Amăng blan ngă bruă yua kơ čơđai muai thun anai, djop ding jum, anom bruă, djop tơring čar hơmâo pơhrui giăm 100 klai prăk djru 1 klăk wơ̆t čơđai muai amăng dêh čar, kơnong Keh prăk pơgang ba čơđai muai Việt Nam hơmâo djru 17.800 čô čơđai muai muai tơnap tap, hăng rơnoh prăk abih tih 20 klai. Anai lĕ tơlơi pơhing mơ̆ng Ding jum Bruă mă Tơhan rơka hăng Mơnuih mơnam brơi thâo ƀơi mông jơnum pơƀut bruă mă Blan ngă bruă yua kơ čơđai muai thun 2023. Tal jơnum anai, pơphun mơguah lơ 10/7, ƀơi sang bruă pơjrao kơ ƀing mơnuih ƀu klă drơi jăn rơwen rơwo Thụy An, să Thụy An, tơring glông Ba Vì, Hà Nội.

Blan ngă bruă yua kơ čơđai muai thun anai dưi pơphun hăng akŏ ñu “Gum tơngan hrŏm ngă pơhrŏ ƀiă tơlơi ruă nuă kơ čơđai muai”. Ƀơi mông jơnum pơƀut bruă mă, Kơ-iăng Khua ding jum Bruă mă Tơhan rơka hăng Mơnuih mơnam, yă Nguyễn Thị Hà hơmâo ƀơk  giăm 100 anung gơnam hăng nao čuă sang bruă wai lăng, djru ba, pơjrao mơnuih ƀu klă drơi jăn, čuă anih dŏ, anih hrăm, anih huă ƀong mơ̆ng ƀing čơđai muai ƀơi Anom pơjrao hăng lăng ba mơnuih ƀu klă drơi jăn Thụy An, să Thụy An, tơring glông Ba Vì, Hà Nội.