VOV4.Jarai - Yua kơ ƀu hmâo wai lăng pơplih pơkra na nao, laih anun hơjan ia ling dăo ngă răm rai anun lu ară jơlan ƀơi kual čư̆ siăng tơring čar Kontum ră anai amăng tơlơi răm rai ƀơƀrư̆. Hrom hăng amra hmâo tơlơi truh ƀơi jơlan nao rai, tơdah ƀu pơkra glăi tañ, amra hmâo lŏn tơhlom, kual mơnuih ƀôn sang dô̆ guang dar hĭ amăng bơyan hơjan ia ling dăo thun anai hă ƀu tlaih ôh.

Mơng plơi Đăk Ga nao pơ̆ kual krah să Đăk Nhoong, tơring glông Đăk Glei, kơnong kơ hmâo 3km. Hlâo adih črăn jơlan anai ăt tuh ƀê tông samơ̆ yua kơ ƀu hmâo pơplih pơkra na nao anun truh ră anai jơlan tơklot, răm rai. Tui anun laih, yua kơ lŏn lu kơdư dơnung ƀu gêh gal anun rôk tui dua bơnah jơlan hmâo lu anih lŏn tơhlom, wot bơnah gah lăm hăng gah rơngiao bơnư̆ bư̆ pơgang jơlan. Ayong A Cu, Khoa plơi Đăk Ga brơi thâo, bruă nao rai mơng 108 bôh sang anô̆ mơnuih ƀôn sang plơi Đăk Ga bŏng glăi na nao hăng anô̆ huĭ rơhyư̆t:

“Črăn jơlan mơng plơi Đăk Ga nao pơ̆ să Đăk Nhoong tơnap tap biă amăng bơyan hơjan, juăt hmâo lŏn tơhlom lu. Huĭ rơhyư̆t biă, biă ñu ƀing čơđai nao sang hră lŏn tơhlom hă huĭ rơhyư̆t biă”.

Sa anih lŏn tơhlom bơnư̆ pơgang amăng lăm ƀơi să Đăk Nhoong nao pơ̆ kual krah tơring glông Đăk Glei

Jơlan ƀơi tơring glông ĐH83 ataih 12 km mơng să Đăk Nhoong nao pơ̆ kual krah tơring glông Đăk Glei ăt tui anun mơn. Hlâo adih jơlan anai dưi tuh kơ su, samơ̆ yua kơ lu thun ƀu hmâo pơplih pơkra, anun lu črăn jơlan jing răm hĭ hing hung. Huĭ rơhyư̆t hloh lu biă ƀơi jơlan lŏn tơhlom bơnư̆ pơgang jơlan amăng lăm. Hơdôm anih anom lŏn tơhlom glăk jai hrơi jai dơlăm tui nao gah jơlan, bơ̆ gah yŭ lĕ thong dơlăm. Ơi A Nang, Kơ-iăng Khua git gai Ping gah, Khua Khul pơ ala mơnuih ƀôn sang să Đăk Nhoong brơi thâo, wot gong gai hăng mơnuih ƀôn sang leng kơ bơngot kơ huĭ hmâo tơlơi truh ƀơi jơlan hăng amra ngă gun jơlan nao rai, guang dar amăng bơyan hơjan pơ̆ anăp:

“Tơdơi hmâo hơjan prong hơdôm wot dong yap wot jơlan pơgang amăng lăm hăng gah rơngiao tơ̆i đưn hĭ thơ. Lu anih anom ƀu djơ̆ sa dua bit anih ôh. Găh yŭ ta luy amăng lăm lŏn tơhlom giăm abih laih. Ƀing gơmơi kơnong kơ pơtă jăng jai yôl hnal lăi pơthâo, hơdôm ƀăng rôn kiăng neh wa huăi nao pơ̆ anun đôč. Sui thun lĕ hơkrŭ pơkra glăi hơdôm anih anom anai biă ñu ta luy amăng lăm”.

Lŏn tơhlom jai hrơi jai mut dơlăm ƀơi jơlan nao rai

Tơring glông Đăk Glei, tơring čar Kontum ră anai hmâo 70 km jơlan tơring glông, 51 km jơlan amăng plơi pla, nao pơ̆ kual bơwih ƀong huă hăng jơlan amăng hmua. Rơngiao kơ jơlan tơring glông ĐH84 phrâo tuh pơplai pơkra glăi lĕ, abih bang hơdôm ară jơlan dô̆ glăi răm rai laih. Bôh than ba truh lĕ, jơlan tuh pơplai sui laih, ƀu hmâo pơplih pơkra na nao, laih anun hơjan ia ling dăo ngă răm rai lŏn tơhlom, ba truh bruă nao rai, biă ñu dŭ pơgiăng gơnam mă mơng đang hmua neh wa bưp lu tơlơi tơnap. Bơyan hơjan thun anai lu să mơng tơring glông Đăk Glei, kah hăng: Đăk Nhoong, Đăk Blô, Mường Hoong, Ngọc Linh... leng kơ glăk dŏng ƀơi anăp amra ƀu thâo nao rai hăng kual mơnuih ƀôn sang dô̆ guang dar hĭ.

Tui hăng Anom wai lăng bruă bơwih ƀong hăng anom mă yua tơring glông Đăk Glei, tơring čar Kontum, ƀơi anăp amra dăp dưm kơnar prăk mă yua pioh pơplih pơkra anet, jăng jai hơdôm anih răm rai ƀơi hơdôm ară jơlan yua kơ tơring glông wai lăng kiăng pơhlôm klă bruă nao rai hăng pơhlôm jơlan hlâo, amăng hăng tơdơi kơ bơyan hơjan ia rơbŭ kơthel. Bơ̆ sui thun lĕ, anom rơkâo tơring čar hăng Kơnuk kơna pel ĕp pơpha brơi prăk mă yua kiăng tañ hơkrŭ pơplih pơkra, pơkra glăi hơdôm ară jơlan phun amăng tơring glông./.

            Khoa Điềm: Čih – Siu H’ Prăk: Pơblang