Amăng hrơi mông prăk apah pơgiăng gơnam hăng ia săng ia jâo pơmă mơn, Kông ti Yến sào Khánh Hòa ăt đĭ kyar mơ. 3 blan tal 1 thun 2026, prăk pơhrui mơ̆ng anom bơwih ƀong hơmâo năng ai 1.040 klai prăk, đĭ 19% pơhmu hăng tơđar thun hlâo, ngă giong 30% mrô prăk kiăng pơhrui amăng sa thun. Tui hăng yă Trịnh Thị Hồng Vân, Khua khul ding kơna Kông ti Yến Sào Khánh Hoà, anom bơwih ƀong pơtrut bră sĭ mơdrô, pok prong anih ba sĭ pơ čar rơngiao, biă ñu lĕ pơ čar Khač Laih dong, kông ti pok pơhai lu hơdră pơkrem ƀiă prăk apah pơkra gơnam đah mơ̆ng hơđong nua sĭ, pơhlom dưi pơhno nao rai hăng gơnam pơkŏn.

“Hơdôm anih sĭ mơdrô juăt blơi ruah, tong ten kah hăng Mi, Úc, Canada leng kơ hơmâo anŏ pơkă yom soh, gơñu blơi ruah biă, samơ̆ tơlơi kiăng thâo rơđah anih pơkra gơnam mơ̆ng anih mơdrô dêh čar Khač dŏ tơnap hloh, mơ̆ng bruă mă pơhrui, pơkra truh kơ ba sĭ, kah pơpha hyu gơnam sĭ. Yua hnun, anom bơwih ƀong glăk ngă hrŏm hăng ƀing gŏp mơdrô laih anun grup bơwih ƀong prong ƀơi čar Khač đah mơ̆ng pok prong anih mơdrô hăng đĭ kyar anăn hmư̆ ư Yến Sào Khánh Hòa”.

Hrŏm hăng tơlơi gir mơ̆ng anom bơwih ƀong, jơlan hơdră pơtrut tuh pơ alin thun 2026 mơ̆ng Khánh Hòa ăt pơƀut pơhưč tơlơi gêh găl mơ̆ng jar kmar amăng hơdôm bruă akŏ phun kah hăng pơkra gơnam măi mok, apui yua, tuai hyu ngui – bơwih bơwang hăng plơi prong – man pơdong. Tơlơi gơñăm kiăng hơmâo amăng thun anai lĕ pơhưč aset biă ñu 2 kơčăo bruă FDI hơmâo prăk tuh pơ alin mơ̆ng 100 klăk USD truh kơ lu hloh. Ơi Trần Minh Chiến, Khua wai lăng Kual bơwih ƀong hăng hơdôm Kual sang măi tơring čar Khánh Hòa brơi thâo, bruă pơtrut tuh pơ alun hơmâo anom bruă ruah mă hơdôm anom bruă, gŏp či ngă hrŏm rơđah rơđông, pơtruh hăng hơdôm anom bruă pơtom hiăp laih anun anom bruă jar kmar či pơƀuh tơlơi gêh găl tuh pơ alin amăng tơring čar.

“Lơ̆m anom bruă tuh pơ alin mơ̆ng čar rơngiao či hơduah ĕp, juăt ñu gơñu amra tơña lăng sang bruă khua anih jưh mơ̆ng dêh čar ta ƀơ̆i. yua hnun, tơdah ƀing ta brơi djŏp tơlơi pơhing kơ ƀing khua anih jưh amra gêh găl, amuñ či ngă bruă hloh.Kiăo tui tơlơi rô nao rai anai, hơdôm sang bruă khua anih jưh ăt dưi pơƀuh hăng djru pơtruh anom bruă tuh pơ alin. Ƀing gơmơi amra iâu ƀing tuh pơ alin mơ̆ng ƀing gơmơi kiăng rơkâo tuh pơ alin, iâu gơñu mut lăng, pơtŏng lăng rơđah”.

Rơngiao kơ pơhưč tuh pơ alin, Khánh Hòa ăt pơtrut bruă sĭ mơdrô, djru anom bơwih ƀong pok prong anih ba sĭ pơ čar rơngiao Sa jơlan bơwih ƀong phrâo lĕ mut ĕp anih mơdrô Halal, anih mơdrô hăng rơbêh 2 klai čô mơnuih blơi yua gơnam ƀơi rŏng lŏn tơnah. Hơdôm anom bơwih ƀong amăng tơring hơmâo djru čih pơkra mă hră pơsit Halal, pơđĭ tui anŏ klă gơnam tam hăng pok prong ba sĭ gơnam hmư̆ ư pơ čar rơngiao.

Amăng bruă čơkă tuai hyu ngui, Khánh Hòa ăt pơtruh tuh pơ alin ƀơi hơdôm anih mơdrô yom kah hăng Hàn Quốc, India hăng Nga; laih dong pơphun brơi hơdôm rup famtrip mơ̆ng anom bơwih ƀong čơkă tuai, ba tuai hyu ngui jar kmar truh kơ sem lăng anih nao ngui hăng gơnam bơwih brơi bruă hyu ngui. Tui hăng ơi Trương Hòa, hơdôm bruă pơtrut tuh pơ alin amra pok prong anih mơdrô mơ̆ng jar kmar, laih dong pơtrut blơi yua gơnam hăng ba sĭ hlao ƀơi anih hluai tui bruă hyu ngui

“Amăng hrơi mông ră anai, gơmơi pơtrut blơi gơnam amăng lăm čar, laih dong pok prong ƀơi hơdôm anih mơdrô mơ̆ tơring čar hơmâo kĭ hră ngă hrŏm, biă ñu lĕ hơdôm kual plai ƀiă bơbeč djơ̆ mơ̆ng rơngiao. Hluai tui hơdôm bruă pơtrut siư mơdrô hăngh pơtruh nao rai, tuai hyu ngui ăt djru pơtrut tui bruă blơi gơnam hăng ba sĭ gơnam hlao ƀơi anih”.

Tui hăng ơi Nguyễn Việt Hùng, Khua jơnum min mơnuih ƀôn sang tơring čar Khánh Hoà, bruă pơtrut tuh pơ alin mơ̆ng tơring čar glăk plih mơ̆ng bruă tơguan jing hyu ĕp mă pô anom bruă tuh pơ alin tŭ yua, kiăo tui tơlơi gêh găl bơwih ƀong mơ̆ng ia rơsĭ, tơdrun kom păn hăng logistics:

 “Khánh Hòa hơmâo lu tơlơi gêh găl, biă ñu lĕ tơdrun kom păn hăng logistics. Pơ anăp, čih pơkra hơdră pơhưč anom bruă tuh pơ alin pơprong ƀơi rŏng lŏn rai tuh pơ alin. Lơ̆m ƀing tuh pơ alin pơprong mut rai pơ tơring, anih bơwih ƀong sĭ mơdrô mơ̆ng gơñu amra hơmâo akŏ pơjing, djru ngă bă abih hơdôm kual sang măi”.

Hăng jơlan pơtrut pơtom hiăp hăng čar rơngiao bơwih brơi bruă đĭ kyar tui Tơlơi pơtrun 59 – mơ̆ng Ding jum kơđi čar, hrŏm hăng hơdră ngă bruă thâo prăp hlâo, ngă klă bruă iâu pơthưr pơtrut tuh pơ alin, sĭ mơdrô hăng čơkă tuai hyu ngui, Khánh Hòa glăk pok prong tui anih ba sĭ gơnam, pơhưč anom bruă tuh pơ alin mơ̆ng čar rơngiao, ngă phun atur kiăng tơring čar đĭ kyar kơtang bơwih ƀong mơ̆ng ia rơsĭ, hăng bơwih bơwang amăng kual Dơnung Tong Krah.