VOV4.Jarai - Anih hrăm aset čơđai, lu sang hră anet hơmâo pơdong ƀơi sa bit anih, anun jing sa amăng hơdôm phun tơhnal ngă tơring čar Gia Lai kơƀah rơbêh 3.400 nai pơtô amăng thun hrăm phrâo. Lơ̆m anun, bruă pơƀut hrŏm sang hră hơmâo ngă kaih, bơbeč djơ̆ mơn bruă dưm dăp sang hră, nai pơtô, pơđĭ anŏ klă mơng bruă pơtô ăt kah hăng pơsir hĭ bruă kơƀah nai pơtô.

Jing tơring glông hơmâo lu sang hră đơ anet, samơ̆ amăng 4 thun ngă tui tơlơi pơtrun dưm dăp sang hră, anih hrăm, tơring glông Phú Thiện (Gia Lai) kơnong hrŏ trun 3 boh sang hră đôč. Yă Nguyễn Thị Hoa - Khua Anom bruă pơtô hăng pơjuăt tơring glông Phú Thiện brơi thâo, hơmâo lu tơlơi ngă kơ tơring glông aka ƀu dưi pơmut hrŏm anih hrăm, sang hră anet:“Sit biă ñu, mông anai dưi pơmut hrŏm hơdôm boh sang hră dong. Man pơkra giong sang hră phun lĕ amra pơmut glăi hrŏm hơdôm boh sang hră, truh pơ thun 2025 kah mơng dưi pơsir. Pơmut hrŏm mơnuih mă bruă lĕ dưi mơn, samơ̆ ataih đơi, hŭi wai lăng ƀu klă ôh. Bơ hơdôm boh sang hră giăm lĕ pơ anăp anai gơmơi amra pơƀut glăi glăi hơdôm boh sang hră dong. Pơ anăp anai amra pơƀut hrŏm gưl anet gưl prong hlao”.

Tui hăng tơlơi jŭ yap, sem lăng mơng Gơnong bruă pơtô hăng pơjuăt laih anun Gơnong bruă wai lăng bruă čar Gia Lai, ră anai ƀơi hơdôm boh tơring glông Phú Thiện, An Khê, Đức Cơ ăt dŏ hơmâo lu sang hră gưl sa hăng gưl 2 hơmâo aset anih hrăm biă, aka ƀu truh 10 anih ôh lơ̆m sa boh sang hră laih anun yŭ kơ 20 čô čơđai amăng sa anih hrăm. Ƀơi hơdôm boh tơring glông Ia Pa, Kbang, Kông Chro, Krông Pa, Čư̆ Păh, Čư̆ Pưh hơmâo truh 21 boh sang hră muai mầm non yŭ kơ 5 boh anih hrăm. Hơdôm boh sang hră anai khŏm kiăng pơmut hrŏm yua ƀu hơmâo mrô mơnuih hrăm djơ̆ hăng tơlơi pơkă mơng Ding jum pơtô pơjuăt.

Ƀơi să Ia Sol (tơring glông Phú Thiện): Sang hră gưl sa Thắng Lợi (9 anih hrăm) hăng Sang hră gưl 2 Trưng Vương (12 anih hrăm) samơ̆ amăng 4 thun rơgao ƀu pơmut hrŏm ôh.

Ƀu kơnong ƀu gir pơmut hrŏm sang hră đôč ôh, gong gai hơdôm boh tơring ƀu ngă hrŏm ôh hăng anom bruă pơtô hrăm amăng bruă pơƀut glăi sang hră gưl anai gưl adih. Ơi Lê Duy Định - Khua gơnong bruă pơtô hăng pơjuăt Gia Lai brơi thâo.

“Ƀing gơmơi kiăng pơmut hrŏm 6 boh sang hră gưl prong hơmâo mrô anih hrăm yŭ kơ 15 ƀơi hơdôm boh tơring glông Kbang, Đức Cơ, Phú Thiện, Ia Pa, Krông Pa. Gơmơi hơmâo hră kiăng Jơnum min mơnuih ƀon sang hơdôm boh tơring glông anai lăi pơƀuh anăn hơdôm boh sang hră gưl 2 či pơmut hrŏm samơ̆ ƀu ƀuh tơring glông lăi glăi ôh. Rơkâo ping gah djŏp tơring glông lăng ba dong. Tơdah ƀu lăng ba, amra ƀu dưi pơsir hĭ ôh bruă anai”.

Pơmut hrŏm sang hră, anih hrăm anet amra pơsir hĭ tơlơi kơƀah nai pơtô ƀơi Gia Lai.

Ngă bruă dưm dăp glăi hơdôm anih pơtô hrăm, mơng thun 2018 truh ră anai, Gia Lai hơmâo pơhrŏ trun 4 boh sang hră pơtô hrăm re se (giáo dục thường xuyên) laih anun pơhrŏ trun 83 boh sang hră, 515 anih hrăm, 406 boh sang hră anet. Rơngiao kơ hơdôm boh tơring glông, plơi prong hơmâo ngă klă, ăt hơmâo mơn lu tơring ngă ƀu dưi kah hăng: plơi prong Ayunpa, tơring glông Phú Thiện, Mang Yang, Đức Cơ, Ia Grai, plơi prong Pleiku...mrô sang hră anet hơmâo pơmut hrŏm aset biă mă. Tơlơi anai kơđai glăi hăng tơlơi gir kiăng pơmut hrŏm sang hră, anih hrăm či pơsir hĭ bruă kơƀah nai pơtô, dưm dăp mơnuih mă bruă klă ƀiă, laih anun pơđĭ tui bruă pơtô hrăm.

Ăt ngă tui tơlơi pơtrun mrô 19/NQ-TW kơ bruă pơtô hăng pơjuăt, rơwang thun 2022-2025, tơring čar Gia Lai amra pơhrŏ trun dong 8 anom bruă kơnuk kơna, 17 boh sang hră, 97 boh sang hră anet pơdong amăng plơi pla. Dưi ngă tơlơi anai, tơring čar amra pơkrem hơmâo rơbêh 1700 čô nai pơtô sit nik. Hrŏm hăng mrô nai pơtô sit nik phrâo hơmâo Kơnuk kơna ta pơhrua brơi, Gia Lai amra dưi pơsir hĭ bruă kơƀah nai pơtô ră anai.

Ƀơi mông jơnum bruă pơtô hrăm pơphun kơplah wah blan 8 thun 2022, yă Nguyễn Thị Thanh Lịch - Kơ-iăng khua Jơnum min mơnuih ƀon sang tơring čar Gia Lai kiăng hơdôm boh tơring glông, plơi prong ngă klă ƀiă bruă dưm dăp glăi sang hră đah mơng pơsir hĭ bruă kơƀah nai pơtô, pơhlôm ba bruă hrăm hră mơng ƀing čơđai:“Hơmâo jao laih kơ Gơnong bruă pơtô hăng pơjuăt laih anun Gơnong bruă wai lăng bruă čar pel ĕp, črâo brơi rim anih, rim plơi pla. Hăng tơring čar ƀu hơmâo hơdră pơsir pơkŏn dong tah, khŏm ngă hlao mơtăm đah mơng hơmâo djŏp mrô nai pơtô. Kâo git gai hơdôm boh tơring ječ ameč ngă hlao mơtăm. Ƀing gơmơi amra sem lăng, pel ĕp bruă anai, pô ngă khua khŏm gơgrong bruă hloh”.

Nguyễn Thảo: Čih - Siu H’Mai: Pơblang