Grup khua mua pơ ala mơnuih ƀôn sang dêh čar ƀơi Dak Lak hơmâo nao sem lăng pok pơhai ngă tui Tơlơi phiăn Lŏn mơnai thun 2024 ƀơi Gơnong bruă Ngă hmua hăng Pơgang ayuh hyiăng kiăng pơtong glăi boh tơhnal ngă tui tơlơi phiăn, čih pioh hơdôm tơlơi tơnap tap, gun gan hơmâo lơ̆m ngă tui sit nik pioh bơwih brơi bruă čih pơkra, ngă pơgiong jơlan hơdră, tơlơi phiăn lŏn tơnah amăng thun blan pơ anăp.

Ƀơi mông mă bruă tơña lăng, ƀing ding kơna khua pơ ala mơnuih ƀôn sang dêh čar tơring čar Dak Lak, hơmâo pơčrong sai, ngă pơrơđah tơlơi tơnap, tơlơi gun amăng bruă ngă tui tơlơi phiăn lŏn mơnai thun 2024, biă mă ñu bruă ngă hră pơar dưi yua lŏn, bruă pơklaih ala lŏn, čih pioh mrô dưm amăng plăng tơlơi pơhing điện tử dêh čar lăng lơkak lŏn mơnai, pơpha tơlơi dưi git gai wai lăng mơ̆ng gong gai kơnuk kơna dua gưl. Pơhiăp ƀơi mông jơnum, yă Lê Đào An Xuân, Kơ-iăng khua grup khua mua pơ ala mơnuih ƀôn sang dêh čar tơring čar Dak Lak pơtă pơtăn, lơ̆m  hlăk ngă tui pơpha tơlơi dưi mă bruă hăng anăp nao čih pơkra tơlơi phiăn djơ̆ lăp, Gơnong bruă Ngă hmua hăng Pơgang ayuh hyiăng ăt amra lăi pơthâo thim, ngă giong djop mơta hră pơar tui hăng tơlơi dưi mơ̆ng gơñu pơgang kơ bruă ngă tui Tơlơi phiăn lŏn mơnai tŭ yua, djơ̆ sa pran jua hăng găl tơlơi kiăng sit nik.