Tlam tom brơi (11/2) ƀơi Hà Nội, Grup khua Jơnum min djop djuai ania mơnuih mơnam Việt Nam pơphun Jơnum pơgôp hiăp tal tlâo kiăng bơtŭ ư tơbiă anăn mơnuih ruah ngă khua mơng hơdôm anom bruă, khul grup, anom bruă mơng gơnong glông hơmâo lăi pơthâo ruah ngă Khua pơ ala mơnuih ƀôn sang dêh čar tal XVI tui tơlơi pơkă amăng tơlơi phiăn ruah Khua pơ ala mơnuih ƀôn sang dêh čar hăng Jơnum min pơ ala mơnuih ƀôn sang thun 2015 hăng tơlơi črâo ba mơng Khul plĕ hră ruah khua dêh čar. Tơdơi kơ pơčrông sai, pơgôp hiăp ba glăi boh tŭ yua mơng mơnuih ƀôn sang ruah khua ƀơi anih mă bruă hăng anih dŏ hơdip, 100% khua mua nao Jơnum tŭ ư tơbiă anăn 217 čô mơnuih mơng hơdôm anom bruă, khul grup, anih anom mơng gơnong glông djop tơlơi gal tơbiă anăn ruah ngă Khua pơ ala mơnuih ƀôn sang dêh čar tal XVI tui tơlơi pơkă amăng tơlơi phiăn.

Đĭ pơhiăp amăng mông jơnum pơgôp hiăp, Khua Jơnum min djop djuai ania mơnuih mơnam Việt Nam Bùi Thị Minh Hòai pơsit tong, Jơnum tal tlâo hơmâo pơgiong djop boh tơhnal, jơlan hơdră ba tơbiă, pơdah pran glăm ba, tơlơi bơtŭ  hrŏm mơng djop anih anom, khul grup, anom bruă gơnong glông hăng mơnuih ƀôn sang ruah khua ƀơi anih dŏ hơdip amăng lăi pơthâo mơnuih ba gru, djơ̆ hơnong pơkă, tơlơi gal ruah ngă Khua pơ ala mơnuih ƀôn sang dêh čar tal XVI. Boh tơhnal anai tŏ tui pơsit tong tơlơi glăm ba mơng Jơnum min djop djuai ania mơnuih mơnam Việt Nam amăng bruă git gai jơnum mă tơlơi pơgôp hiăp, pơhlôm ngă pô, tơpă, djơ̆ tơlơi phiăn, pơgôp yôm phăn amăng tơlơi truh kih mơng tal plĕ hră.