Jơnum min mơnuih ƀôn sang tơring čar Gia Lai phrâo pơphun jơnum pơsir hĭ bruă bơdjơ̆ nao bruă pơhrui glăi lŏn mơnai amăng akŏ bruă jơlan rơdêh đuăi hmar Quy Nhơn-Pleiku. Lu tơlơi gun sit nik hơmâo pơƀuh brơi, rơkâo tơlơi gir run prong ƀiă kiăng pơsir hĭ, anăp nao pơgiong hlâo lơ 30/4 thun anai. Kơ tơlơi gun, nua prăk duh tui tơlơi pơtrun mrô 30/2025 mơng Jơnum min mơnuih ƀôn sang tơring čar Gia Lai aset ƀiă tui nua ră anai, ngă tơnap tap amăng pơtrut pơsur mơnuih ƀôn sang jao lŏn mơnai. Kơ-iăng Khua Jơnum min mơnuih ƀôn sang tơring čar Gia Lai Nguyễn Tự Công Hoàng rơkâo djop ƀôn lan, anom bruă pơtrut tañ pơhrui glăi lŏn mơnai pơhlôm brơi tong ten, djơ̆ tơlơi pơkă; laih dong tañ dưm dăp anih dŏ phrâo, gir run jao lŏn hlâo lơ 30/6, pơhlôm brơi tơlơi hơdip mơda.

Akŏ bruă  jơlan rơdêh đuăi hmar Quy Nhơn-Pleiku (tơring čar Gia Lai) glông 135 km, prong 4 bơnah, rơdêh dưi đuăi 100 km/h, găn nao 16 boh să, phương amăng tơring čar Gia lai, bruă pok djop ară jơlan ngă giăm 4.789 boh sang anŏ bơdjơ̆ nao, amăng anun giăm 620 boh sang anŏ kiăng do pơ anih phrâo, hrŏm hăng rơbêh 6.300 ring bruă, anih anom kiăng ba đuăi hĭ.