Anai lĕ tơlơi pơhing hơmâo lăi pơthâo lơ̆m jơnum lăi pơthâo mơ̆ng gơnong dlông blan 6/2023, yua kơ Anom pơtô bruă ping gah dêh čar pơphun mơguah lơ 16/6. Ƀơi mông jơnum, tơlơi pơhing lăi nao kơ tơlơi rung răng răm ƀăm ƀơi Dak Lak, Thiếu tướng Đặng Hồng Đức, Khua anom bruă Ding jum kông an lăi pơtong, tơdơi kơ hơmâo tơlơi rung răng , Ding jum kông an kơtưn brơi ling tơhan kơhnăk, hơdeč hmar, pok pơhai hyu mă bruă guang dar, pơgăn abih anih ƀing hơmâo anăn ngă soh, pơgang anih anom gong gai kơnuk kơna, pơgang tơlơi rơnuk rơnua, hơđong kơ mơnuih ƀôn sang laih anun ăt kiăo mă ƀing ngă soh. Hrom hăng anun, ngă tui jơlan hơdră hiam klă, hmao kru djru juh alum, tơña bla sang anŏ hơmâo mơnuih djai hăng ruă nuă amăng tơlơi rung răng. Thiếu tướng Đặng Hồng Đức pơčrâo rơđah, hăng pran jua mă bruă khut khăt kiăo mă ƀing ngă soh, truh ră anai hơmâo mă pơkong 50 čô mơnuih ngă rung răng. Laih tơña tơlơi soh, ƀing anun dŏ ƀiă thun, hlăk ai soh hmư̆ tơlơi arăng pơčut pơčao, ĕp lăng amăng plang internet pôr kah ania pơpha djuai Yuan hăng mơnuih djuai ƀiă....

Phun ñu, tơbiă rai mơ̆ng ƀing pơblư̆ lŏn ia mơ̆ng tač rơngiao adih, ƀing ngă Fulro dŏ pơ dêh čar tač rơngiao pơtrut, kiăng mơnuih djuai ania ƀiă bơrơmut kơ Yuan laih anun ngă rung răng, kiăng hmư̆ hing kơ gơñu, ĕp jơlan či đuăi nao pơ dêh čar tač rơngiao.

Tơlơi anai, tơhan kông an ăt hlăk hơduah ĕp, ngă pơrơđah tơlơi hơmâo. Kơ anăp bruă mă, hơdră či ngă pơ anăp anai, Thiếu tướng Đặng Hồng Đức lăi pơtong, Ding jum kông an amra suh ĕp mă abih mrô mơnuih ngă sat. Laih dơ̆ng pơgang ba mơnuih ƀôn sang dưi rơnuk rơnua, lơ̆m kiăo mă mơnuih soh sat; pơphun hơduah ĕp, pơsir kơđi mơnuih ngă soh djơ̆ hăng tơlơi soh sat. Ding jum kông an rơkâo djop gưl, gong gai kơnuk kơna tơring čar Dak Lak, djop tơring čar amăng kual Dap Kơdư hăng kual ieo gah đing nao lu hloh bruă mă hyu pơtô lăi, dŏ jĕ giăm mơnuih ƀôn sang hloh, hơduah ĕp hơdôm tơlơi bơngơ̆t bơngañ amăng mơnuih ƀôn sang kiăng pơsir hĭ tơlơi soh sat arăng kah ania pơpha djuai laih anun răng kơđiăng hloh anăm lê̆ luh tơlơi soh sat kah ania pơpha djuai mơ̆ng ƀing ayăt roh, pơtrut mơnui ƀôn sang djru hrom pơgang tơlơi rơnuk rơnua lŏn ia dêh čar.