏp djuai ania mơnuih mơnam Việt Nam tơring čar pơphun Jao glăi hră čih anăn ƀing khua či ba ruah ngă khua pơ ala mơnuih ƀôn sang dêh čar tal 16 hăng khua pơ ala mơnuih ƀôn sang mơ̆ng tơring čar truh pơ să rơwang thun 2026-2031. Ƀơi mông jơnum, ƀing khua lăng glăi abih djŏp tơlơi pơkă, mrô mơnuih či ruah tui hăng tơlơi phiăn, tŭ ư hrŏm čih anăn 19 čô mơnuih dưi tơbiă anăn ngă khua mua pơ ala mơnuih ƀôn sang dêh čar tal 16 hăng 141 čô mơnuih dưi tơbiă anăn ruah ngă khua pơ ala mơnuih ƀôn sang tơring čar.

Ƀơi mông jơnum, dua bơnah lăng glăi, pơčrang nao rai hră jơnum tal 3, hră čih anăn mơnuih či ba ruah; giong anun kĭ kơđŏm, jao glăi hră pơ-ar tui tơlơi phiăn. Bruă jao glăi hră čih anăn jing phun tơhnal yom biă kiăng Jơnum min ruah khua tơring čar pok pơhai bruă či ngă tŏ tui dong, pơhlom rơđah rơđông, djơ̆ tơlơi phiăn, bơwih brơi bruă ruah khua amăng tơring čar.