Amăng mông tŭ jum yă Khuon Sudary, Khua git gai Ping gah, Khua mir sir ơi Tô Lâm pơsit tong Việt Nam lêng kơ lăng yôm hăng đing nao prong hloh tơlơi rô nao rai “ha guai hiam klă, giang mah gru grua, ngă hrŏm djop mơta, hơđong kjăp sui thun” hăng dêh čar Kur. Dua bơnah lăi pơtong tơlơi yôm phun amăng tơlơi rô nao rai kơplah wah tlâo boh dêh čar Việt Nam-Kur-Lao amăng rơnuk phrâo; tơlơi yôm hloh lĕ pran đăo gơnang kơđi čar, ngă hrŏm kjăp amăng bruă wai pơgang rơnuk rơnua, pơlir bơwih ƀong huă hăng pơbưp nao rai mơnuih ƀôn sang.

Dua čô khua lăng yôm jơlan gah ngă hrŏm sui pơ anăp mơng Ping gah amăng djop mơta tơlơi rô nao rai dua bơnah hăng tlâo bơnah, git gai djop ding jum, gơnong bruă ngă tui tơlơi pơkôl hơmâo kĭ. Laih dong dua bơnah bơtŭ ư tŏ tui ngă tŭ yua hơdôm tơhnal pơkă ngă hrŏm phun, sit biă ñu amăng hơdôm mông pơbưp kơplah wah tlâo čô khua dêh čar, tlâo čô Khua git gai pơ ala mơnuih ƀôn sang dêh čar, tlâo čô Khua ding jum ling tơhan, kông ang hăng pơtom hiăp.