Plơi Kông Hra, să Yang Bắc lĕ sa amăng hơdôm boh plơi pla ƀun rin tơring glông Đak Pơ. Mơnuih ƀôn sang djuai ania ƀiă Bahnar pơ anai kơnong ngă hmua, pla pơjing phun pla ƀiă hrơi đôč, anun pơhrui glăi ƀiă. Khă tui anun, mơ̆ng thun 2018, dưi hơmâo tơlơi djru, pơtô ba mơ̆ng ƀing mơnuih ping gah amăng plơi, lu sang anŏ mơnuih djuai ƀiă pơblih mơ̆ng bruă ngă hmua pla tơbâo đang anet jing ngă hmua đang prong. Kơnong tơdơi kơ 6 thun, tơlơi hơdip mơda mơnuih ƀôn sang pơ anai, pơblih đĭ tui rơđah rơđong yơh. Ayong Đinh Phới, sa boh sang anŏ mơnuih ngă hmua plơi Kon Hra lăi:

“Lŏn jai hrơi tơba hĭ anun yơh mơnuih ƀôn sang pơ anai hơmâo gong gai kơnuk kơna djru pơtô ba pla tơbâo kiăng pơđĭ tui rơnoh pơhrui glăi. Mơnuih ƀôn sang djuai ania Bahnar pơ anai djop pôo lêng kơ ngă hmua pla tơbâo soh, pơhrui glăi giong sa blah đang tơbâo, lui hĭ dua, klâo thun kah pla glăi, tơlơi hơdip hơđong mơ̆n. Kiăng kơ lŏn ñu jing glăi mơnuih ƀôn sang hrăm tui hơdră pla hăng wai lăng đang tơbâo, tuh pơ alin blơi hơbâo pruai, blơi kmơ̆k dưm amăng đang phun pla hơdôm hektar đang tơbâo ăt pơhrui glăi hơmâo klăk prăk. sang anŏ gơmơi pla tơbâo ră anai hơmâo pơhrui glăi hơdôm rơtuh klăk prăk”.

Hơdôm hrơi blung a phrâo pla tơbâo, ơi ayong Phới hrŏm hăng mơnuih ƀôn sang plơi Kông Hra ăt sư̆ rơbư̆ mơ̆n, kơƀah tơlơi thâo thăi amăng bruă mă ngă hmua pla tơbâo. Khă tui anun, dưi hơmâo tơlơi djru ba mơ̆ng mơnuih ping gah amăng plơi, anun mơnuih ƀôn sang amăng plơi pla thâo pla tơbâo hăng pơđĭ tui rơnoh pơhrui glăi mơ̆ng bruă ngă hmua pla tơbâo. Amai Đinh Thị Mại, Khua khul đah kơmơi mut phung amăng plơi Kông Hra brơi thâo:

“Kâo lĕ jao bruă wai lăng hơdôm sang anŏ ƀun rin amăng plơi, pioh djru ba kiăng ană plơi pla tañ pơklaih mơ̆ng ƀun rin ư̆ rơpa, pơpha bruă ngă tui man pơdong plơi pla phrâo. Kâo hyu jak iâu mơnuih ƀôn sang wai lăng đang hmua, phun pla hăng hlô mơnong rông djơ̆ hơdră, pơtô lăi ƀing adơi amai thâo rơnăk anih dŏ, anŏ ƀong huă rim hrơi, kih rơmet pưk sang hơbôt hyôt hăng rơgoh hơdjă klă hiam”.

Hrŏm hăng anun, hăng bruă kiăng ngă “Mơnuih ping gah nao hlâo, ană plơi pla kiăo tui klôn”, Khul ping gah plơi Kông Hra ăt jing gru ngă hlâo hiam bruă mă mơ̆ng ping gah amăng kual plơi pla. Ơi Đinh Văn Việt, Kơ-iăng Khua git gai ping gah plơi Kông Hra brơi thâo:

“Khul ping gah plơi ngă giong bruă jao kơđi čar, hơmâo tơlơi jơnum tŭ yua, ngă tui klă bruă gum pơgôp, mă bruă tơpă, ƀing apăn bruă djơ̆ hnơ̆ng, mơnuih ping gah ba gru hlâo. Ăt djă bong kjăp bruă mă jak iâu pơtô lăi mơnuih ƀôn sang ngă tui hră pơtrun, tơlơi pơčrâo ba, hră pơtrun mơ̆ng ping gah ngă tui amăng tơlơi hơdip mơda pioh pơtrut pơđĭ kyar bơwih ƀong huă man pơdong plơi pla phrâo”.

Ră anai, Ping gah să Yang Bắc hơmâo 13 khul ping gah amăng plơi, 205 čô mơnuih ping gah, amăng anun 8 khul ping gah amăng plơi pla. Yua ngă klă bruă jak iâu pơtô ba yua ƀing mơnuih ping gah arăng đăo kơnang djru, hơdôm thun giăm anai, mơnuih ƀôn sang djop plơi pla thâo ngă tui boh thâo ia rơgơi, pơblih pơjeh djuai phun pla ba glăi boh tŭ yua amăng tơlơi bơwih ƀong huă. Rơnuč thun 2023, mrô sang anŏ ƀun rin să Yang Bắc hrŏ trun dŏ 14%, rơnoh pơhrui glăo rim čô mơnuih mă bruă sa thun rơbêh 35 klăk prăk. Yă Phạm Thị Thúy, Khua git gai ping gah să Yang Bắc lăi pơtong:

“Bruă ngă tui tơlơi pơtrun djop khul ping gah ngă klă 4 mơta bruă hiam ping gah să pơphun mơ̆ng akŏ thun. Lơ̆m pok pơhai hơdôm bruă mă akŏ pơjing bruă mă bơwih ƀong huă mơnuih mơnam, pơgang tơlơi rơnuk rơnua akŏ pơdong bruă kơđi čar, akŏ pơdong bruă ping gah hơđong kjăp, pok pơhai truh pơ djop khul ping gah amăng plơi pla, jak iâu djop gưl anom bruă ping gah pơtô hrăm bruă mă, jơnum pơčrong sai pơblang tong ten bruă mă, lăi pơthâo akŏ bruă či ngă, krăo lăng, kiăng pơtô brơi tum teč djơ̆ rơ-ua. Truh mông anai, djop anom bruă ping gah čih anăn rơkâo hăng ping gah să, kiăng ngă tui khut khăt djop khul ping gah amăng plơi pla ngă tui djơ̆ 4 mơta bruă hiam amăng thun anai”.