Klah čun ƀơi mông jơnum, Kơ-iăng khua dêh čar ơi Lê Tiến Châu lăi pơtong: anom bruă pơtô hrăm kiăng djă hnơ̆ng tơlơi kơtang, sơ̆n pran jua pơblih phrâo tui anăp ngă rơnuk anai, mut phung samơ̆ kơđiăng, kơjăp hăng thâo ruah mă. Kơ bruă pơplông hăng iâu pơmut hrăm hră, Kơ-iăng khua dêh čar pơtrun hiăp brơi kah pơpha rơđah rơđong, tong ten tơhnal pơkă mơ̆ng rim bơyan pơplông.

Hăng čơđai sang hră anih 10, Ding jum Pơtô hăng Pơjuăt khom ngă hră pơkă không  djơ̆ lăp, kơtưn kah pơpha glông, pơtô bruă; jao tơring čar prăp mă ruah hơdră iâu pơmut čơđai sang hră djơ̆ găl, pơplông mut hrăm hăng hơdôm sang hră hrăm  thâo sa mơta tơlơi hrăm hăng sang hră ruah mơnuih rơgơi kơhnâo kiăng anăm ngă tơnap kơ čơđai sang hră. Hăng tal pơplông abih anih 12 lĕ, Kơ-iăng khua dêh čar git gai brơi djă hnơ̆ng anŏ pơkă ruah mơnuih thâo abih anih hrăm, laih dơ̆ng pơblih anŏ pơtong glăi tơlơi thâo hăng tơlơi pơkă krăp lăng. Kơ-iăng khua dêh čar đăo sit, anom bruă pơtô hrăm khom pơsir khut khăt tơlơi ngă soh hăng khom pơsir djơ̆ rơ-ua, khom lui lăng nao kơ puang đôč, khom djă bong kơjăp anăp ngă pơblih phrâo  yua kiăng tŭ yua sit nik.