Đĭ pơhiăp git gai mông jơnum, Khua git gai Ping gah, Khua mir sir ơi Tô Lâm lăi pơtong, Jơnum gơnong glông lok 3 hơmâo bơtŭ ư hrŏm kơ lu boh tơhnal, pơsit lu tơlơi črâo trun pơprong kơ pơjing Ping gah, anih anom kơđi čar, pơđĭ kyar hăng wai pơgang lŏn ia. Anai lĕ tơlơi yak nao ngă tui tong ten tơlơi pơtrun mơng Jơnum tal XIV mơng Ping gah, pơlir hăng bruă jao thun 2026 hăng hơnong pơkă ha rơwang ngă bruă, truh thun 2030, thun 2045. Khua git gai Ping gah, Khua mir sir rơkâo djop gưl Ping gah ječ ameč ngă tui tơlơi pơtrun jing jơlan hơdră bruă mă sit nik, lăp djơ̆, tong ten tơlơi đing nao hăng lăp djơ̆ bruă phara mơng rĭm ding jum, gơnong bruă, gong gai ƀon lan.

Kơ gong gai ƀon lan 2 gưl, gơnong glông ƀu lăi bruă dưm dăp anih anom gưl să kiăng tŏ tui anih anom mă bruă hơđong, bruă pơplih amra ba tơbiă tơdah kiăng, brơi lăp djơ̆, kjăp hloh, anăp nao djru brơi mơnuih ƀôn sang klă ƀiă hăng gir run lui hĭ tơlơi pơmĭn “Gal brơi mơnuih apăn bruă, tơnap brơi mơnuih ƀôn sang”. Khua git gai Ping gah lăi pơtong, amăng 6 blan rơnuč thun, djop anih anom kiăng pơhlôm brơi anih anom mă bruă hruaih, đing nao pơsir hĭ khut khăt hơdôm tơlơi gun ječ, gir run pơgiong truh kih hơdôm hơnong pơkă pơđĭ kyar bơwih ƀong huă-mơnuih mơnam ba tơbiă.

Mơguah kơnôl 29/7, Khul khua apăn bruă Ping gah dêh čar pơtrun Tơlơi pơkă mrô 207-QĐ/TW kơ hơdôm tơlơi mơ̆ mơnuih ping gah ƀu dưi ngă (plih hĭ Tơlơi pơkă mrô 37-QĐ/TW). Lăi pơthâo ƀơi mông Jơnum abih bang lăi pơthâo Tơlơi pơtrun Jơnum lok 3 Ping gah dêh čar tal 14, Khua Jơnum min Pel ĕp kơđi tơlơi Ping gah ơi Trần Sỹ Thanh lăi dlăm kơ lu tơlơi phrâo hơmâo yom biă, djơ̆ hăng tơlơi kiăng mông anai. Lăp đing nao, Tơlơi pơkă pơhrua tui bruă kŏm mơnuih ping gah “Mơneč mă bruă dăp glăi ngă hơbôt anom bruă čar či ruah mă mơnuih ƀu apăn bruă, ƀu rơgơi, ƀu hơmâo mơnuih ƀôn sang đăo či ngă khua dưi ruah, kah pơpha mơnuih mă bruă”.

Anai jing tơlơi pơkă hmao kru đah mơ̆ng pơgăn hĭ bruă arăng ruah mă pô sang, phung wang kơnung djuai, ƀu thâo ngă bruă či ngă khua prong lơ̆m glăk pơphun ngă hơbôt anom bruă gong gai kơnuk kơna. Rơngiao kơ anun, tơlơi pơkă ăt pơhrua djŏp bruă kŏm kah hăng: ƀu dưi mă yua plang mơnuih mơnam internet, AI či pôr pơthâo tơlơi pơhing soh glăi; pơjao nao rai, pơdlut nao rai, bĕ hĭ bruă tơnap, ƀu glăm bruă ôh; mơneč mă tơlơi phiăn pơčeh phrâo ia rơgơi či ƀong kông ngăn, ƀu pơhaih tơpă ôh gơnam hơmâo mơ̆ng pơpă.