VOV4.Jarai - Tui hăng Khul pơkra hăng Ba sĭ akan hơdang Việt Nam (VASEP), 5 blan akŏ thun anai, prăk pơhrui mơng bruă ba sĭ akan hơdang mơng Việt Nam hơmâo năng ai 4 klai 500 klăk dolar Mi, đĭ rơbêh 44,5% pơhmu hăng tơđar thun hlâo. Kơnong akan tra hăng hơdang hơmâo năng ai 2 klai 800 klăk dolar Mi. Đah mơng djru ba hơdôm tơring čar, anom bơwih ƀong prong, anom ngă ƀong hrŏm pơkra akan hơdang mơng Việt Nam dưi mă yua tơlơi gêh gal mơng Hră pơkôl ngă hrŏm bơwih ƀong abih bang (RCEP) kiăng hơmâo lu mơnuih ngă hrŏm, kiăng hơmâo tơlơi gêh gal bơwih ƀong sĭ mơdrô hăng ba sĭ pơ hơdôm boh dêh čar amăng RCEP, amăng dua hrơi (30 hăng 31/5), Anom bruă pơtrut pơsur sĭ mơdrô (Ding jum pơkra gơnam sĭ mơdrô) ngă hrŏm hăng hơdôm Anom bruă bơwih ƀong prong - Sang anih jưh pơ ala Việt Nam ƀơi hơdôm boh dêh čar RCEP pơphun Jơnum lăng nao rai amăng tivi sĭ mơdrô akan hơdang Việt Nam hăng hơdôm boh dêh čar ding kơna RCEP 2022. Ƀơi mông jơnum abih bang, ƀing kơhnâo, ƀing blơi gơnam, pô pơ ala kơ Anom bơwih ƀong prong Việt Nam ƀơi sa dua boh dêh čar ding kơna RCEP (Khač, Japan, Australia) amra lăi pơthâo tơlơi hơmâo, tơlơi kiăng, tơlơi gêh gal hăng hơdôm mơta gơnam pơkra mơng akan hơdang Việt Nam ƀơi hơdôm anih sĭ mơdrô RCEP.

Siu H’Mai: Pơblang