VOV4.Jarai - Tuy Đức lĕ tơring glông guai lŏn ia mơng tơring čar Daknông. Hlâo adih tơlơi hơdip mơda neh wa djop djuai ania ƀơi anăi bưp lu tơlơi tơnap, kơƀah ƀap. Hơdôm thun rơgao neh wa djuai ania Bơnông ƀơi Tuy Đức hmâo juăt laih hơdôm ngăn rơnoh čan mơng sang prăk pioh tuh pơplai pơlar phun pla kah hăng kơ phê, tiu, mắc ca ba glăi bôh tơhnal. Gơnang kơ anun prăk pơhrui glăi đĭ lu, amăng ƀrư̆ hrŏ trun rin rơpa kơjăp phik.

Rơkơi bơnai Điểu Minh ƀơi Bon Bu Đưng, să Dăk Rtih (Tuy Đức, Daknông) hmâo rơbêh kơ 6 ektar lŏn hmua. Hlâo adih kơnong kơ ngă hmua pơdai hăng pla kơtor rơtă, pơhrui glăi rim thun ƀu hmâo đơi ôh. Ră anai kual lŏn rơbêh kơ 6 ektar anai lĕ đang kơ phê, pla plah tiu. Điểu Minh brơi thâo: Đang phun pla ƀu hmâo hlăt kơman pơčrăm lĕ yua kơ ñu ngă tui tơpă glông hơdră bruă mơng ruah pơjeh truh hơdră bơwih brơi. Biă ñu hơdư̆ mă yua kơmok jrao, kơnong kơ mă yua kơmok djah djâu eh hlô mă mơng pŭ rơmô sang anô̆. Bơyan phrâo rơgao, khă nua tiu hăng kơ phê ăt glăk ƀơi rơnoh ƀiă mơn, samơ̆ tơdơi kơ kah đuăi prăk yua kơ bruă đang hmua, sang anô̆ pơhrui hmâo kơmlai rơbêh kơ 1 klai prăk. Rơkơi bơnai Điểu Minh ră anai hmâo sang pơdŏng klă hiam hăng djop mơta gơnam mă yua yôm ƀu pha ra ôh sang anô̆ arăng pơdrong amăng plơi prong. Hmâo tơlơi hơdip kah hăng ră anai lĕ tơlơi gir run hrưn đĭ mơng dua rơkơi bơnai, samơ̆ sa črăn ƀu ƀiă lĕ ngăn drăp mơng sang prăk. Điểu Minh lăi:

“Kâo hmâo čan prăk mơng Agribank rơgao hăng anai 5 thun laih. Hlâo adih sang anô̆ kâo ăt ngă đang hmua mơn samơ̆ ngă mơ̆ ƀu hmâo prăk yua pioh kơ đang hmua hă tơnap biă. Mơng hrơi hmâo čan prăk lĕ dua rơkơi bơnai gơmơi blơi kơmok pruai, blơi pơjeh, pran bơwih brơi. Truh ră anai ƀing gơmơi hmâo laih prăk pơhrui glăi mơng sang anô̆ hơđong”.

Sang anô̆ amai Thị Hoa, ƀon NDung, să Dăk Buso ăt lĕ sa amăng hơdôm sang anô̆ hrưn đĭ gơnang kơ prăk čan mơng sang prăk. Amai Hoa ruai glăi, rơkơi duam ruă ƀu dưi mă bruă kơdrâ̆o, sa čô ñu gơgrong djop bruă mơng sang anô̆. Hlâo adih ñu kơnong kơ khin čan mă 50 klăk prăk glăi blơi pơjeh, kơmok pruai pioh pla bơwih brơi kơ đang kơ phê, tiu. Tuh pơplai ba glăi bôh tơhnal, tla hĭ prăk čan hơđăp, amai Thị Hoa čan dong prăk pioh bơwih kơ đang phun pla.

“Kâo čan prăk sang prăk 150 klăk prăk pioh tuh pơplai kơ bruă pla tiu, kơ phê. Gơnang kơ anun hmâo prăk brơi ană bă nao sang hră. Gơnang kơ prăk čan mơ̆ sang anô̆ hmâo tơlơi gal pơlar bruă bơwih ƀong, hmâo prăk bơwih brơi kơ tiu, kơ phê anun tơlơi hơdip ăt plai biă hloh mơn”.

Ơi Ngô Văn Thương, Khua Jơnum min mơnuih ƀôn sang să Dăk Buk So brơi thâo: Hlâo adih ƀơi anai hmâo tơlơi arăng brơi čan prăk mă kơmlai lu, biă ñu amăng hơdôm hrơi mơnuih ngă đang hmua kiăng ječ prak pioh blơi kơmok pruai, gơnam yua kơ đang hmua pioh hmao bơyan. Hơdôm hrơi jê̆ hăng anai, gơnang kơ hơdôm sang prăk brơi čan tañ, hmao tlôn hơdôm prăk mơ̆ tơlơi hyu čan prăk mă kơmlai lu hơdư̆ hĭ, kơdun glăi.

“Hăng neh wa lĕ čan prăk mơng sang prăk Agribank Tuy Đức pioh ngă đang hmua ba glăi bôh tơhnal biă. Biă ñu amăng bruă pơgang pơgăn klin Covid-19 sang prăk hmâo djru laih kơmlai kơ hơdôm mơnuih hăng khul grŭp ƀơi anai lu biă. Kâo rơkâo lĕ sang prăk pơđĭ tui dong rơnoh čan kơ neh wa”.

Ơi Nguyễn Ngọc Thanh, Khua Sang prăk Agribank Tuy Đức, tơring čar Daknông brơi thâo: Hơdôm hrơi rơgao sang prăk ngă klă laih jơlan hơdră gum djru hrŏ trun kơmlai brơi čan hăng mơnuih bơbeč yua kơ klin Covid-19. Hmâo 2.052 čô čan, hăng mrô prăk 450 klai prăk hmâo hrŏ trun laih rơbêh kơ 1 klai 500 klăk prăk klmai. Sang prăk amra pơsir brơi prăk čan kơ mơnuih čan, biă ñu pơsir prăk tañ, hmao tlôn. Ơi Nguyễn Ngọc Thanh pơsit:

 “Blung hlâo Agribank pơsit na nao bruă phun hăng bruă đang hmua. Hăng hơdră ngă pơčeh phrâo, pơplih phrâo Agribank gum hrom na nao hăng mơnuih ƀôn sang, djru mơnuih ƀôn sang čan prăk amuñ pioh bơwih ƀong huă sĭ mơdrô pơđĭ tui tơlơi hơdip mơda, djru pơđĭ kyar bơwih ƀong, pơtrut kơdun hĭ prăk čan mă kơmlai ƀiă ƀơi anai”./.

            VOV Tây Nguyên: Čih – Siu H’ Prăk: Pơblang