VOV4.Jarai - Ƀơi anăp kơ tơlơi tơnap tap mơng klin Covid-19, mrô mơnuih F0 ƀuh lu bă mă amăng mơnuih mơnam, dong mơng (1/3) abih bang čơđai hrăm anih 9 hăng 12 amăng plơi prong Buôn Ma Thuột, tơring čar Dak Lak pơdơi nao sang hră hăng pơwŏt glăi hrăm lăng nao rai mơng ataih. Hơdôm hrơi giăm anai, mrô mơnuih ƀă klin Covid-19 amăng plơi prong Buôn Ma Thuột lu biă mă, mrô mơnuih F0 pơjrao pơ sang truh pơ 99% abih bang mrô mơnuih ƀă klin, Anom bruă pơtô hrăm plơi prong pơphô bruă kơ Jơnum min mơnuih ƀon sang plơi prong brơi čơđai hrăm lăng nao rai mơng ataih hăng abih bang čơđai sang hră, wŏt ƀing čơđai hrăm anih 9 hăng 12 dong mơng lơ 1/3 truh hrơi hơmâo tơlơi lăi pơthâo phrâo. Kiăng kơ wai pơgang klin kjăp hloh hăng pơhlôm brơi bruă pơtô hrăm, Jơnum min mơnuih ƀon sang plơi prong Buôn Ma Thuột rơkâo Anom bruă pơtô hrăm plơi prong jŭ yap glăi mrô mơnuih apăn bruă, nai pơtô hăng ƀing čơđai ƀă klin Covid-19 hlâo kơ 5 mông tlam rĭm hrơi. Laih dong git gai, gum hrŏm hăng hơdôm anom bruă bơdjơ̆ nao, pơphô bruă pơplih amăng pơgang klin amăng djop sang hră hluai tui klin kheng ră anai.

Siu Đoan: Pơblang