Tơdơi kơ hmư̆ djop sang bruă lăi pơthâo, đĭ pơhiăp klah čun, Kơ-iăng khua dêh čar ơi Hồ Quốc Dũng lăi pơtong, bruă pơđĭ kyar boh thâo ia rơgơi lir hơbit hăng bruă pơđĭ kyar lŏn ia sa bruă yom biă mă; yua kơ anun, djop ding jum, anom bruă khom mut ngă hrŏm; tuh pơ alin, lăng hlâo tơlơi či truh hơmâo, hneč mă anŏ gêh găl pioh nao hlâo, găn akŏ. Kơ-iăng khua dêh čar pơtrun hiăp, blan 4/2026:

Akŏ pơjing Grup hyu mă bruă, djop ding jum, anom bruă lăi pơthâo anăn gơnam, bruă mă hăng boh thâo ia rơgơi phun či mă bruă. Giong anun, djop ding jum, anom bruă pok pơhai ngă tui, pơkra ming hăng lăi pơthâo rơnoh prăk tuh pơ alin. Laih dơ̆ng, djop ding jum kah hăng : Ding jum Boh thâo hăng ia rơgơi phrâo, ding jum prăk kăk, ding jum pơtô hăng pơjuăt khom pơtrut bruă pơtô pơhrăm, ngă giong bruă pơkă kơ prăk kăk hăng tơlơi phiăn pơkă kơ bruă mă. Ding jum pơtô hăng pơjuăt kiăng hơmâo jơlan hơdră phara pơtrut pơsur pơtô hrăm mơnuih mă bruă gah Boh thâo ia rơgơi phrâo yom hloh.