VOV4.Jarai - Kơnong amăng rơbêh 4 mông đôč, yap mơng 2 mông 8 mơnit tlam, truh rơbêh 6 mông 4 mơnit mơmot lơ 23/8, ƀơi tơring glông Kon Plong, tơring čar Kon Tum hơmâo 7 wơ̆t lŏn pơpư̆. Hơdôm wơ̆t lŏn pơpư̆ anai kơtang, hơmâo hrŏm hăng hrơi mông dơnao ia pơkra apui lơtrik Thượng Kon Tum glăk kŏng ia, glăk hơmâo lu ƀing rơgơi kơhnâo lăng kah hăng phun tơhnal ngă lŏn pơpư̆ ƀơi tơring glông Kon Plong, Kon Tum. Tơlơi pơhing mơng Jơnum min mơnuih ƀon sang tơring čar Kon Plong brơi ƀuh, aka ƀu hơmâo tơlơi răm rai hơget ôh mơng tơlơi truh anai ngă.

Dơnao kĭŏng ia pơkra apui lơtrik Thượng Kon Tum glăk hơmâo lăng jing phun tơhnal ngă lŏn pơpư̆ ƀơi tơring glông Kon Plong, tơring čar Kon Tum.

Mơng bruă sem lăng glăi mơng hơdôm boh să, tơring glông, kơnong hơmâo sa boh sang ƀơi plơi Đăk Chờ, să Đăk Ring bơbeč djơ̆ tơlơi truh anai ngă. Rơđah biă ñu, ƀơi pơbung gah tlôn sang hơmâo sa boh ƀrik lê̆ trun, samơ̆ pơpung anai sô hơđăp, či răm hlâo laih. Gong gai să Đăk Ring hơmâo pơkiăo nao laih mơnuih sem lăng, djru ba pô sang pơkra glăi. Rơngiao kơ anun, tơring glông aka ƀu hmư̆ tơlơi răm rai hơget ôh kơ ană mơnuih wơ̆t hăng dram gơnam yua tơlơi truh lŏn pơpư̆ čư̆ mơgơi anai ngă.

Siu H’Mai: Pơblang