Pơphun mơ̆ng lơ 9-14/7, ƀơi tơring čar Thanh Hóa, tal pơplông hơdră pơtui  jua pơhiăp đơ đam dêh čar lĕ bruă mă pơtrut tui čih tơlơi pơhing pôr amăng brô̆ dêh čar Việt Nam, dưi pơphun 2 thun sa wơ̆t, kiăng ƀuh tơlơi pơhing, pơpŭ kơ mơnuih čih tơlơi pơhing, hơmâo tơlơi čih pơhing rơgơi, lăp hloh bơni kơ mơnuih čih hră kơnăl, ƀing čih tơlơi pơhing pơtui jua pơhiăp amăng đơ đam dêh čar.

Pơplông pơtui jua pơhiăp dên čar tal 16 anai, jing kah hăng mông jơnum prong mơak pioh kơ ƀing čih tơlơi pơhing phrâo pơtui jua pơhiăp bưp nao rai, hrăm tơdruă amăng bruă mă. Pơtum abih bang 81 boh sang bruă mơ̆ng 63 boh tơring čar, ƀôn prong hơmâo Gong phun pơdah rup hăng pơtui jua pơhiăp, djop sang bruă gah Gong phun jua pơhiăp Việt Nam, sang bruă pơtui jua pơhiăp hăng pơdah rup gah ling tơhan mơnuih ƀôn sang, Anom bruă tơlơi pơhing gah tơhan kông an mơnuih ƀôn sang, hăng 380 mơta tơlơi pơhing, jơlan hơdră pôr jua pơhiăp ba pơplông. Tơdơi kơ ruah mă tal blung a pơphun ƀơi tơring čar Tuyên Quang, khul khua mua čom puang ruah 228 mơta tơlơi pơplông mơ̆ng 81 boh sang bruă dưi mut tal pơplông rơnuč.