VOV4.Jarai - Mơguah lơ 13/1, ƀơi Hà Nội, Anom bruă pơtô ba mơnuih ƀon sang Ping gah dêh čar hơmâo pơphun jơnum abih bang anih klah čun glăi bruă pơtô ba mơnuih ƀon sang hăng pơtŏng glăi bruă “Pơtrut ngă tui tơlơi phiăn mơnuih ƀon sang ngă pô ƀơi plơi pla” thun 2021, pok pơhai bruă mă amăng thun 2022. Ding kơna ding jum kơđi čar, Khua khul apăn bruă Ping gah ơi Võ Văn Thưởng nao pơhmư̆ hăng git gai mông jơnum. Pơhiăp git gai, ơi Võ Văn Thưởng kiăng anom bruă pơtô ba mơnuih ƀon sang thâo kơjăp tơlơi hơmâo, thâo tơlơi kiăng khăp lăp djơ̆ mơng mơnuih ƀon sang, pơthâo glăi kơ khua mua djŏp ping gah, gong gai sem lăng pơsir brơi, biă ñu lĕ bruă bơdjơ̆ nao tơlơi hơdip, bruă mă, prăk pơhrui mơng ană plơi. Laih dong kiăng ngă dlăm, djŏp djel hloh tơlơi pơmin “Mơnuih ƀon sang yơh phun akha”, pơtrut tui pran kơtang mơng Mơnuih ƀon sang, pran jua gum pơgôp djuai ania. Pơtrut bruă bơkơtưn “Rơgơi bruă pơtô ba mơnuih ƀon sang” mơng abih bang anom bruă, pơlir hăng bruă iâu pơthưr, pơplông khăp kơ lŏn ia ƀơi djŏp bruă mă, pơhlôm djơ̆ hăng tơlơi kiăng, tŭ yua.

Siu H’Mai: Pơblang