Dua bơnah hơmâo tŭ ư ngă tui hơdôm tơlơi dưi, amăng anun pơsit tong: Gum hrŏm kơplah wah Anom bruă git gai tơhan wai pơgang guai Việt Nam hăng anom bruă wai lăng mơnuih đuăi hyu dŏ Kur pơgôp pơhlôm hơđong, ngă gêh gal brơi kơ bruă mut nao rai ƀơi kual giăm guai găn nao amăng jang, pơgôp pơđĭ kyar bơwih ƀong huă - mơnuih mơnam, kơtưn mut hrŏm, giang mah, thâo hluh nao rai kơplah wah gong gai, mơnuih ƀon sang hăng tơhan wai pơgang guai dua bơnah.

Amăng mông jơnum bơkơtuai, Trung tướng Lê Đức Thái, khua  anom bruă git gai tơhan wai pơgang guai dêh čar Việt Nam lăng yôm, pơpŭ bơni Anom bruă wai lăng mơnuih đuăi hyu dŏ, Ding jum tơhan pôlih dêh čar Kur  hơmâo gum hrŏm, pơklaih ba glăi mơnuih ƀon sang Việt Nam arăng plư hyu mă bruă, mut nao rai dêh čar ča čot hăng kơtư̆ juă mơnuih mă bruă ƀơi hơdôm anih anom mă bruă hơdŏp ƀơi Kur. Pơ anăp anai, dua bơnah tŏ tui gum hrŏm tŭ yua amăng bruă pơgăn mut nao rai ča čot, hmao tlôn pơlăi nao rai, ĕp ƀuh ƀing sĭ dŏp, anih anom kơtư̆ juă mơnuih mă bruă, anăp nao pơsir hĭ khut khăt tơlơi anai.