VOV4.Jarai - Amăng hră pơhrua nao tơlơi čang rơmang pơđĭ kyar ASIA (ADO) thun 2022 dưi lăi pơthâo lơ 21/7, Sang prăk pơđĭ kyar ASIA (ADB) djă pioh hơnong mrô pơkă đĭ kyar kơ Việt Nam ƀơi rơnoh 6,5% amăng thun 2022 hăng 6,7% amăng thun 2023, kah hăng hmâo lăi pơthâo lơm blan 4/2022. Tui hăng ADB, bruă bơwih ƀong Việt Nam djă pioh dơng hơnong đĭ kyar, gơnang kơ bruă sĭ mơdrô ăt dưi pơhư prong mơn hăng tơlơi hơkrŭ glăi tañ hloh pơkă lăng hlâo mơng bruă bơwih ƀong pơjing pơkra, nao rai amăng lŏn ia hăng pơsir prăk yua bruă hrom. Khă nua gơnam đơ đam rŏng lŏn tơnah đĭ lu, biă ñu nua ia jâu đơ đam rŏng lŏn tơnah, amra ngă tơnap kơ bruă đĭ nua, samơ̆ mrô gơnam ƀong huă lu amăng lŏn ia amra djru Việt Nam hrŏ trun nua gơnam amăng thun 2022. Kiăo tui anun, ADB ăt djă pioh hơnong mơn rơnoh pơkă lăng hlâo nua gơnam mơng Việt Nam ƀơi rơnoh 3,8% kơ thun 2022 hăng 4,0% kơ thun 2023./.

Siu H’ Prăk: Pơblang