Ƀơi anăp anŏ tơnap yua kơƀah prăk tuh pơ alin, prăk blơi gơnam či pơkra pơmă, adai ƀu lăp, hơmâo klin duam ruă, laih anun tơlơi kiăng pơkra gơnam klă jai hrơi kơtang hloh, anom ngă ƀong hrŏm Vĩnh Cường ƀơi să Vĩnh Mỹ (tơring čar Cà Mau) pơƀut pơtruh mut hrŏm bruă pơkra gơnam - ba sĭ braih tui hăng Akŏ bruă 1 klăk ha pơdai hiam, jơman, ngă hơƀak ayuh hyiăng aset amăng kual Lŏn dăo ia krông Cửu Long. Ră anai, bruă pơkra gơnam ngă hmua mơ̆ng anom ngă ƀong hrŏm Vĩnh Cường jing rơbêh 10.000ha, amăng anun hơmâo năng ai 5.000 ha pơtruh ngă hmua pơdai tui hơnong pơkă hiam, jơman. Tơlơi phara biă mă amăng bruă pơtruh ngă hrŏm lĕ hơmâo anom bơwih ƀong gum ngă mơ̆ng blung mơtăm. Bruă brơi anah djuai phun pla, pơtô ngă hmua, wai lăng anŏ klă truh kơ blơi gơnam mơ̆ng hmua hơmâo ngă tui hră kĭ pơkôl rơđah rơđông.

Ơi Trịnh Văn Cường - Khua anom ngă ƀong hrŏm Vĩnh Cường brơi thâo, boh tŭ yua mơ̆ng bruă pơtruh pơkra gơnam ƀu kơnong hơmâo ƀơi prăk pơhrui đĭ đôč ôh ăt ƀuh amăng tơlơi pơmin ngă hmua plih laih mơ̆ng mơnuih ƀôn sang. Mơ̆ng bruă ngă hmua tŭ kơ hơmâo, mơnuih amăng anom ngă ƀong hrŏm pơđing nao anŏ klă, jơman, ngă hră kiăng thâo anih pla, pơkra laih anun rơnuk rơnua gơnam ƀong huă. Ơi Trịnh Văn Cường brơi thâo: “Anom ngă ƀong hrŏm ƀu dưi ngă bruă tui hơđăp, ƀu rơđah rơđông, ƀu jao, kah pơpha bruă laih anun kiăng mut amăng anih bơwih ƀong mơnuih ƀôn sang ngă pô, anom ngă ƀong hrŏm khŏm hơmâo khul mơnuih mă bruă rơguăt, rơgơi, hơmâo akŏ bruă či sĭ mơdrô, dưi prăp rơmet wai lăng prăk kăk, hơmâo jơlan sĭ mơdrô ƀơi anih mơdrô rơguăt, kơnong đăo kơnang kơ anom ngă ƀong hrŏm jing sa khul bơwih ƀong sit nik, mut hrŏm bruă pơtruh pơkra gơnam, pơjing rai nua yom mơ̆ng bruă pơkra gơnam".

Tơlơi bơwih ƀong huă Việt Nam glăk pơplih tui jơlan mơtah, pơdar nao rai laih anun ngă bruă tui boh thâo mrô soh, yua hnun, bơwih ƀong huă ngă hrŏm, ƀut ngă hrŏm glăk dong ƀơi anăp kiăng pơplih phrâo abih bang mơ̆ng tơlơi pơmin ngă hmua pla pơjing pơkra gơnam. Bruă pơtruh hăng anih bvơwih ƀong mơnuih ƀôn sang ngă pô hơmâo lăng jing hơdră yom biă kiăng anom ngă ƀong hrŏm dưi pơhno, bơkơtưn ngă bruă, pơplih hơdeč tui anih sĭ mơdrô kiăng.

Tui hăng yă Nguyễn Thị Hoàng Yến - Kơ-iăng khua Anom bơwih ƀong ngă hrŏm hăng đĭ kyar plơi pla (Ding jum bruă hmua hăng ayuh hyiăng), lu anom bơwih ƀong pơkra gơnam dŏ anet mơn, ƀu thâo pơkra đơi ôh, laih anun ƀu thâo đơi ôh anih mơdrô ñu kiăn hơget, pơplih hiư̆m pă. Tơlơi anai ngă kơ gơnam tam bưp tơlơi tơnap “Bơyan hơmâo samơ̆ nua trun”, pơkra gơnam ƀu pơmin nao sui pơ anăp ôh. Lơ̆m anun, kual bơwih ƀong mơnuih ƀon sang ngă pô hơmâo tơlơi gêh găl kơ prăk tuh pơ alin, măi mok, anih kah pơpha sĭ gơnam hăng tơlơi gêh găl hơmâo anih sĭ mơdrô amăng čar ta wơ̆t hăng ƀơi čar rơngiao. Bruă pơtruh plah wah anom ngă ƀong hrŏm hăng bơwih ƀong mơnuih ƀôn sang ngă pô amra dưi akŏ pơjing nua djŏp mơta bruă pơkra hơđong kjăp. Yă Nguyễn Thị Hoàng Yến pơƀuh brơi tơlơi hơmâo sit: “Tơdah bruă ngă hmua hơdai ngă prong hloh, mơtah hơđong hăng kiăo tui tơlơi pơkă lĕ khŏm kiăng hơmâo hră čih pơthâo rơđah anih pla, anih pơkra, đah mơ̆ng rơđah rơđông hloh, laih anun gơmơi ƀuh, tơdah anom bơwih ƀong tuh pơ alin prăk, măi mok hăng wai lăng lĕ anom ngă ƀong hrŏm amra pơphun pơkra gơnam krăo lăng anŏ klă mơ̆ng gơnam. Laih dong, tơdah dưi ngă 2 mơta bruă anai hrŏm mơtăm, jing ta ƀuh mơtăm yơh anŏ gêh găl tŭ yua mơ̆ng anom bơwih ƀong, anom ngă ƀong hrŏm laih anun mơnuih ngă hmua pơplih mơ̆ng ngă hơjăn jing ngă hrŏm đĭ kyar sui pơ anăp, kjăp hloh”.

Kiăng hơbô̆ bruă pơtruh plah wah anom ngă ƀong hrŏm hăng anih bơwih ƀong mơnuih ƀôn sang ngă pô đĭ kyar hơđong kjăp lĕ prăk kăk jing sa tơlơi akŏ phun. Sit biă ñu brơi ƀuh, lu anom ngă ƀong hrŏm ăt tơnap mơn kiăng hơmâo prăk či bơwih ƀong yua ƀu hơmâo lŏn tơnah, sang dŏ či rơkâo čan prăk, bruă wai lăng prăk kăk hai aka ƀu thâo đơi lơi. Tơlơiania ngă kơ anom ngă ƀong hrŏm tơnap biă mơ̆ng dưi blơi măi mok, boh thâo ia rơgơi ƀudah pok prong anih pla či pơkra gơnam. Lơ̆m anom ngă ƀong hrŏm pơtruh hăng anom bơwih ƀong, tơlơi rung răng, lung lŭp mơ̆ng prăk čan amra plai mơn, yua dah hơmâo laih hră kĭ blơi gơnam, laih anun hơmâo prăk hơđong.

Yă Cao Xuân Thu Vân - Khua khul ngă ƀong hrŏm Việt Nam lăi, đĭ kyar pơtruh nao rai ngă hrŏm jing bruă kiăng biă mă, đah mơ̆ng hơmâo hơbô̆ bruă bơwih ƀong ngă hrŏm hơđong kjăp. Bruă pơtruh ngă hrŏm amra pơtrut mă yua boh thâo mrô amăng anih bơwih ƀong ngă hrŏm. Tơlơi anai djru ngă rơđah rơđông, rơguăt bruă mă hăng pơhưč mơnuih mă bruă hlăk ai gum ngă bruă amăng kual bơwih ƀong ngă hrŏm. Yua hnun, pơtruh anom ngă ƀong hrŏm hăng khul bơwih ƀong mơnuih ƀôn sang ngă pô ƀu kơnong jing jơlan bơwih ƀong phrâo đôč ôh, ăt jing tơlơi ta khŏm ngă yơh, đah mơ̆ng dưi bơkơtưn gơnam mơ̆ng Việt Nam amăng anih pơkra gơnam ba sĭ ƀơi rŏng lŏn. Yă Cao Xuân Thu Vân lăi dlăm: “Amăng anom ngă ƀong hrŏm mơ̆ ta rơkâo arăng pap brơi jing tơnap biă, djŏp bruă ta ngă khŏm rơđah, bơbrăng, tơpă hnun ñu, kiăng tơpă lĕ ta khŏm ngă bruă tui hơnong pơkă. Dua lĕ ngă hră ĕp ƀuh anih pla, pơkra gơnam khŏm hơmâo djŏp anom bơwih ƀong djru. Laih anun truh kơ prong kjăp baih, anom ngă ƀong hrŏm amra hơmâo pô pơđĭ tui anŏ kjăp bruă mơ̆ng Khul wai lăng laih anun mă prăk mơ̆ng pô či tuh pơ alin”.

Hăng hơdôm tơlơi pơplih hơdră ngă bruă mơ̆ng Kơnuk kơna amăng hrơi blan đĭ kyar phrâo, khul grup bơwih ƀong hrŏm, anom ngă ƀong hrŏm ƀu djơ̆ kual tơdu dong tah, dưi jing sa bơnut pơčuai hrĕ yom biă mă amăng khul bơwih ƀong mơnuih ƀôn sang ngă pô. Mơ̆ng “hrĕ pơčuai” anom ngă ƀong hrŏm hơmâo djru ba djơ̆ rơnoh amra pơtrut tui nua yom bruă ngă hmua Việt Nam đĭ kyar hơđong kjăp, mơ̆ng anun pơplih tơlơi bơwih ƀong, pơđĭ tui prăk pơhrui kơ mơnuih ngă hmua dêh čar ta./.