VOV4.Jarai-Tlam lơ 20/4, jơnum lir hơbit lu anom bruă Jơnum min apăn bruă git gai pơ ala mơnuih ƀôn sang dêh čar hăng Anom bruă djop djuai ania mơnuih mơnam Việt Nam. Ƀơi mông jơnum, Khua git gai pơ ala mơnuih ƀôn sang dêh čar ta ơi Vương Đình Huệ čih pioh, lăng yôm bruă mă mơ̆ng anom bruă djop djuai ania mơnuih mơnam hăng djop sang bruă ding kơna anai hơmâo ngă jai hrơi ƀuh rơđah bruă mă yôm pơ ala kơ mơnuih ƀôn sang, sa črăn ƀu pơčlah ôh pơjing rai glông bruă kơđi čar amăng dêh čar ta.

Mông jơnum hrŏm abih bang

Khua git gai pơ ala mơnuih ƀôn sang dêh čar lăi pơtong, bruă ngă hrom khul khua mua anom bruă djop djuai ania mơnuih mơnam Việt Nam hăng Jơnum min apăn bruă git gai pơ ala mơnuih ƀôn sang dêh čar ƀu pơdơi ôh kjăp tui, kơtưn na nao. Laih dơ̆ng rơkâo kơ anom bruă wai lăng djop djuai ania mơnuih mơnam Việt Nam hăng lu anom bruă ngă hrom ăt kơsem min, pơsit 5 mơta bruă yôm pơ anăp adih, tui hăng tơlơi pơhiăp mơ̆ng Khua git gai ping gah ơi Nguyễn Phú Trọng ƀơi mông jơnum anom bruă djop djuai ania mơnuih mơnam Việt Nam blan 8/2021; ngă klă hloh tơlơi gơgrong phun bruă kơđi čar amăng khul gum pơgôp djop djuai ania, jing anŏ pơtruh nao rai kjăp kplah wah mơnuih ƀôn sang hăng ping gah laih anun kơnuk kơna.

Nay Jek: Pơblang