Mơ̆ng hơdôm anih mơdrô ƀơi anih truh kơ gơnam ba sĭ amăng glông sĭ mơdrô điện tử, plang mơnuih mơnam juăt ngui, lu gơnam hyu leč mă anăn Yến sào Khánh Hòa hơmâo ba sĭ gah rơngiao. Ƀu kơnong pơ anăn kơnar đôč ôh, ƀing gơñu pơkra hruh, kơdung, gru tĕp hăng logo bơkơnar mơn či plư arăng blơi. Tui hăng Kông ti Yến sào Khánh Hòa, ră anai hơmâo 122 anom bruă sĭ mơdrô mă yua ča cot anăn “Yến sào Khánh Hòa”. 42 anom bruă mơdrô ngă hră djă anăn sĭ mơdrô hăng 55 anom bruă ngă hră pơkra gru kơđŏm, mrô gơnam hrŭp hăng anăn gơnam hơmâo pơgang ba laih hlâo kơ anun. Amăng plang mơnuih mơnam juăt ngui ăt hơmâo năng ai 280 anăn ngui Facebook hăng website ƀuh tơhnal hyu leč mă.

Tui hăng ƀing rơgơi kơhnâo bruă anai, lơ̆m gơnam pơkra ča čot ba sĭ tơket tơkeng, anŏ răm rai, rơngiă prăk ƀu kơnong anom mơdrô đôč ôh, ăt bơdjơ̆ sat kơ mơnuih rông čim ačăng črah wơ̆t hăng anih pơkra gơnam bơwih ƀong tơpă sit. Mơnuih blơi gơnam hai ƀu hơ'et pran jua mơn, đing đăo lu, hŭi brơi djơ̆ gơnam ča čot, anun yơh djưng djư, ƀu hor či blơi dong tah, jing anŏ yom mơ̆ng gơnam hăng anŏ gêh găl či pok prong tui anih mơdrô jing tơnap mơn. Ơi Trần Kiều Hưng, Khua Anom bruă wai lăng anih mơdrô tơring čar Khánh Hòa brơi thâo, lu gơnam ngă soh pơka ƀiă či kơnar mơtăm kah hăng hruh, gru, mrô tĕp, tap năng mơđa čih mă ƀlor đôč anih pơkra gơnam či leč kơ mơnuih blơi: “Bruă ngă soh lu biă mă ñu lĕ “Yến sào Khánh Hòa”, anai jing boh hră kông ti ngă hră pơgang ƀơi djŏp anih laih amăng čar ta. Phrâo tom adih anai, gơmơi ƀuh lu gơnam ngă soh, pơkra pơ pơkŏn, samơ̆ ăt čih Yến sào Khánh Hòa mơn. Hơmâo gơnam đa dong čih anih pơkra pơ Khánh Hòa, samơ̆ lơ̆m nao lăng ƀu ƀuh ôh. Lu mơnuih blơi gơnam lơ̆m arăng pơđok, arăng ƀuh anăn Yến sào Khánh Hòa arăng pơmin lĕ yến sào anai hơmâo pơkra pơ Khánh Hòa laih anun gơnam mơ̆ng Kông ti Yến sào Khánh Hoà mơtăm yơh”.

Năm blan akŏ thun 2026, Kông ti Yến sào Khánh Hòa hơmâo pơkra rơbêh 130 klăk gơnam, pơhrui giăm 1.700 klai prăk, djru brơi giăm 3.900 čô mơnuih hơmâo bruă mă. Hơdôm mrô anai brơi ƀuh bruă pơkra gơnam mơ̆ng hruh čim ačăng črah pơgôp prong biă kơ tơlơi bơwih ƀong mơ̆ng tơring anai. Kiăng pơgang ba tơlơi dưi mơ̆ng mơnuih pơkra gơnam, Anom bruă wai lăng bruă sĭ mơdrô tơring čar Khánh Hòa hăng Kông ti Yến sào Khánh Hòa kĭ hră ngă hrŏm hyu sem lăng anih mơdrô, bơtơhmal mơtăm bruă leč pleč, ngă soh tơlơi phiăn pơgang ba ia rơgơi./.