Nao hmư̆ hơmâo tom hăng Khua dêh čar ơi Lê Minh Hưng, Khua git gai pơ ala mơnuih ƀôn sang dêh čar ơi Trần Thanh Mẫn hăng Khua khul git gai Ping gah ơi Trần Cẩm Tú. Mông pơbưp anai pơƀuh tơlơi thâo lăng ba mơ̆ng Ping gah, Kơnuk kơna hăng mơnuih djuai ania ƀiă, pơsit tơlơi gơgrong jai hrơi yom mơ̆ng ƀing khua pơ ala jing mơnuih djuai ania ƀiă amăng anom bruă kơđi čar. Pơhiăp tom jê̆ giăm, mơak hăng ƀing khua, Khua git gai Ping gah, Khua mir sir ơi Tô Lâm lăi, hrơi blan rơgao bruă mă mơ̆ng Khua mua pơ ala mơnuih ƀôn sang djŏp rơnuk hơmâo pơplih tui jơlan ngă bruă sit nik hloh; bruă čih pơkra tơlơi phiăn pơđĭ tui mơnŏ klă ñu, krăp lăng jai hrơi dlăm hloh, amăng anun ƀing khua pơ ala jing mơnuih djuai ania ƀiă jai hrơi pơsit rơđah tơlơi gơgrong bruă čih pơkra tơlơi pơtrun, krăp lăng ngă tui hăng pơtruh ƀing khua pơ ala hăng mơnuih ƀôn sang.

Kiăng dưi kiăo tui tơlơi đĭ kyar rơnuk phrâo, Khua git gai Ping gah, Khua mir sir ơi Tô Lâm kiăng, pơplih tơlơi pơmin kơ bruă wai lăng djuai ania hăng tơlơi djru ba djuai ania, phun ñu ƀu kơnong djru ba đôč ôh, khŏm pơplih pok brơi jơlan kiăng đĭ kyar, ngă gêh găl brơi kiăng mơnuih ƀôn sang hrưn đĭ. Tơlơi gơñăm nao ƀu kơnong hrŏ trun ƀun rin ôh, khŏm hơmâo prăk pơhrui lu tui, hơdip jơnap tui, huăi pleh ploh pơdrong hăng rin, pơhlom abih bang bơkơnar. Amăng mông ngă bruă anun, ƀing khua pơ ala jing mơnuih djuai ania ƀiă kiăng pơthâo glăi hơdôm tơlơi tơnap mơ̆ng plơi pla, ba pơƀuh hơdră ngă bruă lăp djơ̆ hloh kiăo tui rim plơi pla, rim djuai ania. Rim tơlơi rơkâo đĭ khŏm kiăo tui tơlơi hơdip sit nik mơ̆ng neh met wa, kiăo tui tơlơi dưi ngă, hăng anăp nao boh than ba glăi./.