Pơ ala kơ ping gah, Kơnuk kơna, Khua dêh čar ơi Lê Minh Hưng djă gru miđai pơpŭ bơni kơ “Ling tơhan mơnuih ƀôn sang khin hơtai” brơi kơ tơhan kual 4. Anai lĕ, tơlơi apah bơni prong hăng yom pơphăn biă mă mơ̆ng Ping gah, Kơnuk kơna hăng mơnuih ƀôn sang, čih pioh boh tơhnal mă bruă amăng anih tơnap tap mơ̆ dưi hơmâo mă.

Khua dêh čar lăi rơđah, Lŏn ia ta hlăk yak nao amăng sa črăn phrâo, tui jơlan kiăng hơmâo tơlơi glăm ba, mă bruă pơblih phrâo hloh gah ling tơhan pơgang lŏn ia, tơlơi hơđong kơ dêh čar, amăng anun hơmâo tơhan kual 4. Khua dêh čar rơkâo, tơhan kual 4 pơtum pơtô lăi, pơthâo brơi tong ten tơlơi pơmin, pran jua, tơlơi thâo hluh gah kơ bruă pơgang lŏn ia tui Hră pơtrun jơnum ping gah tal 14 dêh čar ta; ngă klă amăng bruă lăi lui hlâo tơlơi pơhing, pơčrâo rơđah bruă či ngă, tơlơi djru ba jơlan hơdră, hơdră pơsir kiăng pơgang tơlơi rơnuk rơnua hơđong kiăng pơtrut pơđĭ kyar lŏn ia, kiăng huăi sư̆ rơbư̆ amăng djop tơlơi či hơmâo; pơtum nao kơ bruă akŏ pơdong bruă ling tơhan kual 4 ngă hơkrŭ kơjăp, lăp djơ̆, beč bal, thâo rơgơi djơ̆ hăng rơnuk phrâo; ăt pơblih pơhrua nao rai mơnuih ngă khua, anăp nao ngă hơbôt hloh, sa hnơ̆ng, tŭ yua, ngă pô tơlơi thâo ia rơgơi măi mok ră anai.